Maid barget ofelaččat?

Sámi ofelaččat leat studeanttat Sámi allaskuvllas Guovdageainnus. Ofelaččat váldet Sámi kultur- ja servodatmáhttu-fága, mii lea intensiivakursa mas ožžot 30 oahppočuoggá. Dasa lassin ožžot vel 30 oahppočuoggá logaldallandoaimmas. Sámi ofelažžan don oaččošit 60 oahppočuoggá, mii deavdá olles skuvlajagi.

Ofelažžan šattašit olu mátkkoštit, go logaldallamiid ferte doallat ohppiide skuvllain miehtá riikka. Hárjánat ráhkadit ovdanbuktimiid ja hállat unnit ja stuorát joavkkuide.

Jus háliidat oahpásmuvvat eambbo ofelašdoibmii, de oza dieđuid sin neahttasiiddus.

 

Nuorat hástet sámi nuoraid ohcat ofelažžan

– Jahki ofelažžan lea leamaš hui somá ja muhtumin gáibideaddji, lohká Benedikte Eriksen. Son muitala ahte sii leat deaivan diehtoáŋgiris ja movttegis ohppiid go leat johtán ja muitaladdan sámi servodaga birra.

– Olbmot navdet sámi leat religiovdnan, imaštallá Mathis Eira, gii maŋimuš jagi lea leamaš sámi ofelaš. Lea ollu diehtemeahttunvuohta sámi servodaga birra, de sámi ofelaččain lea dehálaš bargu dieđuid sámiid birra biđget norgga nuoraide. Dan láhkai eastadat ovdagáttuid ceaggamis ja unnidat mobbema. Ofelaččat movtiidit buori barggu bargat ja oahpahit nuoraid sámiid birra. Dáinna bargguin hástalat iežas go duosttat muitalit mo lea eallit sápmelažžan.

Ofelašdoaibma lea addán nuoraide eambbo go logaldallamiid ja skuvllaid galledeami. Sii leat fitnan New Yorkkas ONa galledeamen. Doppe deive eará álgoálbmotnuoraid ja oahpásmuvve sin kultuvrraide, beroštumiide ja mo sii čovdet áššiid stuorraservodaga ektui.

Go leat njeallje sámi nuora iešguđege báikkis eret, de ohppet maiddái ollu nubbi nuppis. Sii namuhit earret eará boazodoalu ja julevsámegiela. – Mii bargat ovttas jagi birra, oaidnalat juohke beaivve ja oahpásmuvvat bures, muitalit ofelaččat.

– Jus muhtumat háliidit vásihit earálágan skuvlajagi, de ávžžuhan sin ohcat ofelažžan, dadjá Ole Christer Hætta. Son muitala ahte jahki ii šaddan nugo son lei vuordán, govvida baicca jagi jáhkemeattumin. – Šattat vuoruhit áiggi ofelažžan leat, ja duvdit eará beroštumiid eret.

– Jus liikot mátkkoštit ja olbmuiguin hállat, de lea ofelašdoaibma dutnje bargun, loahpaha Mathis Eira.