Lea nubbi jahki go Gaskaijašurra festivála lágiduvvui Gárasavvonis. Festiválas sáhtii vásihit konsearttaid, duodjemárkaniid, bearašaktivitehtaid ja suohpangilvvu.
Festivála jođiheaddji Karen-Ann Hurri, gii lea leamaš mielde álggaheamen festivála, lea hui duhtavaš dán jagáš doaluiguin.
– Dát lea hui buorre dovdu, mis lea veháš hejos dálki leamaš, muhto mii leat vuovdán ollu eanet bileahtaid go diibmá, ja lea hui somá ahte sáhka festivála birra lea viidon miehtá Sámi.
Orru sturron
Festiválas lei vejolaš oaidnit earet eará Olli Halonen, Myra Granberg, Movits ja vel Mollet, geat dahke comeback gavcci jagi bottu maŋŋá.
Okta sis gii lei boahtán searvat festiválii lei William Pedersen gii orru Suoma beale Gárasavvonis.
– Mun lean boahtán festiválii vásihit konsearttaid ja ovttastallat olbmuiguin. Mun ledjen festiválas diibmá maiddái, ja orru dego festivála lea sturron dán jagi. Sii leat diŋgon bivnnuhet artisttaid ja orrot maid boahtán eanet olbmot deike.
Beaivet lágiduvvojedje duodjemárkanat festiválas gosa duojárat ja dáiddárat miehtá Sámi ledje boahtán vuovdit iežaset dujiid.
Anna-Reetta Niemelä lei okta sis gii lei boahtán vuovdit dujiid duodjemárkanis.
– Mu mielas lea mannan bures, álggos gal vuorrástuvven veháš go lei arvedálki, muhto bures dat gal lea mannan ja bohte ollu olbmot váikko mis lei ge veaháš hejos lihkku dálkkiin.
Suohpangilvu
Gaskaijašuras maid lágiduvvui suohpangilvu. Oktiibuot ledje sullii 100 olbmo dieđihan iežaset gilvui.
Ledje boahtán olbmot miehtá Sámi geat serve, ja čieža diibmu maŋŋá čielggai ahte vuoiti dievdduid luohkás šattai Mikkel Issát Sara.
Sutnje lei hui buorre dovdu vuoitit vuosttaš vuoittu, lávu.
– Dát gal lea hui somá vuoitit, mun lean ollu hárjehallan ja measta juohke beaivvi njorostallan. Mun lean hui duhtavaš oažžot lávu mielde ruoktot, dát gal lea buorre vuoitu.
Nissonluohká vuoiti šattai Bea P. Bals, gii beasai reaga váldit mielde ruoktot go čielggai ahte šattai buoremus suohpangiehta nissonluohkás.
– Hui somá searvat dákkár njorostallangilvui ja lea buorre dovdu vuoitit. Mun lean dušše oktii ovdal searvan njorostallangilvui, dat lei Guovdageainnu beassášmárkaniin, nu ahte lea hui somá vuoitit vuosttaš saji dáppe.
Váikko festivála dušše lea guokte jagi lágiduvvon ja measta visot bargu dahkko eaktodáhtolaččat, de festivála jođiheaddji Karen-Ann Hurri lea duhtavaš dán jagáš lágidemiin.
Go Š jearrá sus mat leat golbma ovddimus ákka manin sámi nuorat galget boahtit festiválii, de son boagusta ja stuora mojiin muitala ahte Gaskaijašurra festivála lea oalle hálbi jus veardida eará festiválaid ektui.
Son maid lohká ahte sáhtta deaivat olbmuid miehtá Sámi geat leat boahtán searvat festiválii. Karen-Ann Hurri loahpaha ahte festiválas maid sáhttá vásihit jalla buriid artisttaid.