Mii leat Fredriksborg heastasportaguovddážis Sarpsborgas Mátta-Norggas. Beaivváš lea goardimin ja olgun lea galbma čakčaáibmu. Čakčamánnu lea loahpa guvlui mannamin.
  
Norgga buoremus riidejeaddjit leat čoahkkanan deike. Buohkat lea stálja siste ráhkkaneamen gilvvuide. Sin gaskkas čuččoda sámenieida Ella Celine Schanche Dalseng, bárgideamen iežas ponni Casino.

 

Su vuosttaš heasta

Vaikko lea olu mii geavvá birra ja buohkat leat hárjehallamin prográmma man galget riidet odne, de lea Ella Celine liikká fokuserta. 

Kárášjoga nieida ovddasta Jarlsberg ja Melsom riidensearvvi ovttas guvttiin eará nieiddain.

– Mun lean speanta. Sávvamis manná bures jo liekkadeamis vai sáhtte buriin dovdduin gilvalit go munno vuorru šaddá, moddjá Ella Celina.

Casino lea Ella Celine vuosttaš heasta. Dan son lea eaiggáduššan golbma jagi.

– Casino lea hui fiinna vuosttaš heasta leamaš. Das lean hui olu oahppan dáid jagiid, dadjá Ella Celine.

 

Ii beasa dálvet hárjehallat

Dat ahte son lea dán vejolašvuođa ožžon, ii leat soaittáhagaid duohken. Son lea olu áiggi ja návccaid bidjan hárjehallamiidda iežas ponniin. 

Ella Celines lea maid áibbas eará vuolggasadji leamaš go dain eará riidejeddjiin. 

Ruovttubáikkis Kárášjogas ii leat riidenhálla gos dálvet beassá hárjehallat, ii ge sus leat hárjeheaddji gii lea fysalaččat doppe oahpaheamen su. Son gulahallá hárjeheddjiin telefovnna bokte go ieš riide Kárášjogas.

Buohkat earát máddin lávejit ođđajagemánus álgit ođđa sesoŋŋain. Ella Celine ii láve beassat johtui boahtit ovdal miessemánus–geassemánus, olles njeallje mánu maŋŋel go earát.

Lahkosis čuččodeaba Ella Celine váhnemat. Soai leaba álo mielde doarjumin su.

– Sudnos Casinoin lea leamaš miellagiddevaš sesoŋŋa. Šaddá somá oaidnit mo dál manná sudnuin, dadjá Ella Celine eadni, May-Helen.

Ella Celine váhnen guovttos leaba ge čuvvon su álggu rájes. Soai diehtiba bures man olu áiggi buohkat leat bidjan dán olahit.

Manná han olu áigi vuodjit heasttavovnnain Kárášjogas máttás vai Ella Celine beassá hárjehallat buoret birrasis iežas hárjeheddjiin fárrolaga, ja maiddái gilvalit. 

Dán vahkkoloahpa orodit sii viessobiillas olggobeale stálja.

 

Álget bures

Ella ja Casino boahtiba bána ala ja ságastallan etniin gaskkalduvvá. Dál lea sudno vuorru gilvalit. Ella Celine riide duopmára guvlui su dearvvahit ovdalgo álgá riidet. Váhnen guovttos ja hárjeheaddji čuvvot dárkilit mielde.

Orru mannamin bures.

Vuosttaš riidemis manná buorebut go maid Ella Celine lei vuordán. Son oažžu 63.009 % boađusin.

Dál leat buohkat Ella Celine joavkkus gilvalan. Sii leat gaskaboddosaččat njealjádin maŋŋel vuosttaš beaivvi.

– Dál lea plána bures ráhkkanit ihttá beaivái vai mii nagodat oažžut vel buoret bohtosiid, lohká son.

 

Mii lea heastadápman?

Nubbi ja maŋemuš beaivi Norggameašttirgilvvuin lea álgán. Ella Celine ja su váhnemat leat árrat lihkkan ráhkkanit gilvvuide. Stállas lea jaskat ja ráfi.

Ella Celina lea bárgideamen Casino. Su áhčči veahkeha ráhkkanemiiguin.

– Son riidii okte ikte ja galgá vel odne riidet okte, dadjá Ella Celine áhčči, Morten ja lasiha:

– Ii leat jur álkimus prográmma man galgá muitit go odne riide.

 
Heastadápman oainnat fátmmasta olu. Duopmárat árvvoštallet sihke heastta jegolašvuođa, lášmatvuođa ja fysihka. Sii árvvoštallet maid riidejeaddji ja heastta oktavuođa ja gulahallama.
 
Prográmma man riidejeaddji galgá muitit, mielddisbuktá earret eará dihto lihkastagaid maid sihke son ja heasta galgaba čađahit riidenvuorus ja man ovddas oažžuba čuoggáid.

 

Nubbi gilvovuorru

Áigi hurggiha ja nu lea Ella Celine vuorru fas gilvalit. Váhnen guovttos ja hárjeheaddji leat jo čuožžumin bána luhtte vuordimin Ella ja Casino. 

– Dat lea oalle olahus nie nuorran oassálastit Norggameašttirgilvvuin. Dat muitala man miellagiddevaš boahtteáigi sus lea, dadjá Ella Celine hárjeheaddji, Thea Katarina Bråten.

Ella Celine ja Casino boahtiba bána ala ja čađaheaba prográmma, muhto ii oro mannamin nu mo galggašii. Son oažžu bohtosa 60.883 %, ii ge leat dainna nu duhtavaš.

– Dovden jo go leimme liekkadeamen, ahte ii lean nu mo galgá, dadjá Ella Celine behtohallan. 

– Muhto seammás lea dát vásáhus man áiggun váldit oahppun.

 

Boahtteáigi

Bohtosat dán vahkkoloahpas leat viimmat čielgan. Ella Celine ja su joavku Jarlsberg ja Melsom riidensearvi vuite bronsamedálja Norggameašttirgilvvuin.

– Dát gal lei somá! moddjá Ella Celina.

Dál vuordá guhkes mátki ruoktot fas.

Mii guoská boahtteáigái, de ii leat nuorra riidejeaddjis čielga niehku gal. Dál lea Ella Celine mihttu vuos áŋgiruššat ponniin ja heastadápmamiin dassá deavdá 16 jagi, ja olahit nu guhkas dainna go nagoda. 

Go dan maŋŋá lea son menddo boaris gilvalit ponniin, ja ferte álgit dábálaš heasttain riidet.

– In leat vuos sihkar áiggun go álgit dábálaš heasttain gilvalit go dat áigi boahtá. Dainna mearrádusain in gal vuos stresse go mun lean nu nuorra dál, loahpaha Ella Celine.