Kultuvra  |
Forfatter Niels Ovllá Oskal Dunfjell

Sámi Grand Prix-vuoiti Lávre Johan Eira (20) lea bargan sadjásaš doaimmaheaddjin Š-bláđis dán giđa. Dál illuda čájehit bohtosa.

Dan botta go váldodoaimmaheaddji lea leamaš eret, de lea nubbi Guovdageainnu bárdni gohkken ja sihkkarastán ahte ođđa bláđđi válbmana.

Son beanta lávkii njuolga Sámi Grand Prix-lávddis doaimmaheaddjibargui.

– Mus ii leat dákkárlágan bargu leamaš ovdal, nu ahte lea hui gelddolaš leamaš, dadjá Lávre.

Jurddašalai veaháš

Dan rájes go Lávre gearggai joatkkaskuvllas 2019 giđđageasi, de lea ealihan iežas artistan ja musihkárin. Vel koronaáiggis ge lea dan dahkan, vaikko lea hástaleaddji leamaš.

Muhto juste koronaáigodat rabai ge uvssa doaimmaheaddjibargui.

Loga maid: Dearvvahanvieruid loahppa?

Lavre filosofere
Dábálaččat Lávre ealiha iežas artistan, muhto dán vuorus doaimmaha ođđa Š-nummára.


– Fálaldat bođii hui heivvolaš áigodagas, go juste maŋŋel Sámi Grand Prixa eai lean eará čuojahanbarggut ja doaimmat, ja nu heivii hui vuohkkasit.

– Mun šadden gal veaháš jurddašallat, muhto in gáđa. Lea hui somá leamaš, lohká son. 

Lávre vuittii 2021 Sámi Grand Prixa ovttas Hildá Länsmaniin lávlagiin “Jođi” dáid beassážiid.

Š-bearaš

Vaikko doaimmaha dušše ovtta bláđi, de báhcá liikká oassin Š-historjjás. Ii ge das galle, su eadni Anne Lajla Utsi lei Š-bláđi vuosttaš doaimmaheaddji, ja su áhččebealli Roger Manndal lea maiddái leamaš sadjásaš doaimmaheaddjin.

– Mii leat ruovttus hupman dan birra, ahte mii leat dievas Š-bearaš dál, boagusta Lávre.


– Mus leat álo leamaš čanastagat Š-bláđđái dien dáfus, muhto in lean gal goassege govvidan ieš maid beassat dan doaimmahit.

Loga maid: Dihtet go dán Š birra?

Don dáiddát ožžon buriid rávvagiid ruovttus?

– Juo, de lean! Soai leaba goappašagat rávven ja veahkehastán veaháš. Muđui leat mus veahkkečállit maid leamaš.


Bargá buoremusat ihkku

Vaikko lea bures loaktán barggus, de lea maid fuobmán ahte A4-eallima bargoáiggit ja vuordámušat eai leat jur heivehuvvon sutnje.

– Mun lean gávnnahan ahte in leat álo nu doaimmalaš. Dábálaččat láven bargat, musihka čállit ja nie, easkka go bargomokta badjána. Dávjá dat lea ihkku ja áigodagaid mielde, reašká son.

Son sáhttá leat garas maŋidit bargguid, muhto loahpaloahpas gárve gal daid liikká.

– Loahpas šadden dušše mearridit áigemeari alccesan, ja nu gárvejin buot áiggil.

Maid lohkkit besset oaidnit ođđa bláđis?

– Áššiid sámi kulturmáilmmis. Mis leat áššit earet eará nuorra sámi musihkára birra, ođđa studeantasearvvi birra ja giđđajohtimis.

Lávre giđđajohttimis
Lávre giđđajohtimis. Dan birra besset lohkkit eambbo lohkat ođđaseamos nummáris.


Joatká musihkain

Dál go bargoáigodat sadjásaš doaimmaheaddjin loahpahuvvo, áigu son joatkit musihkainis bargat.

Fargga báddegoahtá iežas vuosttaš soloskearru.

Loga maid: Miellagiddis jahke

– Jurdda lea almmuhit skearru boahtte jagi mielde. Mus lea leamaš buorre dilli čállit ja ráhkadit musihka koronaáigodagas.

– Vaikko artistan ii dieđe goas boahtte bálká máksojuvvo, ja juste dat soaitá veaháš jallodat, de lea musihkka mainna áiggun joatkit bargat, loahpaha Lávre.

Ođđa bláđđi ja nummár man Lávre lea doaimmahan ilbmá gaskamuttus geassemánu.

Tags:    2021   •   Lávre Johan Eira   •   Nuoraidmagasiidna   •   Š   •   Sámi Grand Prix   •   ungdomsmagasin   •  

Sullásaš lohkamuš