Kultuvra  Sámi iešironiija  |
Forfatter Niels Ovllá Oskal Dunfjell

Muhtumin dušše áibbaša eará sadjái ja gávnnahallá vel.

Mun čohkkádan ja jurddašan maid dán háve galggašin čállit, muhto čalmmit ohcet kantuvraláse ja ohcalit stuora máilmmi mii dan duohken lea.

II, DÁS FERTEN dollet iežan niskái ja … ah, báhkkasis lieggariikkas – jurddaš jus mun doppe!

FUOM! Dás rájes áiggun dollet iežan niskái ja fokuseret!!! Atte juo ándagassii. Ferten vuos hutkat mielamiel fáttá, ja dasto … mearračáhci, njálgga borramušat, láikkohallan … HEI! Mun han lean čállime in ge njaŋgáme sáttogáttis Greikkas dahje gos nu! Dál ferten heaitit eret.

MUN FERTEN baicca viežžalit sátnegirjji ja gávdnat čaffadis sániid main ráhkadan dán hearvačállosa. Jus mun bláđestan veaháš …

JUO, DÁL DE gávdnen: áfáiduvvat, beaivvádat, beaivvášsuddjenláset, beaivvášsuddjenvuoiddas, cerveza, vuoiŋŋasteapmi, souvlaki, parasolla … vuorddes mat, gávdnen go buot dáid sániid seamma sátnegirjjis?! Vai lean go obage sátnegirjji lohk … hearvái. Šállošan! Diet ii galgga šat geavvat.

Tevnnet čállis
Niels Ovllá Oskal Dunfjell


DON IT galgga šat dárbbašit mu áibbašemiid ja beaivenieguid birra lohkat. Dál in áiggo šat fielladit, mun lohpidan.

MUHTUN BEIVVIID dieđusge eatnasat dahkat dan, ja dat lea lohpi nu guhká go gárvet bargguid. Jurddašin dušše ahte namuhan dan (vai mu bargoaddit eai doaivvo ahte dušše hommen dakkáriid).

JÁHKÁN buoremus lea loahpahit ja čálligoahtit fas go miella ja jurdagat ovttas barget. Cealkkán dearvvuođaid dáppe lieggariikkas … eh, mu liegga kantuvrras! Fasttat dette!

Tags:    fielladit   •   hearvačálus   •   lieggariikka   •   Nuoraidmagasiidna   •   Š   •   sámi iešironiija   •   ungdomsmagasin   •  

Sullásaš lohkamuš