– Dál eai leat nu galle nuora geat barget árbevirolaš luđiin. De livččii mus hui miella joatkit dieinna árbevieruin, in ge dušše lávlut, lohká Inger Márjá.

Guokte jagi lea gollan dan rájes go artista Manne (Herman Rundberg) čálii Inger Márjái jearrat searvvašii go studioi lávlut suinna fárus. Ieš muitala Inger Márjá ahte álggus ii lean nu hállu mannat studioi báddet iežas lávluma, muhto loahpas gávnnahii ahte livččii dattege somá juobe geahččalit ge. 

Ja lei ge dan mađe hávskes vásáhus ahte áigu viidáseappot joatkit musihkain.

Dál lea áiddo geargan gierdomátkkiin Finnmarksløpet oktavuođas, gos earret eará son, Manne ja Elina Ijäs leat doallán konsearttaid Guovdageainnus, Deanušalddis, Girkonjárggas ja Kárášjogas. 

Dá lea vuosttáš háve go Inger Márjá lea gierdomátkkis leamašan, ja muitala dan leamašan miellagiddevaš ja somás vásáhussan. 

– Ii mihkkege leat mannan boastut, buore lihkus, muitala Inger Márjá ja bohkosa. 

Ii bala lávddis

Artistaeallin lea áibbas ođđa vásáhus Inger Márjái. Ovdalgo lei searvan konsearttaide ja musihkkabáddemiidda Manne fárus, de ii lean goassege ieš ráhkadan musihka ii ge lávddis čužžon. Dasa fertii jođánit hárjánit, ja álggus soittii nai veaháš issoras leamašan.

Inger Márjá ii mieđit ahte lea ballan lávddis čuoččut, muhto lohká baicca ahte lei sáhka hárjáneami birra. 

Ovdalgo lei ollen šaddat hárjánan lávdeartistan, de muitala ahte lei gal sakka ilgat oahpes olbmuid ovddas lávlut, muhto dađi mielde hárjánii dasa nai jođánit.

Ođđa artisttaide soaitá ge leahkit ilgat čuojahit ja lávlut lávddi alde, go leat nu ollugat geat čuvvot mielde ja guldalit. Inger Márjá jurddaša nuppe ládje, son muitala ahte lea movttiidahtti vásáhus leat lávddi alde, earenoamážit go sus leat artisttat fárus geat veahkkin loktejit gehččiid dánsunmovtta.

– Lea hui somá dovdat ahte barggan buori barggu lávddis, ja ahte šaddá albma buorre boađus, muitala Inger Márjá, ja lasiha:

– Mu mielas lea ge earenoamáš somá juoigat.

Áigu báddet árbevirolaš luđiid

Inger Márjá, gii nai lea boazosápmelaš, liiko hirbmosit árbevirolaš luohtái. Maŋŋel go lea beassan vásihit artistaeallima, de lea álgán jurddašit ahte áigu eambbo bargat luđiin ja doalvut viidáseappot dán árbevieru. 

– Dál eai leat nu galle nuora geat barget árbevirolaš luđiin. De livččii mus hui miella joatkit dieinna árbevieruin, in ge dušše lávlut.

Dán dáfus leat ge Inger Márjjás muhtun ovdagovat geaid liiko guldalit, ja geaid bálgáid áiggošii boahtteáiggis čuovvut. 

Son namuha earret eará iežas máttaráhku, ja maiddái Johan Ánte Bæra. Vissa dan dihte go leat juoigan olu su olbmuid luđiid, árvida ieš.

Go boahtá jearaldat livččii go hállu ieš akto juoigagoahtit, de vástida ovttatmano ahte dasa gal lea hállu. Inger Márjá muitala ahte áigu čohkket iežas bearraša ja soga luđiid vai beassá daid de báddet. 

– Mun lean ge áiddo ožžon jietnabáddemiid muhtumiin min olbmuid luđiin, ja daid háliidivččen báddet ja almmuhit, loahpaha Inger Márjá.

De šaddá miellagiddevaš čuovvut dán nuorra juoigalasa doaimmaid ovddos guvlui, ja gii son dan diehtá, hás muhtun boahtteáiggi nuorra nai čuovvugoahtá Inger Márjjá bálgá.