KulturSápmis Ohcejogas lágiduvvui njoarostangilvu, lávvoságastallamat ja maiddái sámi speeddating. Ulbmil aktivitehtaiguin lei ahte oassálastit gálge somás ládje beassat oahpásmuvvat earáiguin.
Ledje sullii 15 oassálasti njoarostangilvvus gos gilvaleaddjit gálge darvehit čoarvvi mii lei darvvihuvvon fielluide.
Doppe šadde garra gilvvut ovdal go čielggai ahte Nils Joel Partapuoli šattai KulturSámi buoremus suohpangiehta.
Sutnje lei somá vuoitit, ja mieđihii ahte váikko dát gilvu leige eanáš somá dihte, de lei hui buorre dovdu vuoitit.
– Mus lei hui buorre dovdu, in lean gal balus. Mun lean ovdal searvan suohpangilvvuide ja dalle šaddá nu hirbmat jieris ahte ii dieđe measta maid gálgá dáhkat, muhto dál lei hui buorre dovdu searvat ja dát lei somá, lohka Nils Joel.
Nils Joel lei boahtán searvat “Deaivvadeapmi golbma”, nuoraid konferensii man ulbmil lea hábmet cealkámuša das maid sámi nuorat háliidit boahtte áigái. Cealkámuš gálgá ovdanbuktojuvvot 23. sámekonferánssas man Sámiráđđi lágida KulturSámi oktavuođas.
– Visot dát doalut mánnet veháš oktii dán jagi dáppe Ohcejogas. Mu mielas lea somá beassat dáhkat veháš eará diŋggaid ja gávnnadit olbmuiguin.
Illudii go oallugat serve
Maja Kristine Jåma láidestii suohpangilvvu ja illudii go nu máŋggas serve ja erenomážit go nu máŋga nuora háliidedje searvat.
– Dát manai hui bures. Ii lean nu gárra gilvu go sámemeašttirgilvvus, muhto dán dihte šattai gárra gilvvu gilvaleaddjiid gaskka.
Viidásabbot Jåma muitala ahte jurdda gilvvuin lei somás ládje diktit oassálastiid oahpásmuvvat nuppiiguin ja suohpangilvu lea buorre vuohki go veahkehaddet nuppiid, hupmet ja dan ládje oahpásmuvvet.
– Dát gal lea buorre vuohki oahpásmuvvat nuppiiguin, váikko gilvu lea nohkan, de sii velge leat suhppemin ja boagusteamen.
Dehálaš arena
Maja Kristine Jåma lei boahtán KulturSápmái muitalit NANU Sámi Arts International prošeavtta birra, mainna son lea bargan.
Su mielas KulturSápmi lea hirbmat dehálaš arena gos sámi kultursuorggit sáhttet deaivvadit ságastallat áššiid birra mat leat dehálaččat sidjiide.
– Sámi kultuvra- ja dáiddabargit eai beasa nu dávjá deaivvadit ja mun jáhkán lea hirbmat dehálaš soabadit muhtin áššiid birra maid buohkat sáhttet ovddidit, muhto lea maiddái seamma dehálaš fierpmádagaid hukset ja ságastallat olbmuiguin ođđa prošeavttaid birra.
Jåma mielas ledje buorit prográmmačuoggát dán jagáš prográmmas ja muitala ahte son earenoamážit illuda Veikko Holmberg girjealmmuheapmái.
Jåma boagusta ahte Veikko Holmberg lea su vuohppá, muhto deattuha maiddai ahte lea hárve go ođđa girjjit almmuhuvvojit sámegillii.
– Muđui mun máid illudan čuovvut ságastallamiid mat bohtet čuožžilit dáid sierra prográmmačuoggáid oktavuođas, Jåma loahpaha.