Mii leat muohtacrossašiljus sullii miilla olggobealde Leavnnja. 14-jahkásaš Adine Persen mohkohallá alla leahtuin skohteriin ja vuodjá bovnnaid badjel.

Deike son láve boahtit juohke vahkku hárjehallat ja ráhkkanaddat gilvvuide. Adine áhčči, Lásse, rávvesta nieidda ovdalgo vuojista fas birra šilju. Son lea juo olu ollen vuodjit ja gilvalit, vaikko ii leat go 14 jahkásaš.

Čakčat šattai son motocrossa Davvi-Norgga meašttirin, MX nissoniid luohkás.

Son faskii maiddái 8. saji NM-gilvvuin motocrossas, nieiddaid 13–15-ahkejoavkkus. Árvideamis lea mihttu vel eambbo ovdánit boahtteáiggis.

Adine váldá bottu ja mii viehkalit sisa liekkadit. Son lea eahpitkeahttá áŋgiris vuoddji ja gilvaleaddji. Mii jearralit movt nu áŋgirin lea šaddan.

– Áhččán dat álggii skohtercrossain álggos, ja son gal lea dasa olu váikkuhan. Mu viellja, Isak (gean birra čáliimet 2023:s), oaččui vuosttaš skohtera go lei golmmajahkásaš, ja mun ožžon ges vuosttaš skohtera go ledjen guovttejahkásaš. Mii leat ge maid álo ruovttus vuojašan, ja skohtervuodjin lea leamaš stuora oassi bajásšaddamis, dadjá Adine.

Váttis, muhto somá
Adine mieđiha ahte crossavuodjin lea lossa valástallansuorgi, muhto dat vissa lea ge oassin dasa manne lea nu somá. Sutnje lea lunddolaš ášši gilvalit ja vuodjit.

– Earát eai soaitte diehtit man váttis lea vuodjit crossašiljus.

– Mii lea váddáseamos du mielas?

– Lea oalle váttis njuiket go čomiid badjel vuoján. Dál easka mun lean šaddan oadjebas dasa. Mu mielas lea oalle somá go dan lean álgán duostat, seammás go jođánit vuoján.

Ii dáidde ge nu imaš ahte lea sáhka olu hárjehallamis ja hárjáneamis ovdalgo oadjebasat birge váttis šiljuin.

Adine muitala fearána birra go okte lei gilvaleame.

– Mun ribahin mannat mohki badjel, ja dasto bođii eará vuoddji doarrás mu skohtera njeaiga. Ii lean eambbo go mohtorvariáhtor mii cuovkanii, muhto dan maŋŋel gal ledjen oalle várrogas.

Son muitá nai oktii go lei unnit, de lei son luoikkahan vielja skohtera. Adine muitala ahte šattai beare áŋgir dainna, ja go vujii muohtačomi njeaiga, de girddii ieš badjel stivrrana.

– Huff! Ii go áhččái láve leat ilgat?

– Dan gal lea, muhto dasa ii leat eambbo go hárjánit, moddjá Adine áhčči, Lásse.

Teknihkalaččat sáhttá maid leahkit váttis Adine mielas. Go lea unnit go sekundda birra sáhka go mearrádusaid galgá váldit crossašiljus.

Nuorra meašttir
Muhto vaikko lea váttis, de lea Adine birgen hirbmat bures gilvvuin. Nu movt juo namuhuvvon, de šattai son motocrossa Davvi-Norgga meašttirin diibmá.

Adines lea ge čielga mihttu, ja dat lea šaddat buot buoremussan.

– Dat movttiidahttá mu maid go jurddašan ahte earáin lea seamma mihttu. Ja jus galggan ovdánit, de ferten bures hárjehallat.

– Movt lei dovdu go šaddet Davvi-Norgga meašttirin?

– Dan in gal vuordán veahášge! Diein gilvvuin in vuoitán ovttage vuoru, muhto mus ledje oktiibuot buoremus bohtosat. Gullen áhčis ovdal maŋemus heata ahte lean Davvi-Norgga meašttir. Dalle gal šadden hirbmat movtta.

– Árvidan ahte lea olu hárjehallan dán duohken?

– Lea! Láven maŋŋebárggaid ja duorastagaid hárjehallat, ja ruovttus ges hárjehalan juohke beaivve. Diibmá álgen ges heasttain riidet, ja dan geahččalan maid vahkkosaččat dahkat.

– Báhcá go de áigi astoáiggedoaimmaide?

– Dan gal dahká. Go bures plánen, de báhcá álo áigi.

Alla mihtut
Go jearrat guhte vuorru dahje gilvvu lea buoremusat báhcán muitui, de jurdilastá Adine veaháš ovdalgo vástida. Son muitá go lei gávcci jagi boaris, ja lei motocrossa vuodjime Álttás.

– Mun ledjen vuojidettiin veaháš gilvaleamen erenoamážit muhtun Álttá bártniin, ja dan botta muitalii speaker ahte mun lean su jiellatvuoddji. Dat attii buori movtta, ja vudjen hui bures dien vuoru, moddjá Adine.

Go mii jearrat makkár mihtut leat boahtteáiggis, de muitala ahte áigu vuodjit crossa nu guhká go vejolaš.

– Ja mihttu gal livččii beassat USA:i, go buoremus vuoddjit han leat doppe. Muhto livččii maid somá jus ii dárbbašivčče dohko vuolgit, jus dáppe davvin ordneše dan mađe buriid cupgilvvuid, loahpaha Adine.