Kultuvra  |
Forfatter Š | Språk/Giella: language Norsk

Š nuoraidmagasiidna lea viimmat lávken nehttii.

Les saken på norsk her.

Š nuoraidmagasiidna lea viimmat almmuhan neahttasiiddu. Magasiidna álggahuvvui 1993:s ja lea dássážii dušše leamaš báberhámis ja dál maiddái pdf-hámis, juoga maid ain galgá leahkit.

Neahttasiidu šaddá lassefálaldahkan báberbláđđái mii ilbmá njeallje geardde jahkái.

– Dát lea stuora illubeaivin midjiide! Mii plánegođiimet neahttasiiddu čakčat ja ovdalaš juovllaid bargagohte min hábmejeaddjit dainna.

– Dál de viimmat beasaimet almmuhit, dadjá Š doaimmaheaddji Niels Ovllá Oskal Dunfjell (29).

Loga maid: Dihtet go dán Š birra?

Nuvttá bláđđi nuoraide

Nu movt mediageavaheapmi dađistaga rievdá, de lea áibbas lunddolaš ja dárbbašlaš ahte Š maiddái gávdno neahtas, oaivvilda Dunfjell.

– Mii leat sosiála mediain dieđusge gávdnon olu jagiid, muhto neahttasiiddu ásahit lea vel dobbelii lávket.

Š báberbláđđi sáddejuvvo nuvttá ulbmiljovkui, geat leat skuvlanuorat Norggas gávccát ceahki rájes geain lea sámegiella fágan oahpahusas.

Dán dáfus lea Š leamaš erenoamáš dilis go bláđđi jur beanta gahččá lohkkiid askái skuvlla bokte.


Govva Š-bláđiin
Vimmat beassat nuoraidságaid lohkat neahtas maid.

Earát sáhttet fásta diŋgojumi bokte lohkat Š dahje eaŋkilnummáriid oastit sihke báberhámis dahje pdf-bláđđin.

– Dál datte lei áigi fállat nuoraide sisdoalu neahta bokte maid, go sin lea eahpitkeahttá álkimus olahit neahta bokte. Seammás besset ođđa lohkkit maid oahpásnuvvat minguin, dadjá son ja lasiha:

– Oallugat leat jearahan goas min áššiid beassá lohkagoahtit neahtas maid.

Ruhtadeapmi lea hehtten

Åge Persen lea jođiheaddji Iđut-lágádusas mii oamasta ja almmuha Š. Son maiddái lea ilus neahttafálaldaga dihte, ja čilge ná manne Š ii leat ovdal lávken nehttii:

– Dálá doaimmaheaddji lea máŋgii árvalan ja geahččalan bargat neahttasiiddu ovddas, muhto lágádusa bealis eat leat ovdalgo dál nagodan čoavdit ruhtadeami mii guoská neahttasiiddu bargui ja doaimmaheapmái.

Loga maid: TikTok-revolušuvdna

Iđut-lágádusas lea eaktun leamaš ahte háliidit doalahit báberbláđi seammás go neahttafálaldat maid lea.

– Mii earet eará almmuhišgoahtit njealje báberbláđi jahkái dan sadjái go guhtta nu mo leat dahkan maŋemuš njeallje jagi. Dáinna lágiin rahpasii ruhtadeapmi ja resurssat neahttasiidui, dadjá Persen.

Norgga Sámediggi ruhtada magasiinna almmuheami “Sámi mediat”-ortnega ruhtadoarjagiin.


Redaktør Dunfjell ser i kamera
Š doaimmaheaddji Niels Ovllá Oskal Dunfjell.

Almmuhit dárogillii maid

Neahttasiidu šaddá lassefálaldahkan báberbláđđái, go eai leat áigumušat gilvalit varas ođđasiid badjel eará mediaásahusaiguin.

Š háliida ain joatkit eksklusiiva áššiid ja portreahtaid ráhkadit sámi ja máilmmi ođasgova vuođul.

– Š lea okta moatti medias mat duođai čalmmustahttet nuorra sámiid ja addet sidjiide cealkinsaji. Mii loktet nuoraid oidnosii min ovdasiidduid ja reportášaid bokte, ja nu háliidit joatkit dahkat neahtas maid.

– Mis eai šatta plussaáššit obage. Š lea vuosttažettiin nuoraid váste, lohká Dunfjell.

Loga maid: Sápmelaš, muhto ii datte sápmelaš

Báberbláđis leat áššit sihke davvi-, julev- ja lullisámegillii. Nu šaddá neahttasiiddus maid, lassin dárogillii.

– Báberbláđđi galgá ain dušše sámegillii leahkit, muhto neahttasiiddus boahtit almmuhit dárogillii maid. Dainna lágiin beassat maid fállat sisdoalu sidjiide geat eai sámás, dadjá son ja loahpaha:

– Min neahttasiidu lea aiddo riegádan ja mii illudit ovdánahttit dan viidáseappot!

Tags:    nettside   •   Niels Ovllá Oskal Dunfjell   •   Š   •   Samisk   •   ungdomsmagasin   •  

Sullásaš lohkamuš