Romssa ráđđeviesu olggobeallái nagodedje Luondu ja Nuorat čohkket sullii njealljelogi olbmo. Doppe dolle sihke nuorra ja rávis luondduberošteaddjit sátnevuoruid, čájehan dihte vuostehágu Arctic Center huksemii Rávdnjemuotkkis Sálliris.

Sii muitalit ahte dá šaddá roavvámus sisabahkken mii goassege lea Romssas dáhpáhuvvan. 

Arctic Center lea máŋgalogi jagi áigon huksegoahtit sihke barttaid ja alpiidnarusttegiid Rávdnjemuotkái, ja suoidnemánu 1. beaivve galgá ge Romssa suohkan gárvet huksenlobi meannudeami. 

Romssa Luonddu ja Nuorat čuoččuhit ahte ášši orru bodnjaseame dan guvlui ahte Arctic Center oažžu lobi huksegoahtit rusttegiid ja barttaid.

Vuorddekeahtes diehtu
Nuorat várrejit ahte huksen sáhttá leat vahágin earret eará boazodollui. Arctic Centera rusttegat galget plána mielde huksejuvvot guotteteatnamiidda, ja dát sáhttá garrasit vuorjat čoavjjehiid ja misiid. 

Dán dihte lágidedje nuorat demonstrašuvnna ráđđeviesu olggobealde. 

Andrine Hallen, guhte gullá Romssa Luonddu ja Nuoraid báikkálašsearvái, muitala ahte fertejedje oanehis áiggis ordnet visot.

– Mii fertiimet guokte jándora bargat bisánkeahttá vai sáhtiimet demonstrašuvnna lágidit. Eat mii lean gergosat, muhto mis lei bággu ordnet juohke diŋgga.

Andrine muitala ahte eai lean vuordán ahte ášši mearrádus galgá ná árrat boahtit, ja ahte dál lea sis hoahppu bissehit huksenlobi ovdal suoidnemánu.

Demonstrerejit vahkku
Romssa Luonddu ja Nuorat áigot ge doallat guhkebuš demonstrašuvnnaid gávpogis, ja áigot earret eará cegget lávu ja fáktet dan birra jándora. 

Áigumuš lea ahte galget čohkket olbmuid dása, ja sis boahtá čielga diehtu ahte dán áššis lea dušše okta čoavddus.

Namalassii ahte Rávdnjemuotki galgá bissut ráfis.

– Mii eat vuordán nagodit ná oallugiid čohkket oanehis áiggis, muhto dán áššis lea ovdal nai leamašan vuosteháhku, mii áigut viidáseappot bargat, ja mii eat áiggo vuollánit, loahpaha Andrine.