Jarkoestæjja: Ellen Bull Jonassen

Katarina lea gohtjesovveme akte dejstie «live-artistijste» Saepmesne gïen stööremes talente. Dïhte musihkem dan jïjnjem eahtsa jïh devverde jïjnjem musihken åvteste jeala, guktie dæjman dïhte Sveerjeste Nöörjese juhti edtja radtjehkåbpoe sov musihkine barkedh.

Daelie aktem jaepiem Oslosne orreme.

Upmejistie juhti

Seenhteiehkeden gosse Š Katarinese ringkie edtja gihtjehtimmiem darjodh. Guktie lea Oslosne veasodh lea akte dejstie teemijste.

Koronapandemijen gaavhtan dïhte vihkeles veeljemen uvte tjåadtjoeji. Tjoeri maam akt darjodh edtja maehtedh musihkine jåerhkedh.

– Heaptoe musihkese jïh munnjien goh artiste sjïdti gosse idtjim maehtieh raastem baahtsedh Nöörjese. Laanteraasth lin steegkeldh guhkiem, jïh dellie ussjedim manne tjoerim veeljedh dam mij lij bööremes åvtese.

Veeljeme aaj vaaltasovvi. Dïhte Upmejistie juhti.

Damta hiejmedajvi gåajkoe arhta

Akten jaepien mænngan Katarina hijvenlaakan tråjjede Oslosne, jïjnjem voelpi jïh barkoeguejmiej gaavhtan.

– Akte dejstie fåantojste man åvteste dan hijvenlaakan tråjjedem lea manne stuerebe nuepiem åådtjeme mov musihkem evtiedidh. Raaktan dïhte joekoen hijven, Katarina jeahta.

Men damta satne ahkedh hïejmedajvi gåajkoe arhta.

– Lij joekoen stoerre sïlle munnjien Oslose juhtedh. Daate voestes aejkien manne Saepmien ålkolen årroem.

– Muvhten aejkien manne tjarke arhtem mov hïejmedajvi gåajkoe, Katarina jeahta, mij aalkoelistie Luspeste båata.

Gosse hïejmedajvi gåajkoe arhta goh ellen vïerremes dellie tuhtjie hijven saemien byjresem Oslosne utnedh. Oslosne gellie saemieh årroeh.

– Jïh gæjhtoe dan åvteste! Joekoen hijven maehtedh jeatjebh staaresne gaavnedidh. Manne lim vielie raessesne orreme jis ij lij devverde dan gellie saemieh Oslosne goh lea, Katarina jeahta.

Persovneles albume

Daelie sjyöhtehke sov mubpie albuminie «Ruhttuo». Albumisnie teemah bæjjese vaalta mah leah gaajhken bïjre goh gieriesvoete, gïelegæmhpoe jïh kultuvreaerpie.

Jïh iktegisth våaroeminie åtna guktie lea noere saemien nyjsenæjja årrodh daan biejjien.

Daate joekoen persovneles albume mejnie guhkiem gïehtelamme.

– Raaktan daelie leam dan madtjele jïh geerjene dïhte olkese båateme!

Aavode orre musihkem darjodh

Albumen nomme aaj soptseste man persovneles dïhte lea sutnjien. Ruhttuo lea gidtjh nomme akten sjïere råhtose mij lea altese hïejmedajvine.

– Manne dagkeres skåajjen lïhke byjjenim. Sïjhtim dam nommem nuhtjedh dan åvteste albume lea dan persovneles munnjien.

Daelie Katarina jieledem niktie fealadimmiejgujmie. Seamma tïjjen aavode orre musihkem vihth darjodh.

Lohkh aaj: Influencere Evelina

Lohkh aaj: Skuvlebïenghkeste skïemtjegåetiebarkose

– Njaelkie domtoe åvtese vuejnedh jïh daejredh daelie orre boelhke mov uvte gosse vihth åadtjoem orre musihkem darjodh.