Jarkoestæjja: Ellen Bull Jonassen

2020 galhkuvisnie akte noere saemienïejte isveligke dååjresem utni bussesne Romsesne. Dïhte jeatjah saemine soptsesti jïj­tse gïelesne, saemien, jïh dan gaavhtan akte geerve almetje nïejtem narrahti.

Daate heannadimmie stoerre tsåatskelesvoetem åadtjoeji dovne medijinie jïh saemiej luvnie. Sae­miedigkietjirkije jïh NSR:en aarebi åv­tehke, Runar Myrnes Balto, kampanjem #doarváidál eelki.

Ulmie kampanjine lea tjoevkesem bïejedh trïeg­kenassese maam saemieh dååjroeh, jïh barkedh dam nåhkehtidh.

NOERE NÏEJTE mij jïjnjem kampanjine barke­me lea 22 jaepien båeries Elle Márgget Nystad Karasjohkeste. Elle Márgget lea prosjektemeatanbarkije orreme kampanjesne #doarváidál.

– Mijjen ulmie daejnie kampanjine lea vuesieh­tidh aassjoe saemiej vööste annje gååvnese. Sïjh­tebe almetjh edtjieh dan bïjre soptsestidh. Sïjhtebe stoerreseabradahkem vuesiehtidh guk­tie aajhtoeh mijjem baajnehtieh goh saemieh, guktie domtoe, guktie mijjieh dam dååjrebe jïh vielie, Elle tjïelkeste.

Mænngan daate kampanje eelki, aaj jeatjah or­ganisasjovnh jïjtsh prosjektigujmie eelkin. NSR:en noereraerie gusnie Elle Márgget lea meatan, leah eadtjaldovveme, jïh Elle Márgget lea aaj podcastem stuvreme NSR-N:en åvteste.

– Göökte noere saemieh lin guessieh podcast­esne. Dïhte akte lij Ann-Marie Dorph, dïhte noe­re nïejte mij sïerredimmiem bussesne dååjri, jïh mij gaajhkem eelki.

TJAKTEN 2021 NSR-noerh aktem gaavnedimmiem utnin åarjelsaemien dajvesne, Mussere. Desnie bïegkejårrehtseparhke båatsoem aajhta jïh noerh parhkem vaaksjoeji. Ellese lij leevles des­nie årrodh.

– Øyfjellesne åadtjoejimh vuejnedh guktie dagkerh skilkehtassh dam psykiske healsoem baajnehtieh. Desnie mijjieh noerh dov­ne noerhtelistie jïh åerjielistie gaavnedimh, jïh gellie hijven sopt­sestallemh sjïdti. Koronan gaavhtan ibie dan gellie nuepieh åtneme gaavnedidh jïh pro­sjektigujmie barkedh. Manne gegkestem daelie gosse Nöörje vihth ræhpas sjædta dellie buektiehtibie vielie darjodh.

MEARAN ELLE MÁRGGET annje lij prosjekte­mea­tanbarkije kampanjesne #doarváidál, faale­nassem åadtjoeji orre barkoen bïjre. Dïhte Romsese juhti jïh prosjekten åvtehkinie sjïdti prosjektese RomsaDál, akte orre prosjekte Tromsø Idrettslagen tjïrrh laavenjostosne NSR:ine jïh jeatjah voenges organisasjovnigujmie jïh gaarsjelimmietjïertigujmie Romsesne.

– Prosjekte eelki orrejaepien jïh daan raajan tuh­tjem hijven gåaradamme. Romsa jïh Finnmarhken fylhkentjïelte lea dam tjalmahtamme. Dah pryöjjadieh jïh sijhtieh eadtjohkelaakan mea­tan årrodh prosjektesne. Fylhkentjïelte sæjhta maahtoem lutnjedh saemien ussjedimmievuekien, perspektijven jïh identiteeten bïjre, gusnie maanah jïh noerh leah jarngesne. Tuhtjem mijjieh libie prosjektine lyhkesamme gosse fylhkentjïelte sæjhta meatan årrodh, Elle mejjesne jeahta.

VIHKIELOMMES DÏSSE lea saemien maanah jïh noerh edtjieh jååhkesjimmiem jïh jearsoes­voetem damtedh aktene saemien staaresne goh Romsa.

– Manne prosjektine barkeminie ij ajve mov gaavh­tan, men saemien maanaj jïh noeri gaavh­tan. Manne jearsoe domtem gosse saemien maa­nah jïh noerh hijven staaresne utnieh, jïh åad­tjoeh årrodh gïeh leah. Eah edtjh daarpesjidh bïevneseportaaline årrodh dïsse mij lea saemien. Eah edtjh bïlledh gaptine vaedtsedh staaresne jallh jïjtsh gïelem soptsestidh. Ij mïelem vedtieh trïegkenasse saemiej vööste Romsesne gååvne­se gusnie dan gellie saemieh jïh dan stoerre sae­mien byjrese. Sïjhtem edtja iemie sjïdtedh saemieh leah Romsesne.

Jïjnje lea dorjesovveme jïh jeenjesh leah ead­tjal­dovveme saemietrïegkenassem tjöödtje­stidh. Men, mij minngesne båata?

– Manne gegkestem sjyöhtehke sjædta jeatjah tjïeltide jïh saemien sijjide «ruevtieraajroem dåe­riedidh» prosjekten mænngan RomsaDál. Dagke skraejriem åadtjoeh destie mij Romsesne sjug­niehtåvva daelie, jïh jïjtsh prosjektigujmie nierhkieh. Manne jaahkam mijjen prosjekte sæjh­ta baajnehtimmiem åadtjodh jeatjah lehkesne laant­esne, Elle Márgget minngemes jeahta.