Portreahtta  Sporta  |
Forfatter Lávre Johan Eira | Språk/Giella: language Norsk

Gå Tuva Schall Mikkelsen (18) lij avtse jagák, de álgij Sjiejssim- ja hockeyskåvllåj. Uddni l ájnna julevsáme næjttso guhti spællá jiegŋahockeyav nissunij alemus dásen.

Gåvvå: Kenneth Myhre
Gåvvå: Kenneth Myhre

Les saken på norsk her.
Julevsábmáj: Ole-Fredrik Vándar

Ij rat diede majt luluj jiegŋahockeya dagi dahkat. Såjtij návti sjaddat. Gájkka álgij gå Tråmsså ådå jiegŋahálla rahpusij. Danna besaj vuostasj bále dán valástallama lahkusij.

Guláj sjejsajt ma jieŋa vuosstij skårrin ja ruvrov mij dánsaj sluppos slubbuj, ja vuojnij bivvasav mij gålgåj. Niehko idij.

Stuorra rahtjalisvuoda

– Muv æjgáda ejga la álgos miellusa dasi, valla mån smálliv dasik bessiv álgget. Vuostak oahppiv sjiejssit ja maŋŋela oahppiv aj nuppij siegen juohkusin spellat, javllá Tuva.

Dálla sån sjiejssi nástij vuosstij.

Lågå aj: – Miellagiddis jahke

Sujna li juo moadda silbba- ja brånssåmedálja NM:as ja Eliteserienis, ja dajna de ij la nav mælggat stuoráp jiegŋahockeyrájdojda.

Máhttelisvuoda vuorbástuvátjit jiegŋahockeyijn li doajvodahtte aj stuorábu ålggorijkan. Vuodna l ilá unne Tuva rahtjamijda.

– Næjtsojda soajttá gássjel viessot jiegŋahockeyis, valla sidáv sjaddat nav tjiehppen gå máhttelis, javllá Tuva.

Portrett av Tuva
Uddni årru Tuva Oslon ja spællá Hasle-Lørena åvdås nissunij Eliteserienin, mij le alemus dásse Vuona jiegŋahockeyin.


Niegat væráldagilppusa birra

Dálla l ájádallamin jus lulu Suobmaj mannat boahtte jage ja gæhttjalit vuorbástuvvat dan eliteserienin. Dásse l stuoráp Suoman gå Vuonan.

– Oassálasstet væráldagilppusin jali soames stuorra gilppusin luluj dåbddut buorren munji.

E moadda næjtso jiegŋahockeyav Vuonan spela. Sierraláhkáj e sáme birrasin.

Suv sáme rádna e dán láhkáj jiegŋahockeyis berusta. Tuva l vájbi ájnna julevsáme næjttso guhti gijkat dájna valástallamijn Vuonan.

Ij lágeda kontåvrråbargov

Áhkos ja ádjás siegen giessedåben la Tuva gullat lagámusán ietjas sáme identitiehttaj. Danna gullá sámegielav biebbmobievden.

Danna gáhkov bårrå, árbbedábijt oahppá ja gulldal skåjvvesubttsasijt ietjas lagámusáj siegen.

Tuva l sámegielav låhkåm gitta maŋŋemus jahkáj joarkkaskåvlån. De sjaddin nav moadda duoddetijma valástallamij, vaj sámegiella ittjij desti tijmmapládnaj sjiehta.


Tuva i aksjon
Ælla vuojga sáme jiegŋahockeyjuohkusa uddni, valla guhtimusj diehtá, vájbi boahtteájgen?
Gåvvå: Bård Berntsen


– Dálla váttsáv joarkkaskåvlå valástallamsuorgen, ja sidáv joarkket valástallamijn barggat. Dat le riek miellagiddis fáhka, teorehtalattjat aj.

– Vierttiv ihkap barggat jiegŋahockeya duodden. De soajtáv barggagoahtet valástallampsykolåvggån, politijjan, fysioterapevttan jali iehtjádin, javllá Tuva.

Lågå aj: Nord Universitets hotteste studentforening

Vájku gåktu viessom vuojnnu vihtta jage dássta duohku, de li jiegŋahockey ja valástallam oassen.

– Jus iv lulu bessat valástallamijn barggat, de iv lim diehtet majt dahkat. Ij gåjt de munji hieba kontåvrån barggat!

Tags:    Ishockey   •   jiegŋahockey   •   lulesamisk   •   Nuoraidmagasiidna   •   Š   •   Tuva Schall Mikkelsen   •   ungdomsmagasin   •  

Sullásaš lohkamuš