Jårggålam: Are Tjihkkom

Ragátmáno 9. biejve dán jage gulájma vuostasj bále væráltnástev Lordev (Ella Maria Lani Yelich-O'Connorav) maori-giellaj lávllomin – EP:an, man namma le «Te Ao Marama», «tjuovga ­ájmmo».

Skierron li vihtta maori-giellaj jårggåluvvam lávllaga skierros «Solar Power».

Lorde ij la iesj maori, ájnat oahppam dåssju gallegasj gárgadisáv maori-giellaj mánájskåvlån.

The Spinoff-ájggetjállagij giehttu lávllo giella ij lim ájmonis stuorra oassen, danna hådjånastij ja nievres oamedåbdov gulláj.

– Jåhtegoahtám lav giellaj. Dát prosjækta lij gis muv álggo. Dájna barggat gulluj alvvusin. Låssådin. Dåbdojs dievva. Iv la goassak dákkárijt gullam tjáledijn ja báddidattijn. Fábmogis, giehttu Lorde The Spinoffaj.

GUHTI LE SKIERRUJ edna mielastuvvam, le 20-jagák Wairaka Te Kira. Sån le Ådå Selánda Taurangas, ja le ham de maori.

– Mielastim le galla buorre Lorde dáv skierrov almot. Ájnas Lorde lágásj tjuojadiddje te reo Māoriv návti dåhkkit.

Wairaka giehttu Ådå Selándan dåssju 15 prosenta maorijs gielasa bukti. Rahtji gielav gievrrodittjat.

– Midja maoria lip ham gievras ja fábmogis álmmuk. Midja lip snivuga kultuvrajnimme ja gielajnimme.

– Mielastim gielav jienadij ållu duolla. Suvva ham viehkedin gålmmå bagádalle, gudi buoragit li skierrov jårggålam.



WAIRAKA SUBTSAS MUHTEMA huoman skierrov lájttali.
– Buojkulvissan jæssku manen te reo Māorij ­lávllu, juska ij la iesj maori. Iehtjáda gis lájttali, gåktu jienat ja lávllu.

Ienemusá gåjt de skierrov májnnu.

– Agev ham le suohtas, gå ieŋŋilsgielak musihkav almot te reo Māorij maori giellavahko. Valla hájn vil suohttasabbo le má, gå værálda dåbdos navti dahká, hæjttá Wairaka.

Skierrov almodij gålmmå biejve dán jage Te Wiki o Te Reo Māori, sábmáj maori giellavahko, åvddåla. Ánssidusáv vaddá buorrevuoda­siebrijda «Forest and Bird» ja «Te Hua Kawariki Charitable Trust». Lávllagijt ieŋŋilsis maori-­giellaj li gålmmå giellatjiehpe jårggålam: Tīmoti Kāretu, Hana Mereraiha ja Hēmi Kelly.