Johan Anders Bær – Čáppa
Iktesth luste gosse Johan Anders Bær orre albuminie båata, gie ryöknesåvva goh akte Saepmien uvtemes joejkijijstie. Albumisnie «Čáppa» mij bööti voerhtjen 21.b. gaektsie joejkh gaavnebe, jïh dejstie golme leah singelinie båateme aarebi. Jalhts Johan Andersen joejke lea jolle daltesisnie, dellie læjhkan naan joejkh goh «Áltá» jïh «Váccašan» mah leah ånnetji nåakebe jis joejkigujmie «Fielladan» jïh «Čáppa» viertiestibie. Maahta gujht albumem goltelidh, men ibie mih dam mujhtieh goh akte Johan Anders Bæren bööremes albumijstie.
NTÏV, Piera Eira – Nigá
Daate voestes singele prosjekteste SGP Cover vol. 2 jïh ibie daestie håjnarosth. Ulmie prosjektine SGP Cover lea båeries jïh åajaldamme joejkh jïh laavlomh Sámi Grand Prixeste orrestehtedh, jïh daesnie produsente NTÏV jïh joejkije Piera Eira hijvenlaakan lyhkesamme trap-joejkine «Nigá». Meehti joejkem voestes aejkien govledh 1991 gosse Ánte Niillas J. Eira dam joejki. Piera Eira lea væjkeles noere joejkije mij hijvenlaakan lyhkesamme aerpievuekien joejken sjïerevoeth utniehtidh gosse pleentesåvva NTÏV:n trap-beatine, jïh gåarede badth dïsse goltelidh. «Nigá» lastoem vadta vielie govledh destie maam vuertiemisnie utnebe singelinie SGP Cover vol. 2.
Natalie Carrion – Daelviejïjje
Natalie Carrion sov voestes SGP-laavlomem eensilaakan deellie. «Daelviejïjje» lea laavlome mestie lastoem åådtje daanhtsodh jïh meatan årrodh laavlodh sjïere SGP-stijlesne. Daanjaapetje SGP-laavlomh lin jolle daltesisnie, lij gellie joekoen tjaebpies laavlomh, men læjhkan daate laavlome mij lea mov persovneles favorihte dan tjaebpies melodijen gaavhtan, jïh ij goh unnemes dan tjaebpies teeksten gaavhtan. NRK:se Natalie soptseste satne skraejriem laavloemasse åadtjoeji mænngan aehtjebe sealadi dæjman. Dellie jïjnjem sårkoem jïh ohtselimmiem damti. Laavlome lea ojhte dej njaelkies mojhtesi bïjre mejtie almetjen bïjre åtna maam ij gåessie gih sïjhth åajaldidh.
