Gilvvu birra

Holbergprisen i skolen lea riikaviidosaš dutkangilvu joatkkaskuvlla ohppiide. Lágideaddji hástala nuoraid beroštišgoahtit humanisttalaš ja servodatdieđalaš fágaide. Ohppit 20 joatkkaskuvllain oassálastet juohke jagi. Golbma buoremus prošeavtta bálkkašuvvet 30000, 20000 ja 10000 ruvnnuin.

 

Nuorra boazodolliid psyhkalaš dearvvašvuohta

Boazodoalu váikkuhus psyhkalaš dearvvašvuhtii lea ohppiid dutkanprošeavtta namma. Sii leat dutkan nuorra boazodolliid psyhkalaš dearvvašvuođa. Sii háliidedje iskat mo boazodoallu váikkuha nuorra boazodolliid psyhkalaččat.

– Mii vásiheimmet ahte boazodoalus leat sihke positiiva ja negatiiva váikkuhusat nuorra boazodolliid psyhkalaš dearvvašvuhtii, dadjá Elle.

Sii leat dutkanráporttas čilgen beliid mat čuhcet boazodolliid psyhkii ja makkár hástalusaid boazodoallu buktá.

– Dát lea erenoamáš dehálaš go boazodoalu guovllut unnot beroškeahttá mo dát olbmuide čuohcá geain lea boazodoallu sihke bargun, eallinláibin ja kultuvran. Go areálaid váldet, de dat čuohcá máŋgga láhkai, lasiha Marita.

 

Ii leat ollu dutkan

Go álge prošeavtta plánet, de hálidii Sara Lea álgu álggus iehčasa hástalit.

– Lei munnje dehálaš iskat fáttá go eai leat galle dutkanprošeavtta čađahuvvon boazodolliid psyhkalaš dearvvašvuođa birra, dadjá Sara Lea.

Doivot olahit máŋgasiidda dáinna ráporttain. Sáhttá vuolggahit eambo dutkama nuorra boazodolliid psyhkalaš dearvvašvuođa birra. Sii maiddái háliidit čalmmustahttit ahte sáhttá hállat hástaleaddji áššiid birra boazodoalus.

 

Hástaleaddji, muhto duhtadahtti

Lea leamaš guhkes proseassa mii lea gáibidan barggu sihke skuvllas ja ruovttus. Vaikko vel lei gáibideaddji bargu, de dat lei sidjiide somá ja ávkkálaš. Buot njealjis leat oahppan ollu dutkama fáttá birra. Dát boahtá ávkin boahtteáiggis go buohkat gullet maiddái boazodoalu birrasii.

Go álge bargat ráporttain, de ii lean gal mihttun beassat daid golbma Holberg i skolen-finálistta searvái.

– Vaikko vel barggaimet nu bures go máhtiimet, de in lean vuordán beassat golbma buoremusa searvái olles riikkas, muitala Elle.

Sara Lea vuige ahte diđii sii sáhttet ollet finálii, muhto ii jáhkkán gal nu geavvat. Go diehtu finála saji birra bođii, de hirpmástuvven.

– Lei jáhkemeahttun, nu čilge Marita dovddu go dieđihedje finálasaji birra.

 

Eai vuordán lihkostuvvat

Guovdageainnu ohppit mátkkoštedje Bergenii gos čuvvo Holbergvahkku prográmma geassemánu álggus. Eai lean vuordán lihkostuvvat. Illudedje Bergena galledit ja vásihit juoga ođđasa. Sii logaldalle ja návddašedje báŋkeahta. 

– Lei jo vuoitun go min bargu dohkkehuvvui, dadjá Sara Lea, gii lea rámis joavkku bargguin.

Dán Sara Lea muitalii ovdalgo dollejedje Bergenii. Guovdageainnu oahppit olahedje eambbo go vurde sin dutkanráporttain. Sii vuite nuppi saji Holbergprisen i skolen 2023-gilvvus. Dát duođašta man dehálaš sin bargu lea, ja man dehálaš fáddá maid sii válljejedje duođaid lea.

 

Š-bláđđi sávvá buot njealjásii lihku erenoamáš barggu ovddas.