Julevsábmáj: Are Tjihkkom
Lars-Bjørnar Nøstan Knutsen le 29-jagák, badjánam Fåvsån, ja le divtasvuonagij gierrak. Bæjválattjat de duostudagán barggá. Asstoájgen gis Vuona stuorámus sáme nuorajsiebre, Noereha, oajvven.
Lars-Bjørnar subtsas åvdep bále luohtádusdåjman de lij joarkkaskåvlå oahppijráde stivran ja Oahppeorganisasjåvnå fylkkastivran.
– Manen akti vil sæbrrali organisasjåvnnåbargguj?
– Gatjálvis idij, jus luluv dijmásj stivrraj ájrrasin sæbrrat. Dalloj lij ham korona, de lij gåjt suohtas juojddá bargo duodden dahkat. Ja de lav nåk joarkkám, tjajmmá Lars-Bjørnar.
– Doajmmam la dal oajvven guokta máno. Le gus ulmijt gávnadam?
– Lev, miella le ham sæhkásimme ienebujt julevsáme guovlos sebradit, doajvodahtte vil de maŋenagi bájke siebrev vuododit. Dáhta le aktan ulmijstam.
– Le gus vájmmoássje?
– Vikkav, vaj aktak sábme ij gåppsu jali ga ålgusjbælláj rájadalá. Iesj lav duonna-dánna álu dájt åtsådallam, iv ga sidá nuora dákkár dåbdojt gulli.
Lågå aj: Jiegŋahockeyniehko
– Lågenanvidá jagágin oahppi sábme la. Gåktu dávva åtsådalli?
– Ajtu suohttasin. Skåvlån ásadijma sáme vahkov, danen de Fovsen Njaarke tjieldev guossidijma. Sijdan de lidjiv dájna tiemájn barggamin, de æddnám giehtoj gåjt avtas bieles lav sábme. De dasi mielastuvviv dalá ja mielastim de vierrekvuodam hárráj tjielggiv.
– Sámev allasim máhtsadit gulluj má luondulattjan vuostasj lávke rájes, de danen spájtta gæhttjaliv sáme oahppat skåvlån. De gåjt avtsát klássa rájes gitta barggoiellemij gæhttjaliv váni vuorbástuvák åhpadimev ásadit, subtsas Lars-Bjørnar.
– Dån la de julevsábme, guhti le oarjjelsáme dajvan badjánam. Manen?
– Æddnám le riegádam ja badjánam Fåvsån. Áhtjám iejvvij Oslon, valla máhttse Fåvssåj jådij, gå mån riegádiv. Agev javlav dåppen lav badjánam, ájnat lav divtasvuonak, Divtasvuona vierregin ham ietjam buoremusát dåbdåv. Dát dåbddo le jagij nalluj gievrrum.
– Man hávsske! Majt de asstoájgenit muojon dagá?
– Ålgus luonnduj vuolgáv joavdádalátjit, gå astijdav. Majdis maŋemus jagijt iv la heva astijdam, gå sahte ulmutjis vehi ienebuv lav báddnum bargguj, tjajmmá Lars-Bjørnar.
– Gatjádattijn “majt de asstoájgenit muojon dagá?” de álu vásstedav: “Na, dulluv ham dájna nuorajsiebrijn.” Dahta le mahkas muv asstoájge doajmman.
– Le gus duokkár, guhti boahtteájgev mælggadij guovlot, jali le gus de farra bieggaoajvve, guhti máhttelisvuodav ájgenis ávkki?
– Goappátjagá, dávk. Muojon le mujna guovludahka, vaj diedáv, masi astijdav ja masi gis iv, gå agev lav barggam guhtta-gietjav biejve vahkon. Muojon astot tjielggidav ássjijt, buojkulvissan gudi festivállaj vuolgáv. Valla de lav bieggaoajvven, jus rijmmo soajttá guoros.
– Festiválajt astot guovloda. Majt giesen?
– Ienemusát galla bargav, valla suohtastalátjav ham aj. Biehtsemáno gietjen vuolgáv EU-Sámi Weekaj, vaj de vuostasj bále besav Skádasasuollu nubbelij. Miellagiddis.
– Ja de vil ávvudav Oslo Pridev. Buorre le oahppásijt iejvvit, gejt iv la guhkes ájggáj vuojnnám, ja dan siebrrevuohtaj bessat. Doajvov vil muhtem festivállaj háhppidav, valla gatjálvis le, jus asstoájgge soajttá, hæjttá Lars-Bjørnar.
