Aktene gaertjies kontovresne NRK Saepmien lokaaline Karasjohkesne gaavnebe Jonna Dunfjeld Mølnvik, Nelly Engström, Naima Nergård, Ellinor Skartland, Håkon Mu­denia jïh Lemet Nystad fïereguhten daatasjeer­men uvte.

Dah leah aeredstjåanghkosne jïh biejjiem soejkesjeminie gosse båatam. Manne varke guarkam dej lea fuehpie biejjie sijjen uvte.

Taleenth minngemosth aeredstjåanghkoem galhkoeh, jïh fuehpiem åadtjoeh minngeben tjåanghkose mïnnedh.

BIEJJIE ÅEHPIEDEHTIEMINIE mestie akt aalka mij gohtjesåvva pitching.

– Men gusnie raaktan dïhte pitche-aate, Lemet gihtjie.

Mijjieh jallan oksen sistie båateme åvtelen naaken vuepteste tjåanghkoe lea Teamsesne.

Jalhts taleenth leah tjåanghkenamme Karasjoh­kesne voestes tïjjen, dellie dej barkoevoelph NRK Saepmesne loebpeldahkesne abpe laantesne.

Munnjien soptsestieh dah ånnetji ånnetji ed­tjieh åadtjodh pryövedh åvtehkidie NRK Saepmesne pitchedh.

Men dan åvtelen dellie daerpies hijven tjïelkes­timmiem åadtjodh guktie edtja doekedh jïh eevtjedh sijjen åssjalommesh.

Jonna tuhtjie daate ïskeres domtoe.

– Dan voestes aejkien åadtjobe soptsestidh mijjen åssjalommesi bïjre, jïh maam mijjieh veanhtebe Saepmie daarpesje. Joe daelie gujht dearkoes domtoe, Jonna jeahta.

 

JÏJTJENE TÏJJESTE NRK:SNE måjhtam biejjieh meehtin naa jeereldihkie årrodh. Ij akt daelie dan guhkiem vaasa åvtelen journaliste NRK Saep­mien musihkeredaksjovneste Urbi tjaanga.

Göökte journalistijste redaksjovnesne eah leah daesnie, jïh daerpies göökte doemesjæjjajgujmie mah edtjieh daan asken Urbim veeljedh.

Taleenth leah fuehpesne daan biejjien. Jïjnje barkoe aktegslaavlomh jïh ellies albumh goltelidh jïh dejtie dööpmedh.

Ånnetji ånnetji dle Ellinor jïh Nelly jiehtieh dah leah vyljehke dam darjodh, men ajve jis maehtieh musihkese goltelidh mearan jeatjah aatigujmie berkieh.

– Daesnie jïjnjem darjobe. Mijjieh libie sæjloes barkoebiejjien mænngan. Men joekoen luste jïh eevre gaajehligke mijjieh åadtjobe meatan årrodh dagkeres faalenassesne, Nelly tjïelkeste.

MÆNNGAN DON BIEJJEN taleenth edtjieh sijjen åssjalommesh evtiedidh jïh dejtie åehpiedehtedh.

  – Åå, man hijven dïhte lij, Naima faahketji jeahta.

  Jonna lea aadtjen sutnjien thumbnailem vuesiehtamme dan pitchen åvteste mejnie barkeminie.

«Domtesh» stoerre bokstaavigujmie tjåådtje. Goh duekie guvvieh Jonneste vuejnebe, joekehts mimihkigujmie.

– Mejnie datne barkeminie, Håkon? Naima gihtjie.

– Manne Urbi-raajroem vuartesjem. Vïenhtem mov pitch lea mahte seammaplïeres goh dïhte, Håkon vaestede.

Naima tjïelkeste minngemes asken dah leah veele lïerehtimmiem åådtjeme gaajhke såarhts bieliej bïjre journalistebarkoste.

  – Åajvahkommes mijjieh håalomh biejjege utnebe. Men aaj biejjieh goh daate, gusnie åadtjobe kreatijvelaakan barkedh, Naima jeahta.

– Mona Solbakk lea göökte askh dievhteme dïeves lïeremistie, Naima jerhpiedihks jeahta.

Mænngan lïerehtimmietïjje lea illesovveme, taleenth seedtesuvvieh joekehts praksisesijjide NRK Saepmesne.

– Såemies dejstie naan sjïere aamhtesh utnieh mejgujmie sijhtieh barkedh, mearan jeatjebh eah naan åssjaldahkh dan bïjre utnieh jïh leah meatan desnie gusnie daerpies, Naima ­jeahta.

Taleenth gaatelessjieh dah leah mannem bööreme guessine båetedh akten naa ovrovne barkoebiejjien, gosse vihth oksese beenghkie.

 

JUŊKÁN PRODUSEENTE onterde mejtie naaken maahta statistine årrodh Juŋkán åvteste. Dïhte scenem buerkeste jïh gaajhkesh tjuerieh föörhkedidh.

Jonna tjuerieh haestemem vaeltedh dej mubpiej taleenti åvteste, men dam mejjesne ­vaalta.

– Dagke ij lij dan ovrovne biejjie læjhkan, Lemet njyjjehtalla.

Jïh tjoerem jiehtedh manne hov sïemes.

Manne mov åvteste gæjhtam jïh taleentide læhkohtem barkojne åvtese. Daelie tjoerebe ajve vuertedh vuejnedh mejtie dagke åadtjobe naakenh dejstie åssjalommijste vuejnedh.