Nuoraidságaid muitaleaddji, Š, ilmmai juo 1993:s. Jurddaš, fargga 30 jagi áigi! Sihke bláđđi ja máilbmi lea rievdan ja ovdánan dan rájes, muhto nuoraidságát leat ain seamma dehálaččat dál go ovdal.
Dasa gal dáiddat ovttaoaivilis, muhto dihtet go ...
1.
... ahte 1993 rájes leat 113 nummára ilbman Š báberbláđis? Vuosttaš jagiid eai lean fásta almmuheamit nu movt dál leat. Dan eai šaddan ovdal go Sámediggi ruhtadišgođii bláđi 2001:s.
2.
... ahte Š doaimmaheaddjit leat leamaš Anne Lajla Utsi (1993–1995 ja 2001–2005), Elle Márjá Vars (1996–2001), Inga Marja Steinfjell (2005–2007), Máret Ánne Sara (2007–2012), Ingá Káre Márjá I. Utsi (2021–2022) ja Niels Ovllá Oskal Dunfjell (2012-2021, 2022–).
3.
... ahte Š lea okte ilbman dárogillii maid? Dálá doaimmaheaddji Niels Ovllá Oskal Dunfjell studeregođii seammás go bargagođii doaimmaheaddjin. Bláđđi dárogillii ráhkaduvvui pdf-bláđđin skuvlaprošeavtta oktavuođas 2015:s. Dan gávnnat dáppe.
4.
... ahte olu min sámi beakkálmasain leat leamaš Š ovdasiiddus ovdal go duođai beakkihedje? Dá leat muhtumat sis:
5.
... ahte Š lea 2020 rájes almmuhuvvon digitála bláđđin maid? Daid gávnnat dáppe.
6.
... ahte vuosttaš doaimmaheaddji Anne Lajla Utsi ja dálá doaimmaheaddji Niels Ovllá Oskal Dunfjell leigga goappašagat 20-jahkásaččat go ámmáhii álggiiga?
7.
... ahte Š sáddejuvvo nuvttá buot skuvlanuoraide 8. ceahki rájes geain lea sámegiella fágan oahpahusas Norggas?
8.
... ahte ovddeš doaimmaheaddji ja maiddái girječálli Elle Márjá Vars, son gii earet eará lea čállán Čábbámus iđitguovssu, sáhttá gohčodit Š «eadnin». Sámi nuoraidmagasiidna lei vuosttažettiin su idea ja áŋgiruššama duohken.
9.
... ahte nuorat sáhttet ieža sáddet čállosiid ja cavgilit midjiide áššiid birra?
10.
... ahte Š lea dat media mii buot ovddemus almmuha varraseamos duodjemotaid Sámis? Dan gal duostat čuoččuhit. Ovddeš doaimmaheaddji Máret Ánne Sara álggahii min beakkán Muoiddut ja motat spaltta. 2017:s mis ges lei fáddánummár gáktemotaid birra.
