Kultuvra  |
Forfatter Lávre Johan Eira | Språk/Giella: language Norsk

Skïereden 2020 studeentesiebrie Studeenth Åarjeldajvesne (SÅD) tseegkesovvi. Jalhts jïjnje vuestiebïegke orreme koronan gaavhtan ståvroe daelie tjaktjese aavode orre nuepiejgujmie.

Les saken på norsk her.
Åarjelsaemien gïelese: Ellen Bull Jonassen

Mijjieh mubpieåvtehke Olena Hættam (20) Guovdageaidnuste jïh ekonomijen tjåadtjoehtæjja Ramona Kappfjell Sørfjellem (23) Sïebneste gaavnedibie Zoomen tjïrrh.

Olena aalka sov dååjresen bïjre soptsestidh goh Noerhte Universiteetese Lievengisnie båetedh, bielelen maam akt sijjien jallh almetji bïjre desnie damtedh.

– Gosse diekie böötim daan tjaktjen, dellie lij numhtie: «Okej, vuajnam saemien tsïeglh daesnie». Men idtjim daejrieh mejtie lij saemieh daesnie, jïh gusnie edtjim dejtie gaavnedh, Olena jeahta.

Olena eajhnadovvi maam jïjtje daejnie darjodh jïh gaskesem veelti raeriestæjjine, mij satnem raeriesti gaskesem vaeltedh åarjelsaemien lohkehtæjjastudijen koordinatovrine mij tjåanghkoem jeatjah saemien studeentigujmie öörnedi.


Soptsestimmien gaavhtan studeentesiebrie sjïdti

Olena soptseste gosse dah voestes aejkien gaavnedin, dellie tjahkan sjïdtin soptsestidh golme, njieljie tæjmoeh jïh vihtiestin lij murreds orreme studeentesiebriem aelkedh.

– Mijjieh sïjhtimh aelhkebe darjodh dejtie mah sijhtieh gaskesem åadtjodh jeatjah saemiejgujmie, men mah dagke eah doesth raeriestæjjine gaskesadtedh, Olena jeahta.

Olena Hætta
Olena Hætta. Guvvie: Privaate


Ramona soptseste dah mah åarjelsaemien lohkehtæjjaööhpehtimmesne eelkin dæjman, leah guhkiem ussjedamme studeentesiebriem aelkedh.

– Mijjieh åssjaldahkine utnimh dagke aktanidh dejnie julevsaemien lohkehtæjjaööhpehtimmine Bådåddjosne. Men gaavnehtimh mijjieh voestegh tjoerimh studeentesiebriem aelkedh Noerhte universiteetese Trööndelagesne, Ramona jeahta.

Lohkh aaj: Samiske veivisere: – Et spennende år

Korona mijjem tjöödtjeste

Dovne Olena jïh Ramona læjhkan tuhtjieh lij luste orreme aktem tjåenghkies saemien studeentesiebriem buektiehtidh.

– Mijjen minngebe ulmie, gosse mijjen studeentesiebrie lea aalkeme juhtedh, lea abpe Noerhte Universiteetem iktedidh.

Darjomigujmie nïerhkedh lea stoerre haesteme orreme koronatsiehkien gaavhtan.

Ramona Kappfjell Søefjell
Ramona Kappfjell Sørfjell. Guvvie: Niels Ovllá Oskal Dunfjell


– Siebrine aelkedh lea aelhkie orreme, men tjïrrehtidh lea vïerrebe. Fïerhten aejkien mijjieh libie maam akt soejkesjamme, dellie njoelkedassh faahketji striengkiesåbpoe sjïdteme. Jïh dellie ibie nuepiem åtneme dam tjïrrehtidh. Numhtie orreme gellien aejkien, Olena jeahta.

Daelie studeenth lissine bïevnesem åådtjeme abpe ööhpehtimmie tjaktjen raajan sæjhta digitaale årrodh.

– Joekoen slæjhtoes orreme, juktie mijjieh hov vaajtelibie almetjh råakedh jïh almetjigujmie åahpenidh. Daelie ibie maam utnieh mïsse maehtebe aavoedidh, juktie iktesth ussjede: «jis mijjieh maam akt soejkesjibie, dellie sån ij mejtegh destie sjïdth.» Jïh maaje ij mejtegh destie sjïdth, Olena jeahta.

Laavenjostoem sæjhta

Studeentesiebrie læjhkan åvtese vuajna jïh stoerre syjhtedassh åtna dïsse maam sijhtieh tjïrrehtidh.

– Mijjen ulmie lea baajedh årrodh ajve golme aath utnedh mejtie maehtebe aavoedidh abpe jaepien, goh goevten 6. b., gaptabiejjie jïh gïelevåhkoe.

– Sïjhtebe aaj mijjieh maehtebe darjoemidie aavoedidh goh jåvlebuertie, gïele- jïh kultuvreprïhtjhgåetie, hæhtjosne mïnnedh jïh duedtie-iehkedh. Gegkiestibie mijjieh maehtebe dejtie darjoemidie tjïrrehtidh tjaktjen raejeste, Olena jeahta.

– Aaj gegkiestibie mijjieh maehtebe siebrine Saemien Studeenth Tråantesne laavenjostedh, guktie maehtebe stuerebe öörnemh tjïrrehtidh, jïh saemien studeenth daamtajåbpoe tjöönghkedh, Ramona lissehte.

Laila Louise Hengzhi Joma Rustad
Laila Louise Hengzhi Joma Rustad. Guvvie: Privaate
Maajja-Krihke Bransfjell
Maajja-Krihke Bransfjell. Guvvie: Privaate


SÅD viehkehte

Mijjieh vielie SÅD:n soejkesji bïjre soptsestibie, jïh ij leah naan juerie jïjnje gïeltege lea vuertiemisnie, dan varke korona dam luhpehte.

Minngemes Ramona tjïelke haestemem åtna dejtie mah eah rikti daejrieh maam edtjieh tjaktjese darjodh:

– Jalhts ohtsememierie lea nåhkeme, maahta gujht syökedh dejtie sijjide mah aajmene sjïdteme dejnie saemien lohkeminie. Jis dam sïjhth, dellie mijjieh SÅD:sne dijjem ræhpas gïetigujmie dåastoehtibie.

Tags:    Levanger   •   Nord universitet   •   Š   •   SÅD   •   Samisk studenforening   •   Sørsamisk   •   Studeenth Åarjeldajvesne   •   ungdomsmagasin   •  

Sullásaš lohkamuš