–⁠ Miellagiddis jahke

Jahke dievva sisanos la nåhkåmin sáme oahpestiddjijda. Gæssáj bessi ådå oahpestiddje bargov joarkket.


Les på andre språk: Norsk

Julevsábmáj: Ole-Fredrik Vándar

Madin iehtjáda li ienemusát sijdan læhkám koronanjuolgadusáj diehti, de li sáme oahpestiddje manádam rijkav miehtáj dán skåvllåjage lågådalátjit sámij birra skåvllåklássajda.

Værámus njoammomájgen vierttijin videoa baktu lågådallat, valla ietján la snivva noammomhieredibme dahkam vaj mannulagá skåvlåjda li vargga dagu dábálattjat ásaduvvam.

Ålov oahppam

Oahpestiddje li tjåhkanam Guovddagæjno allaskåvlån gå ságájdahttep guoktásasv sijás, Vibeke Persenav (21) Dænos ja Elle Rávdná Näkkäläjärviv (20) Guovddagæjnos.

Tjuodtjelij vahko libá vas manojda. Trøndeláhka l vuorddemin Vibekev ja Elle Rávdnáv.

Då nuppe, Lemet Johanas Nystad (22) Kárásjjågås ja Mirja Cicilia Andersson Renander (19) Nerskogenis Rennebuan, vahkkot maŋŋela gis libá mannulagájda.

– Árvvediv galla sierralágásj jahke sjattasj korona diehti, danen ællim mujna stuorra vuorddemusá. Valla ihkap la jur dat sivvan manen sjattaj nav miellagiddis ja suohtas jahke, javllá Vibeke.

– Ja de lav vil ålov oahppam! duoddis sån.

Vibeke Persen la dudálasj jagijn sáme oahpestiddjen. Gåvvå: Niels Ovllá Oskal Dunfjell

Elle Rávdná dasi guorras. Mielastis la oahppam ålov goappátjagá sáme kultuvras ja histåvrås, valla aj ietjastis. Sån la åtsådallam man ájnas la árvostit unna ássjijt.

– Mij lip bessam guossidit moadda tjáppa saje, majt ejma la ietján guossidam. Dat la dal ihkap munji læhkám buoremus oasse dát jages, javllá Elle Rávdná.

Ávvudalli gus sáme javlajt?

Vibekev li æjvvalime nuoraj ålles rijkas ienemusát bájnnám, ja sierraláhkáj ielvedijn oahppe gejda lågådallá ietja li sáme gierraga.

– Ålos midjij båhti gatjálvisáj lågådallamij maŋŋela. Muhtema li nuppijs miellusappo, valla mielastim lip buoragit buktám oahppij ságastit, javllá Vibeke.

Lågådallama videoa baktu li dal oahpestiddjijt hásstám. Muhttijn ij la årrum vuojga respånsså, Elle Rávdná mielas.

Lågå aj: Nyhetsankeret

– Valla gå oahppe li årrum njunjága, de lip gullam duov dáv. Muhttijn dal dávk lulun vuorddet suohtasap vásstádusájt, valla álu guhkálattjat vásstedip sáme li dábálattja dagu gájkka iehtjáda, tjajmat Elle Rávdná.

Elle Rávdná Näkkäläjärvi l oahppam ålov jage nalluj. Gåvvå: Niels Ovllá Oskal Dunfjell

Dat la aj lågådallamij ulmme – vuosteldit gáttojt ja jahtojt sámij birra.

Elle Rávdná l oadtjum muhtem gatjálvisájt, duola dagu: máhtti gus sáme dáttjaj válldut ja ávvudalli gus sáme javlajt? Jus dal iehpeda vásstádusájt dajda – máhtti ja ávvudalli.

Gietjen

Ælla desti moadda manádimbiejve vil dán jagásj oahpestiddjijda. Ietjá nuora máhtti dal åhtsåt boahtte oahpestiddjen sjattatjit.

Vibeke ja Elle Rávdná libá gietjen ja vierttiba bargov guodet ådå vehkaj.

Dassta de hådjånibá. Valla sávvaba sáme nuora val åhtsi.

– Åtsådalá suohtas jagev ja ålov dassta åhpa, duodden besa New Yorkaj, jus koronavidjura dåhku luojtti, oattjo 60 oahppotjuorga ja 213 000 kråvnå árvvogis stipendav! javllaba næjtso.

Dánna libá Mirja (gårobielen) ja Elle Rávdna mannulagán, akta manno sunnu moadda manojs aktan. Jage nalluj li oahpestiddje målssum gudi li aktan manádam. Gåvvå: Priváhta

Dát la de lágámus majt Elle Rávdná ja Lemet besajga friddjavuodaáhkkáj ja New Yorkaj gåjt dal ájn. Jus dal ij lim pandemijja de galggin má oahpestiddje New Yorkaj, navti gåk juohkka jage. Gåvvå: Priváhta

Vibeke duoddis:

– Jus juorrula ja i diede jus dát dunji hiehpá, de galga diehtet oahpestiddje oadtju snivugis åhpadimev sáme kultuvras ja histåvrås, ja aj gåktu lågådallat åvddål álggi.

– Vájbi li åhtsåmin jur duv, danen gå ájggu tjoahkkit barggejuohkusav gudi buoragit sæbrrálakkoj barggi.

- Åtså!

– Oahpestiddjejahke vaddá dunji stuorra friddjavuodav gijkadit ietjá dåjmaj. Ij la jur friddjajahke, valla ietjálágásj jahke gånnå oattjo máhttelisvuodav oahppat ienebuv ietjastit ja ájádallat majt maŋŋela iellemin sidá dahkat, javllá Elle Rávdná.

Goappátja libá mierredam majt ájggoba tjaktjaj.

– Ájgov Sáme allaskåvlån låhkåt fágav “Åssko ja iellemdádjadus Sámen”, gåsi muhtem bále jahkáj tjåhkanip. Fáhka vihpá guokta jahkebiele. Duodden sidáv oahppat ienebuv boahttsuæládusá árbbedábe máhtudagáj birra, javllá Elle Rávdná.

Lågå aj: – Kult med E-sport!

Lågå aj: Sportsjournalisten

Vibeke l aj lågåtjit Guovddagæjno Sáme allaskåvlån. Sån ájggu jagev nuorttasámev låhkåt.

Vibeke mielas la Lufoahtta tjáppemus bájkke mav la dáv vássám jagev oahpestiddjen vuojnnám. Gåvvå: Priváhta

Mirja (gårobielen) ja Vibeke. Jage nalluj li oahpestiddje sjaddam stádása lågådalátjit sáme kultuvra ja histåvrå birra. Gåvvå: Priváhta

– Lågåjma allaskåvlån Guovddagæjnon oahpestiddjeårdniga aktijvuodan, ja dajna lav gávnnam nav buoragit dáppe soaptsov. Ájgov ienebuv duojijn barggat. Riek lijkkuv gáptijt goarrot ja dakkárij.

Snjilltjamánon almoduvvi skåvllåjage 2021/2022 sáme oahpestiddje. Ájggemierre åtsåtjit la biehtsemáno 1. biejvve. Dánna lågå ienebuv oahpestiddjeårdniga ja åhtsåmprosessa birra.

– Ávttjip nuorajt åtsåtjit. Dav i de sáŋarda! ålliba.