Kultuvra  |
Forfatter Š | Språk/Giella: language Norsk

Iŋgá Káre Márjá Utsi (20) luohpá NRK Sámis ja bargagoahtá čakčat sadjásaš doaimmaheaddjin Š-bláđis dan botta go váldodoaimmaheaddjis lea jagi virgelohpi.

Les saken på norsk her.

Čakčamánu 1. beaivvi álgá Iŋgá Káre Márjá Utsi, geas lea gullevašvuohta sihke Kárášjohkii ja Guovdageidnui, sadjásaš doaimmaheaddjin Š-bláđđái. Son sihke illuda ja ballá veaháš.

– Mun jáhkán ahte šaddá hui gelddolaš! Sihke stuora ovddasvástádus ja olu bargu vuordá, muhto mun in sáhttán hilgut fálaldaga go bođii, dadjá Iŋgá Káre Márjá.

Ii máššan

Son álggii NRK Sápmái geassebargin diibmá, muhto beasai joatkit sadjásaš virggis. Vahkku ovdalgo ođđa barggu fálaldaga oaččui, lei son guhkidan šiehtadusa NRK Sámiin.

– Nu deaivvai geavvat! Muhto dákkár vejolašvuođa in livčče várra nuppes gal ožžon, ja nu in máššan.

– Hoavddaid ja bargoustibiid mielas lea váivi go luoban NRK Sámis, muhto seammás illudit fárrolaga muinna, lohká Iŋgá Káre Márjá.

Son lea jagi bargan journalistan ja dovdá dál iežas gearggusin ođđa hástalusaid dohppet.

– Álggogeahčen bargoeallimis gánnáha ođđa hástalusaid ohcat vai ovdána ja oahppá nu olu go vejolaš. Nu dovddan ahte dát lea rievttes lávki.


Iŋgá Káre Márjá NRK:s Kárášjogas
Iŋgá Káre Márjá lea jagi bargan NRK Sámis.

Čavge Osloi

Muhto Iŋgá Káre Márjjás eai leat dušše ođđa bargohástalusat vuordimis. Son háliida maid stuoragávpoteallima geahččalit.

Go son bargagoahtá sadjásaš doaimmaheaddjin čakčamánus, de lea Š-doaimmahus gávdnamis Oslos. Kantuvrasadji šaddá gos nu gávpogis ja lea rabas buohkaide galledit.

– Go diibmá jearahalaimet du, de dadjet ge ahte fielladat eret unna sámi servodagažis vai beasat vásihit movt lea leahkit unnitloguid searvvis. Don gusto ledjet duođalaš!

– Juo, dieđusge! Mun lean veaháš dolkan orrut Kárášjogas ja nu háliidan geahččalit eará, boagusta son.

Seamma jearahallamis dajai maid ahte háliidivčče mánáidgárdeoahpaheaddjeohppui álgit Oslos.

Dan ii šat háliit.

– Mun muittán ahte riŋgejin eadnái go ledjen oanehis botta journalistan bargan NRK Sámis ja dadjen “ahte mus gal ii gusto šatta mánáidgárdeoahpaheaddji”, reašká son ja joatká:

– Go joatkkaskuvllas ledjen russa, de šadden ges PR-hoavdan. Mun galgen gohkket earet eará sosiála mediaid. Livččen galgan dalle juo ipmirdit ahte journalistan mun heiven.

Ožžon virgelobi

Nubbi gii maid fuobmái árrat ahte háliida journalistan bargat, lea dálá doaimmaheaddji Niels Ovllá Oskal Dunfjell (29).

Son lei maiddái 20-jahkásaš go álggii doaimmaheaddjin. Dál lea jagi virgelobi ožžon barggus.

– Maid áiggut bargat go virgelohpi lea?

– Mun lean ovcci jagi bargan doaimmaheaddjin, muhto dál háliidan veaháš eará doaimmaide bidjat áiggi. Vuosttažettiin áiggun leat friddja bargat iežan prošeavttaiguin ja muđui frilánsabargguid.

– Plána lea ahte máhcan fas doaimmaheaddjin boahtte čavčča, lohká son.


Niels Ovllá
Dálá doaimmaheaddji Š-bláđis, Niels Ovllá Oskal Dunfjell, lea jagi virgelobi ožžon.

– Gávdnan rievttes olbmo

Sutnje lea dehálaš ahte Š-bláđđi doaimmahuvvo bures dan botta go ieš lea virgelobis. Son ii eahpit ge ahte Iŋgá Káre Márjá lea rievttes olmmoš bargui.

– Mun lean gullan makkár áigumušat ja plánat sus leat, ja nu gal dieđán ahte šaddá ain hui buorre sisdoallu, lohká Niels Ovllá ja lasiha:

– Dán dálvvi lean leamaš mielde min neahttasiiddu hábmeme, ja nu lean hui ilus go Iŋgá Káre Márjjás leat čielga jurdagat movt dan ovdánahttit ja buoridit.

Loga maid: Š almmuha neahttasiiddu

Niels Ovllá lea leamaš doaimmaheaddjin 2012 rájes. Su ovdal lei Máret Ánne Sara doaimmaheaddjin.

Eambbo oidnosis SoMe:s

Iŋgá Káre Márjá galgá gohkket Š-bláđi sisdoalu sihke báberbláđis, neahttasiiddus ja sosiála mediain.

– Mun illudan erenoamážit neahttasiidduin bargat ja dan ovdánahttit. Š-bláđđi galgá maid šaddat eambbo oidnosis sosiála mediain, go mun lean ieš hui áŋgir daiguin, boagusta son.


Iŋgá Káre Márjá poserer
Iŋgá Káre Márjá liiko govvet ja maiddái ieš darvánit govaide.

Magasiidnajournalistihkain sus ii leat olu bargohárjáneapmi dássážii, muhto báberbláđđi galgá ain bissut seamma nanusin, dáhkida son.

Dan ii áiggo olu rievdadit.

Loga maid: Dihtet go dán Š birra?

– Olbmot galget áinnas cavgilit áššiid birra ja fitnat mu kantuvrras Oslos go dan lean ožžon. Mun illudan bargagoahtit, loahpaha Iŋgá Káre Márjá.

Tags:    Iŋgá Káre Márjá Utsi   •   Link i bio   •   Niels Ovllá Oskal Dunfjell   •   Nuoraidmagasiidna   •   Ođđa doaimmaheaddji   •   Š   •  

Sullásaš lohkamuš