Niels Ovllá le Š:v dåjmadam jage 2012:e rájes, valla dálla le suv muddo bargov joarkedit nubbáj ja vuolgget ådå hásstalusájt åtsåtjit.

– Dát Š:a nummar le duv maŋemus vásstediddje dåjmadiddjen! Majt ussjola?
– Iv gåjt boahttu ålles identitæhttaniedaj, ájnat ussjolav má Š le årrum stuorra oasse muv identitehtas ja iellemis. Dán ga bále de mielastim hiehpá dálla hivástahttalit. 

– Dån lidji 20-jagák ja studænnta, gå álggi dåjmadiddjen. Gåktu lij mielastit dalloj? 
– Vuostak jáhttiv nåk avtav nummarav buvtátjit, valla maŋŋela munji fállin sadjásasj bargov ålles jahkáj. Ittjiv másja, vaj de lágediv bargov, vájku dalloj lidjiv ållesájge studænnta. Dallutjis de lav Š:n barggam ájnat dal jagev permisjåvnån. Mielastim de juojddá ådåsav gætjo ájgev åhpav. 

– Gåktu le Š duv mielas ietjájduvvam, gå dån la dåjmadiddjen barggam? 
– Mån gåjt vuojnáv nuorra sáme li dálla vuojnnusin ienebut gå goassak åvddåla. Sij li åvddågåvå musihka, suohttasij, politihka ja moatte ietjá ássje hárráj. Dávva lav gæhttjalam vuosádallat dåjmadiddjen bargadijn. Mån lav gæhttjalam sijáv tjalmostahttet, dagu le duolla. 

– Na sáme nuoraj hárráj? Le gus sij ietjájduvvam? 
– Tjåvdabáhko le sosiála medijá. TikTok ja Instagram nåk buojkulvissan. Ælvvám lav nuoraj medijádábe li ietjájduvvam. Årrus ham de boahtte dåjmadiddje dahkamussan huomahit, gåktu Š:v luluj dán hárráj hiebadit. 

– Ma li duv buoremus biehke bargos Š:n? 
– Gájk åvdemusán de lav moaddásijda oahpástuvvam. Ienep rádnajt ja oahpes ulmutjijt ham mujtáv åvddålij guovlluj. Valla ållu sierra láhkáj miellagiddis le guorrat ulmutjijt, gejs lip tjállám. Moaddása lidjin esski álggemin, gå sijás tjálijma, valla maŋŋela li vuorbástuvvam ja niegov ållim. Dat arvusmahttá.

– Na, ållu ietjá ássjáj gis dal! Áttjak dán jage Sáme Grand Prixa juojggamgilppusav vuojtti juojgajn “Sávrrimus”. Ållo vuorbev! Gåktu lij vuojttet? 
– Edna gijtov! Almma hávsske lij vuojttet. Ittjiv rat duosta doajvvot vuojttet luluv, gå állis vuostasj bále juojggiv jali lávlluv gulldaliddjijda. Garra gilpos lij má aj. Valla musihkajn galla ájgov ienebuv barggat. Studion lav juo manádam, vaj ienep lávllaga maŋenagi båhti namájn OSCAAL.  

– Le gus gárves Š:v hivástahtátjit? 
– Iv buvte jáhttet iv gåvvitja jali tjálitja vehik Š:j boahtte ájge, valla dálla ussjolav gárves lav ietjá ássjijt aj dagátjit. Ålov gijtáv, gå bessiv Š:n barggat ja oadtjuv máhttelisvuodav dalloj akti ájgenim. Gijtov! Hálvva imáj le galla, valla diedáv má magasijnna jåhtå jasskis giedajda.