Kultuvra  Sámi iešironiija  |
Forfatter Niels Ovllá Oskal Dunfjell

Dan gal máhtán vástidit, ahte gean bárdni lean. Muhto de jearrala ges mu áhkku ”gean dat duo lea nieida?” …

Mun gulan sin searvái geat eai dovdda olbmuid árbevirolaš namaid. Dan gal ferten dovddastit, ahte in hálddaš dan árbevieru. Dahje gal mun dál soames árbevirolaš nama máhtán. Ja iežan dieđusge.

HALLOO! Dan gal lea bággu máhttit; Mun lean Oskál-Ántte Iŋger-márjjá bárdni. Áhku bealde fas lean Migáš Mihkkila Iŋggá Iŋger-márjjá bárdni. Ii ge das galle, mu áhčči lea lullisápmelaš ja dasto lean mun Dåvnesen Alvaren baernie maid.

HEHEY! Ii hal diet lean bahá ge, oalle čeahppi han mun gusto livččen vástidit jus muhtun jearrá. So far, so good. ”Gean dat duo lea nieida?” jearrala dasto mu áhkku go aviissas oaidná gova. Eh, na …

NA GEAN BAT diet lea ge nieida? Hmm. Divtte mu jurdilit veaháš. Goarggu gal dieđán. Ovdanama maid. Nuppi váhnema nama gal soaittán diehtit, muittán goit makkár lea oaidnit.

DIET GEAS čalbmeláset ja čáhppes vuovttat leat, ja gii dieinna rukses biillain láve vuojašit. Son han mas lávii oahpaheaddjin dalle go mun ledjen nuoraidskuvllas. Juo, son fal! Sáhtán go geahččalit ná áhkkui čilget?

Tevnnet čállis
Oskál-Ántte Iŋger-márjjá Niels Ovllá


JA VAIKKO dál vel dieđášin ge váhnemiid nama, ii hal dat várra doalaše aŋkke. Nieidda áhkuid ja ádjáid namaid han mun maid fertešin máhttit. Várra vel máttarváhnemiid ge. Sin hal mu áhkku dovddašii.

MOVT IPMAŠIID bat mun daid galggašin máhttit! Go vástádus ii boađe, láve jaskat unna bottaža ovdal go de moddjesta ja fas jearrá; “Ii go lean čáppa nieida?”.

Loga maid: Dårligis sámegiella

HÁLIIDA GO rievtti mielde oba ge diehtit gii dat lea nieiddaid? Vai sihkkarastá go dušše ahte MUN dieđán gii dat lea, jus dette …

Tags:    áhkku   •   hearvačálus   •   Nuoraidmagasiidna   •   Š   •   sámi humora   •   sámi iešironiija   •   sámi namat   •   ungdomsmagasin   •  

Sullásaš lohkamuš