Go okte ledjen ieš dego dán tevdnegis dás badjelis, de ipmirdišgohten. Mun in lean háliidan mieđihit dan alccen ovdal, muhto nu ledjen gal gusto ... Mun ledjen šaddame duohta zombie.
II FAL Somby, diet goargu, muhto diekkár telefovdna-zombie, šearbma-zombie, 4G-zombie, na don ipmirdat. Mun ledjen mátkkis ja váccidettiin guovlame telefovdnii rievttes geainnu ozus Google Mapsas go gosii beaškkehin oktii čuovgastoalppuin. Mun ledjen obaaa lahka duođaid nordadit iežan.
MUN BISÁNADDEN dutkat man njeaiga mun measta measta vázzen, ja dasto fertejin dušše moddjestit ja boagustit iežan. Dál gal ledjen dego dat eará zombiedoavkkit geaid ieš ledjen bilkidan ovdal.
4G-BOALLU telefovnnas lea oainnat beare sadjosis. Fargga vel boahtá 5G. Boalu sáhtášii gal álkit čiehkat eret muhtun telefovnnain, muhto ... ii, ohcalan vuos eará čovdosiid. Hehe.
WIFI HAN AŊKKE maid lea juohke nurkki duohken. Muhto mun válddán gal dán duođalažžan. Dasto coahkkalan 4G-neahta ala ja googlestan čovdosiid. Ja čovdosiid gal gávnnan.
DÁL LEAN vuos viežžan áppa telefovdnii mii lohká galle háve mun raban telefovnna jándoris. Čájehuvvo ahte beannot vahkkus rahpen gaskkal 40 ja 82 geardde jándoris. Dat hal ii leat nu olu. Vai? Dahje soaitá gal.
ÁLGGOS atnen áppa muittus ja geahččalin ge danne garvit rahpamis telefovnna duššiid, muhto beaivvis beaivái vájaldišgohten dan. Jus geassit eret dan gávcci diimmu maid ođđen dan jándora go 82 geardde rahpen telefovnna, de rahpen telefovnna gaskamearálaččat 5,1 geardde diimmus.
MUHTO BUOT vearrámus? Mun čuggon telefovnna sihkkarit logenáre geardde čálidettiin dán. Jáhkán ahte ferten bidjat 20 siffar guhkkosaš beassansáni iežan telefovdnii ...
