Portreahtta  |
Forfatter Niels Ovllá Oskal Dunfjell

Renate Andersen Lindseth (23) lea eadneolmmoš ja beakkán sosiála mediain. Kárášjoga nieiddas leat lagabui 70 000 čuovvu Instagrammas. Doppe son almmuha govaid ja filmmažiid vuoiddadeami birra.

Renate lávii mánnán suoládit vuoidasiid iežas stuoraoappás. Dasa ii láven liikot. Muhto son jáhkká ahte oabbá addá ándagassii dan ovddas dál. Dan lea meastta bággu dahkat go oaidná makkár beroštupmi ja čehppodat das ovdanii.

– Mun lean álo liikon vuoidasiidda ja vuoiddadeapmái, muhto dakkár erenoamáš beroštupmi mii mus dál lea, bođii easkka njeallje jagi áigi, dadjá Renate.

Bovdehalai Los Angelesii

Renate hárve vuoidá ámadaju beaivválaččat, earret daid háviid go Instagrammii almmuha govaid dahje filmmažiid.

Muhtomin ádjána lagabui guhtta diimmu vuoidat gárvvisin hámi man háliida čájehit ja juogadit iežas meastta 70 000 čuovvuin.

Dalle gáibiduvvo erenoamášvuohta – ahte loahppaboađus šaddá beanta dáiddan. Ja nu han máŋgga láhkai lea ge.

Ii leat šat dábálaš vuoidama birra sáhka das maid son bargá.

Dan fuomášedje maid vuoiddadanbeakkálmasat Amerihkás. 2018:s bovdehalai son máilmmibeakkán vuoidanmearkka Anastasia Beverly Hills halloweenfestii Los Angelesii.

Renate goasii ii vuolgán dohko.


Renate ja vuoiddadanbeakkálmas Anastasia Soare halloweenfeasttas Los Angelesas. Priváhta govva


Son ballá hirbmosit girdimis. Son ballá nu olu ahte duođai árvvoštalai ruoktot báhcit. Su oabbá vel veđii ahte ii arvva vuolgit.

– Lihkus bessen iežan skihpára, Naja, váldit mielde. Su dihte mun álgen ge vuoidamiin. Dál gal in gáđa. Jurddaš jus in livčče vuolgán!

Los Angelasas beasai duođai vásihit leat starstruck. Feasttas ledje ámmátvuoidit – albma beakkálmasat Renate mielas. Earet eará beasai deaivat Kim Kardashiana vuoidi – Mario.

Loga maid: TikTok-revolušuvdna

Doppe ledje maid olu earát geaid dovddai Instagram bokte – vuoidit geat leat leamaš ovdagovvan sutnje olu jagiid.

– Lei go ártet leat doppe?

– Jo, de lei. Hirbmat ártet! Doppe lei hirbmosit čiŋahuvvon. Ledjen meastta dego filmmas mielde. Lei albma surrealisttalaš vásáhus. Muhtomin in leat áibbas sihkar ahte lea go obage duohta, ahte lean go dušše niegadan, boagusta son.



Jus livččen searvan buot fálaldagaide maid oaččun, de livččen bures dinen. Dalle gal livččen eallinláibbi sáhttán háhkat dás juste dál.

RENATE ANDERSEN LINDSETH


Hilgu olu fálaldagaid

Seammás go lei doppe, de bovdehalai maid searvat YouTube-filmma ráhkadit eará vuoiddadanbeakkálmasain – Nicol Concilioin. Sus leat badjel 800 000 čuovvu YouTubes.

Dán maŋŋel beaggigođii Renate vel eambbo Instagrammas ja oaččui olu eanet čuovvuid.

Go son ráhkadii Instagramsiiddu vuoidasiid váste, de lei sávvan olahit 5 000 čuovvu. Ii goassege lean jáhkkán olahit nu olu go dál leat.

Renate lea hui rámis.

Dál son dávjá bovdehallá lágidemiide olgoriikkas ja oažžu olu eará fálaldagaid. Son hilgu eanas daid.

Filmmas Nicol Concilioin son dadjá ahte šattašii beare divrras mátkkoštit ruoktot ovdan vuoiddadanlágidemiide.

– Mun oaččun muđui olu ruhtafálaldagaid. Dávjá áigot mu oažžut ávžžuhit dihto buktagiid válljet, muhto dalle šattašin rámpot vuoidasiid mat eai datte soaitte nu buorit. Mun livččen šaddan gielistit, ja dan in hálit.

– Mus leat olu nuorra čuovvut geaid livččen váikkuhan.

Dás sáhtát geahččat episode mas Renate lei guossin Nicol Concilioin:



Oamedovdu bisseha

Buohkat eai jurddaš seamma ládje. Dan gal diehtá bures. Muhto sii dávjá gávnnahallet. Alddis ii leat oamedovdu dájuhit earáid, vaikko mearkkaša ahte manaha dietnasiid.

– Jus livččen searvan buot fálaldagaide maid oaččun, de livččen bures dinen. Dalle gal livččen eallinláibbi sáhttán háhkat dás juste dál.

– Livččii gal aŋkke olu áigi mannan vuoidamii ja márkanfievrrideapmái. Livččen šaddat garrasit bargat dietnasa ovddas.

Muhto son ovttasbargá gal Anastasia Beverly Hills, Morphe ja Kylie Cosmetics mearkkaiguin. Sii sáddejit sutnje nuvttá vuoidasiid vai sin buktagiid geavaha iežas Instagram-siiddus.

Juste dat gal lea hui vuogas su mielas. Dalle seastá olu.

– Kylie Jenner lea liikon ja kommenteren vuoiddadangova mas geavahan Kylie Cosmetics buktagiid. Dat lei hui erenoamáš! Son lei okta mu ovdagovain go álgen vuoidamiin.



– Hávski leahkit eadnin!

Amerihkániehkueallá ain. Renate jurddaša duollet dálle su Los Angeles-mátkki birra. Muhtomin fiellada fas dohko. Muhto dat ii leat mii sutnje lea deháleamos.

Son vuoruha vuosttažettiin iežas bearraša.

Su bártnaš Theodor ja ovttasássi Rolf, gii maiddái lea kárášjohkalaš ja geainna lea lohpádaddan, leaba su váimmu lagamusat.

– Leahkit eadnin lea áibbas hávski! Theodor lea máilmmi siivomus. Ovdal go Theodor riegádii, ballen ahte in šat astta vuoidamiin bargat ja Instagram-siiddu doaimmahit. Muhto dat han manná áibbas bures!

Soai leaba irggiin gávcci jagi leamaš ovttas. Soai leaba lohpádaddan, muhto eaba vel mearridan goas heive náitalit koronaáiggiid dihte.

Renate lea aŋkke dilis mas loaktá bures. Son lea nuorran sajáiduvvon ja lea guhká háliidan mánáid.


Unna Theodor ja ovttasássi Rolf leaba Renate lagamusat. Govven: Alvilde Kristiansen Abelsen


Guktii cuovkanan

Muhto ovdal go Theodor riegádii, vásiheigga soai morrašiid. Renate ollii guktii cuovkanit ja massit máná goappaš háviid. Dan válddii son hui lossadit.

Son moraštii guhká.

– Mun válljejin leat rabas dan birra ja almmuhin iežan vásáhusaid sosiála mediain. Dat ábuhii olu. Oallugat čálle munnje ja muitaledje ahte ledje seamma vásihan.

– Sámis oainnat ii leat dáhpi jitnosit hállat priváhta áššiid birra, muhto munnje ábuhii olu.

Muhto dát dagahii maid ahte son ii riekta nagodan illudit go goalmmát geardde šattai áhpeheapmen. Dalle go nuppes lei áhpeheapme, lei lagas skibir ráhkadan juoidá mánnái – mánnái mii ii goassege riegádan.

Son balai seamma geavvat dán háve, ja nu ii duostan muitališgoahtit olbmuide ovdal go ii šat sáhttán čiegadit.

– Olbmot dadjet gal ahte mánná lea buot sihkkareamos eatni čoavjjis, muhto nu in lean mun vásihan. Easkka go Theodor riegádii, arven illudit. Lea eatnis eadnái movt dien gieđahallá.


Renate fiellada fas Los Angelesii. Govven: Priváhta govva

– Vaikko dieđán ahte cuovkaneapmi sáhttá geavvat ja ahte lea lunddolaš oassin eallimis, de čuhcet dát vásáhusat ain garrasit munnje. Mu mielas lea dehálaš hállat dákkár áššiid birra.

Niegada iežas fitnodaga

Dál illuda boahtteáigái ja dasa maid dat buktá. Son lea nagodan irggi fillet Kárášjogas Áltái. Dađi dobbelii ii nagodan vuos, vaikko niehku livččii Amerihká.

Sus leat veaháš oktavuođat dohko dál go lea oahpásnuvvan eará vuidiiguin.

Muhtomin jurddašallá mii eambbo das sáhtášii ovdánit.




– Mu irgi lea lohkan ahte jus miljovdnašiehtadusa oaččun, dalle gal dieđusge šaddat bijadit dohko. Dalle gal máhkaš dohkkešii sutnje šaddat nu gohčoduvvon trophy husband, reaškeha son.

Mihttu boahtteáigái lea ásahit iežas fitnodaga ja eallit vuoidamiin, ja vaikko vel buvttadit iežas vuoidasiid. Logi jagi siste son sávvá maid alddis isida gean soaitá nagodan fillet mielde Amerihkkái.

– Los Angeles livččii stuorámus niehku. Dan gal lea!

Tags:    Renate Andersen Lindseth   •   Sminke   •   Vuoiddadeapmi   •  

Sullásaš lohkamuš