Guovdageaidnu-baernie Áslat Issát lea barkoem orre journalistine åådtjeme Š-magasijnesne. Dïhte joe hïnneme ståantem barkedh, uvtemes mijjen nedtesæjrojne. Daennie nommerisnie aaj maam buakteme. Mijjieh dam Romsesne gaavnebe gusnie saemien låhka universiteetesne.

– Lahkoeh orre barkojne Š-magasijnesne! Datne joe ståantem journalistine barkeme mijjen luvnie. Guktie orreme daan raajan?
– Gæjhtoe! Luste orreme, jïh gieltege! Manne dam hijvenlaakan lyjhkem dan åvteste Š-magasijnesne noerh dah mah aamhtesh jeatjah noeri bïjre darjoeh. Manne åtnam vihkele aaj noere almetjh åvtese lokngesuvvieh. Mijjieh aamhtesh darjobe mah aaj mannem eadtjalduvvieh.

– Datne aarebi plaerien åvteste Ávvir barkeme jïh såemies saernietjaalegh tjaaleme, men daelie ajve doh noerh mah leah jarngesne. Maam vïenhth daan beajjetje noere saemieh pryöjjadieh?
– Hijven gyhtjelasse. Manne vïhtesjadteme orre saemien voejkene jïh orre ektievoete leah noeri gaskem sjugniesovveme, joekoen Fovsen-demonstrasjovni mænngan. Daate sån mij akt mij faamosne abpe Saapman.

– Maam jïjtje lyjhkh darjodh astoeaejkien?
– Manne lyjhkem musihkine gïehtelidh. Mov nïekedasse lea åadtjodh gïehtelidh dan jïjnje musihkine goh gåarede. Manne gitarrem tjoejehtem, dovne oktegh jïh mubpiejgujmie ektine. Manne baantesne tjoejehtem jïh mov aaj jïjtse musihkeprosjekth. Lea luste orreme musihkem bæjhkoehtidh jïjtse nommen nuelesne.

– Datne hov rockebaantesne tjoejehth! Soptsesth vielie dan bïjre!
– Jaavoe, dam darjoem! Mijjien baanten nomme lea Not My Time To Die, jïh hardrockem tjoejehtibie. Muvhten aejkien konserth tjoejehtibie, jïh dæjman aaj albumem bæjhkoehtimh, Sáivu. Daan mearan libie Oslosne, Tråantesne, Romsesne jïh gellene lehkesne Finnmarhkesne tjoejehtamme. Daan giesiem edtjebe Harstadesne tjoejehtidh, öörnemisnie Festspillene i Nord-Norge. Daelie orre albumem soejkesjibie.

– Daelie ånnetji vielie dov bïjre daejrebe! Men guktie datne goh almetje? Guktie sïjhth jïjtjemdh buerkiestidh dejtie mah eah datnem damth?
– Tja … Manne joekoen ræhpas almetje. Lyjhkem vielie mubpiej bïjre lïeredh jïh dej soptsesh, dååjresh jïh åssjaldahkh govledh. Dan gaavhtan journalistine hijvenlaakan sjïehtem. Manne aaj lyjhkem fealadidh jïh orre aath dååjredh. Gåetesne hijven, båarhte bööremes. Mij jeatjah? Amma, lyjhkem guhkiem åeredh jïh dan åvteste tjabreminie aareh tjuedtjielidh.


– Dov akte fun fact jïjtjedh bïjre maam sïjhth mijjine juekedh?
– Manne seapan magijeles faamoeh saemien politihkeristie åådtjeme gie bagkehte satne dejtie vadtesinie munnjien vadteme. Manne onterdem mejtie aaj jealadehtije faamoej bïjre soptsesti. Mejtie edtjem dejtie pryövedh lea eevre jeatjah aamhtese. Im mån dam doesth. Hehe.

– Datne bielietïjjen mijjen luvnie barkh jïh saemien elliestïjjen lohkh Universiteetesne Romsesne. Mij dov båetijen aejkien sjugniehtåvva, vïenhth?
– Gieltege sjædta vuejnedh. Dïhte guhte jeala åådtje vuejnedh. Lyjhkem tjaeledh, guktie gegkestem Š-magasijnesne barkedh dan guhkiem gåarede, maaje dan guhkiem manne noere domtem. Ikth aaj lastoem åtnam gærjam tjaeledh. Men ij goh unnemes mov ambisjovnh mov musihkine. Nïekedasse lea gaajhkh mov ulmieh jaksedh, men leam aavrehke jis unnemes aktem buektehtem.