Finálii leat beassan guovttis Norggas eret, guovttis Suomas eret ja gávccis Ruoŧas eret. Isak lei finála oiddot oktan suopmelaččain Peetu Joutsen ja ruoŧŧelaččain Linus Staff.
Fáhkka njunnožis finálas
Isak beasai goalmmádin stártašiljus, muhto go gávve njuikkohagaide, de lei fáhkka njunnožis. De deaivvai skohteriin unohasat vuostálahkii. Isak dovdagođii seammás bákčasiid olgeš gieđas, ja árvvoštalai orustit. Isak birgehii 3. saji ja stuorra pokála. Muhto su mihttu lei vuoitit vuosttas háve go vujii beakkán Arctic Cat Cup.
Doddjon giehta
Buohkat oidne ahte Isak lei roasmmohuvvan. Doavttir iskkai su ja meidnii ahte giehta ii leat doddjon. Hávvečatnasa sorahedje gihtii. Moadde diimmu maŋŋá Östersundda buohcceviesus iskkai doavttir Isaka gieđa ja dovddai seammás ahte dat lea doddjon. Giehta gipsejuvvui ja galgá bissut gipssa siste golbma vahku.
Arctic Cat Cup álggaha sesoŋŋa
Eurohpá skohtervuodjináigodat álggahuvvo juohke jagi Arctic Cat Cup-gilvvuin, mii lea máilmmi boarráseamos skohtercrossgilvu. Dan lágidedje vuosttas geardde 1973:s Sno-Tric Cup-namahusain. Mannan vahkkoloahpa ávvudedje ge 50-jagi lágidemiin.
Team Norway Funäsdalenis
Isak Persen gullá Norgga nuoraidriikkajovkui – Team Norway. Sis lei golmma beaivvi riikkajoavkočoagganeapmi Funäsdalenis ovdalgo Arctic Cat Cup lágiduvvui. Riikkajoavkkus leat sihke gánddat ja nieiddat. Isak lea áidna sápmelaš dán joavkkus.
Nyttårscrossen 2023
Vahkkoloahpa ovdal vuodjimiid Staares lágiduvvui Nyttårscrossen-gilvu Álttás. Dalle Isak lei vuosttas heatas 27 sekundda ovddabealde nubbin buoremusa luohkás Rekrutt 13–14. Son vujii maiddái jođáneappot go buot luohká Rekrutt 14–16-vuoddjit. Dán luohkas ii leat mohtor ráddjejuvvvon 6500 RPM:i, nugo Isak luohkás lea. Vuoddjit luohkáin vuollil 16 jagi eai ge beasa geavahit go beali gássas. Ollesolbmot sáhttet vuodjit skohtera nugo dat lea, muhto liikká eai lean álgoheatas go guokte rávesolbmo Pro Stock-luohkás geain lei buoret áigi go Isak Persenis.
Vuoitán iežas NM-luohká guktii
Isak lea vuoitán iežas luohká NM-gilvvuin 2021 Aarbortes ja 2022 Leavnnjas. Norggas ii gávdno justa dál eará vuoddji su luohkás gii suinna birgehallá.
Dávjá Supmii
Máŋga jagi lea Isak jo gilvalan Suomas. 10-jahkásažžan son 2020:s vuittii Suoma meašttirgilvvu luohkás Mini Junior. Korona bilidii moadde sesoŋŋa. Diibmá álggahuvvui Super League ja vuosttas gilvu lei Bodenis, Ruoŧas. Doppe bođii Isak goalmmádin. Ovdalgo dálvi nogai son lei searvan guđa gilvui Suomas.
Stadioncrossii Oului
Ruovttus Isakas lea sierra hárjehallanlatnja. Son hárjehallá gávcci–ovcci geardde vahkus. Dál šaddet golbma vahku masa dábálaš hárjehallanprográmma ii heive. Giehta galgá vuos savvut. Plána mielde son gilvala fas maŋŋá go gipssa leat čuohppan eret. Dalle leat Suoma meašttirgilvvut stadioncrossas Oulus guovvamánu 24. b.
Vuosttas skohter
Isak lei golbma jagi boaris go oaččui vuosttas skohtera. Go devddii vihtta jagi, de beasai gilvališgoahtit. Sudnos oappážiin lei ruovttus hárjehallanláhttu nuppe bealde geainnu. Dan eaba sáhte šat geavahit dál go soai vuodjiba 600 ccm skohteriid.
Motocross geassit ja čakčat
Go muohta suddá, de hárjehallagoahtá Isak motocross-sihkkeliin. Váldogilvu motocrossas lea Davvi-Norgga meašttirgilvvut (NNM). Vuoiti lea son geas leat eanemus poeaŋŋat oktiibuot. NNM-gilvvut 2022:s ledje Hársttáin, Várggáin, Girkonjárggas, Álttás ja Leavnnjas. Maŋimuš njeallje heata vudje Leavnnjas čakčamánus. Ovdal dáid, de lei Isak 21 poeaŋŋa Laurasætra MK-vuoddji Tobias Grønaas maŋábealde. Isak vuittii liikká NNM:a ovttain poeaŋŋain.
Eambbo snowcross
Muhto muohta ii sutta ovdalgo giđđa ilbmá. Isak áigu vuodjit Suoma meašttirgilvvuid, Super League-gilvvuid, Borealis Cross Álttás ja Støren/Singsås NM-gilvvuid njukčamánus ja Karacrossen cuoŋománus.
