Åarjelsaemien gïelese: Ajlin J. Kråik

Saara Hermansson Gåaltoedaeleste Vualtjarisnie vitnijinie sjïdti joejkemekategorijesne daan jaapetje Sámi Grand Prixeste, mij öörnesovvi Guovdageaidnusne påaskeiehkeden jïh maam dovne NRK1, SVT Play jïh YLE Areena ryöktesth tv:sne seedtin.

Jïh daejnie histovrijes sjïdti.

Aarebi lea laavlomekategorijem vitneme 2019, laavloeminie Mov laavlome. Daan aejkien gïerh-geatjan joejkemekategorijesne bööti vueline Goeksege.

– Tjoerem jiehtedh lij naa stoerre gosse govlim mov nomme jeahtasovvi! Hævvi geerve viertiestidh dejnie voestes aejkine gosse vitnim, men annje garmeresvoetem jïh stoerre lahkoem damtem, Saara jeahta.

Lij rïektesisnie gaervies SGP:ine
Gosse dejnie soptsestibie, dïhte lea Stuehkesne gusnie TV-programmem åarjelsaemien gielese maanide «dubbede». Dïhte dagkerh lustes barkoeh vaalta muvhten aejkien.

Sïejhmemes saemienlohkehtæjjine barka Jåhkåmåhkkesne.

Musihke lea naakede mejnie gïehtele barkoen baalte. Læjhkan musihke jïjnjem altese tïjjeste vaalta, joekoen mænngan eelki vueliem goerehtidh. Dan gaavhtan aaj meatan sjïdti joejkemekategorijesne Sámi Grand Prixesne.

Jïh ajve ånnetji sååjhti guktie numhtie sjïdti.

Mænngan joe meatan orreme laavlomekategorijesne göökth, voestes aejkien 2018, dïhte tuhtji satne lij raaktan gaervies Sámi Grand Prixine. Men idtji numhtie sjïdth.

– Akte mannem gihtji mejtie lim meatan orreme joejkeme aarebi, jïh naemhtie dïhte mannem heesti jïjtjemem bïeljelidh meatan årrodh. Eevre åvtelen bïeljelimmiemierie nåhki, manne mov vueliem sïjse seedtim.

 

Sarvevijremegaavnedimmie
Dïhte veeljesovvi goh akte ållesth govhte joejkemefinalistijste. Iemie domti dïsse meatan årrodh ikth vielie, joekoen vueline.

Vitnijevuelie Goeksege dïsse bööti dæjmetje tjaktjen gosse lij sarvevijremegaavnedimmesne. Akte joekoen åajvoeh lahkoesoptsese.

Dovne sarve jïh mïelehke sjïdti, jïh minngemes aaj Sámi Grand Prix-vitnijinie sjïdti.

– Sarvevijreme lij joekoen vihkele. Dan vijremen mænngan raaktan ektesne sjïdtimen, Saara föörhkede.

Saara jïh mïelehke voestes aejkien gaavnesjigan daanhtsosne 2019. Dah guaktah ånnetji ektesne daanhtsoehtigan, men mænngan don iehkeden idtjigan vielie sinsitniem vuejnieh. Jïh idtji vielie sjïdth don aejkien.

Men dle koronapandemije bööti.

Jïh guhkiem ij lij vielie daanhtsoe jallh saemiefeesth. Men maajetjh Tinder gååvnese.

Aareh giesege, jovnesåhkoeh-hieljen åvtelen Åanghkerenjeeruvisnie dæjman, dah sinsitniem gaavnedigan dennie vietseles dating-appesne.

Dellie jïjnje lij dorjesovveme.

– Dïhte vaerien mubpede bieleste båata gusnie byjjenim. Lissine dovne voelph jïh jeatjah aath ektesne utnien guktie Saepmie lea dovne stoerre jïh onne seamma tïjjen.

Albumen bïjre nïekede
Nuekie stoerre daate saaht guktie Saarese. Dïhte gujht sæjhta saemien musihkine jïh vueline barkedh guhkiebasse.

Goh vitnije Sámi Grand Prixeste, åådtje konsertem hööltedh påaskefestivaalesne Guovdageaidnusne minngeben jaepien.

Ikth vielie.



Altese mubpie stoerre ulmie lea albumem bæjhkoehtidh. Dan bïjre guhkiem nïekedamme.

– Damtem manne lïhkebe lïhkebe dan måalese båatam fïerhten biejjien. Daelie maaje produsentem jïh musihkerh gaavneme. Jeenjesh mah leah vielie musihkem manneste gihtjeme, men jïjtje im dan fuehpiem åtneme.

– Jïh ih edtjh gåessie gih meatan årrodh Sámi Grand Prixesne vielie?

Saara föörhkede.

– Im dam vïenhth, men ij edtjh gåessie gih jiehtedh ij gåessie! Nov gujht guhkiem sjædta goske dam darjoem. Gieltege ij daejredh mij mannem vuertieminie.