De leat vuot beassážat! Ollugat besset viimmat váldit luomu iešguđetge bargguin ja vahkku návddašit dálvebeaivváža. Muhtumat dáidet olu vuoiŋŋastit, ja earát ges messostallet.

Ja dan ii vissa sáhte eahpidit ahte leat ollugat geat illudit čuovvut dán jagáš Sámi Grand Prix-gilvvuid. Dán jagi, nu movt ovdalaš jagiid, ihtet sihke veteránat ja debutánttat lávdái juoigat ja lávlut. Maiddái ihtet olu ođđa šuoŋat iešguđetge Spotify-listtuide.

Mus lea ge dán jagi nai darvánan okta šuokŋa oaivái, namalassii Čáhci man Johánas Nutti Lampa lea čállán.

Áigu návddašit vásáhusa
Johánas, dahje NTÏV, lea máŋga jagi bargan musihkain, muhto dál lávke vuosttaš geardde Sámi Grand Prix-lávdái, gos beassá ovdanbuktit iežas šuoŋa olles Sápmái. Son muitala ahte illuda dán beassat vásihit, ja ahte dovdá ilu go lea beassan mielde gilvvuide. 

– Movt don ráhkkanat lávket dán lávdái?

– Dasa ferten čohkket fámuid, ja mun ferten leahkit «in tune» iežainan ja birrasiinnán, vástida Johánas. 

Son dovdá ahte váikko Sámi Grand Prix lea rievtti mielde gilvu, de áiggošii ieš baicca návddašit vásáhusa ja jurddašit ahte buohkat leat mielde ovddasteame sámi musihka.

– Nu orru suohttaset dahkat dan sajis go oaguhit vuoittu, lohká Johánas.

Niehkomáilmmis gávdná inspirašuvnna
Juoga mii álo lea miellagiddevaš Sámi Grand Prixain lea man ollu variašuvdna gullo lávlunoasis. Artisttain leat iešguđetlágan šáŋŋerat, melodiijat ja lávlunmállet. 

Čáhci lea ge šuokŋa mas lea veaháš earenoamáš stiila.

Dat lea ođđamállet hip-hop šuokŋa mas leat earret eará trap-šáŋŋera dovdomearkkat. 

– Man birra lea dát lávlla?

– Njuolgut dan birra ahte galgá váldit saji, vástida Johánas.

Son muitala viidáseappot ahte niehkomáilmmistis viežžá olu jurdagiid ja dovdduid maid de fievrrida musihkkii. Dasa lassin liiko Johánas guldalit eará musihka mas sáhttá viežžat inspirašuvnna. 

Earret eará guldala Johánas olu Amerihká musihka, nugo hip-hop ja trap. Diein šáŋŋerin lohká Johánas sáhttit gávdnat vaikko man olu vuollešáŋŋeriid.

– Dalle gávdná olu vejolašvuođaid geahččaladdat iešguđe stiillaid, lohká Johánas.

Sámi musihkas nai gávdná olu inspirašuvnna, ja dalle liiko ge Johánas seaguhit dáid stiillaid oktii. Čáhci šuokŋa seaguha sámegiela ja trap-šáŋŋera, ja Piera Eira juoigá vel loahpageahčen šuoŋa. 

– Mun lean oahppan guldalit maid mu máttut háliidit ahte galggan dahkat, ja das gávdnat movtta, loahpaha Johánas. 

Beassášlávvordaga beasat geahččat ja guldalit Johánasa go ovdanbuktá iežas šuoŋa Sámi Grand Prix-lávddis, ja návddašit garra hip-hop ritmmaid Sámi stuorámus musihkkaprográmmas.