Jarkoestæjja: Ellen Bull Jonassen

Don biejjien gosse Nora-Cathrin Duorra Sparrokem (21) gaavnedibie lea abredh­vearelde dennie onne staaresne Rørvik Trööndelagesne.

Dïhte Snåaseste båata, gusnie fuelhkesne byjjeni bovtsigujmie jïh hierkine.

– Mijjieh hierkiem Lukas utnebe, jïh bovtsh dovne Nöörjesne jïh Sveerjesne.

Mov voestes gyhtjelasse lea hævvi mejtie hierkiem båatsosne nuhtjieh.

– Lij joekoen luste orreme hierkiem båatsosne nuhtjedh, men eatnemen jïh laanten gaavhtan Skæhkarisnie ij mahte gåaredh gænnah.

Nora-Cathrin soptseste fuelhkie læjhkan pryöveprosjektine utni hierkiem båatsosne nuh­tjedh Jijnjevaeresne sveerjen bielesne.

– Dellie vïellebe Dan Jonas jïh manne dan onne, guktie ean månnoeh dan jïjnjem destie mujhtieh. Men Jijnjevaerie lea sagke plïehtjebe goh Skæhkere, guktie desnie sån buerebelaakan gåaradi hierkieh nuhtjedh goh nöörjen bielesne.

NORA-CATHRIN lea Rørvikesne orreme 2020 raejeste gosse altese ektieårroje faageskuvlesne eelki. Jalhts desnie tråjjede, soejkesje ij leah desnie årrodh abpe jieledem.

– Manne hov sislaantesne byjjenamme, guktie damtem manne dejtie eensi daelvide jïh råhtojde Snåasesne ohtselem.

Mearoegaedtie lea naa ovnohkens orreme Nora-Cathrinese, nov amma abpe jieledem.

– Abpe mov fuelhkie lea sislaanteste. Men gosse mïelehkem Brønnøysundeste gaavnim, dellie lïhkebe böötim mearoegaedtiem, Nora-Cahtrin föörhkede.

Ij leah voestes aejkien Nora-Cathrin jeatjah byjreskinie orre goh Snåase.

Gosse lij 16 jaepien båeries staarese Drammen juhti. Desnie åadtjoeji joekehtsem saemiej jïh daaroej gaskem damtedh.

– Manne hov joekehtsem damtim. Jalhts voelph gaavnim mejgujmie akteraeresne sjïdtim, dle såemieslaakan idtjim åadtjoeh jïjtjemem årrodh ellieslaakan.

Dïhte tjïelkeste ij lij iktesth dan aelhkie sov hïejmedajvi jïh vuekiej bïjre soptsestidh, dan åvteste altese voelph idtjin daajroem dan bïjre utnieh.

– Jis læjhkan mov hïejmen bïjre soptsestim, dellie jallan naan vaastahtahkem åadtjoejim mov voelpijste. Dagke idtjin daejrieh maam edtjin jiehtedh, dan åvteste daate lij dan ammes dejtie.

GOLKEN P3 aktem tjaalegem 17 jaepien båeries Jone Kappfjellen bïjre bæjhkoehti, mij damta satne tjuara sov saemien bieliem tjïekedh. Daate lea naakede maam Nora-Cathrin aaj damtije.

– Manne gujht iktegisth saemine domtem, ij leah naakede maam maahtam jallh sïjhtem jeatjahtehtedh. Men hævvi im dam tjåarvoeh daarojde. Goh Jone jeahta, ij dagke dan hijven domth saemine årrodh iktesth.

– Men saemiej gaskem maahtah jïjtjemdh årrodh ellieslaakan. Dellie jïjtjedh almetjigujmie ektine, jïh dijjen leah seamma åssjaldahkh jïh seamma aarvoeh. Dagke dellie manne damtem manne bööremeslaakan slaajperdem.

Jalhts gellie ov-mealoes almetjh Drammenisnie råaki, dle soptseste satne ij daarpesjh dan gåhkese vuelkedh åvtelen vihth gellie ov-mealoes almetjh råaka.

– Manne govlem jeenjesh joekoen vaenie maahtoem saemiej bïjre utnieh, jïh goh saemie dellie gujht gellie gyhtjelassh åådtje.

Seamma tïjjen dïhte dååjreme aaj jeenjesh mah eah doesth gihtjedh, dan åvteste eah daejrieh man bïjre gihtjedh.

– Provhkem jiehtedh bööremes lea gihtjedh, dellie maahtam vaestiedidh, guktie almetjh eensi vaestiedassem åadtjoeh dïsse mïsse onterdieh.

NORA-CATHRIN soptseste daate jaepie mij daelie lea nåhkeminie, lea joekoen varke vaaseme.

– Jaepie joekoen hijven aalkovem åadtjoeji, juktie vueptiestim manne lim nåajsan tsïengelen. Men aaj hierkine jïh skuvline gïehtelamme seamma tïjjen.

Dïhte soptseste satne såemies vaejvieh åtneme dan åvteste lij nåajsan, men ij goh unnemes aavoedamme tjidtjine sjïdtedh daan jaepien.

– Gaajhkesåarhts domtesh åådtje gosse dejtie göökte sïevide teestesne vuajna. Manne domtesinie utnim manne lim nåajsan, men seamma tïjjen idtjim dam jaehkieh.

Nora-Cathrin jïh ektieårroje læjhkan eajhnadovvin ij mejtegh darjoeh teestem vaeltedh.

– Manne teestem veeltim aereden, mearan mov ektieårroje seangkosne gællasji. Gosse illedahkem vööjnim, dallatjinie vaarri dam gåaskoeji jïh jeehti dïhte tjoeri laavkometjiehtjielasse båetedh. Mijjieh joekoen aavone sjïdtimh.

Men soptseste fïnkesi åvtelen rïektesisnie dam guarkaji.

– Ånnetji veesi åvtelen raaktan nåajsan domtim. Jïh dellie lij ajve dïsse ryöjredidh. Rïektesisnie gujht uktsie askh åtna ryöjredidh.

JALHTS JEENJESH mah edtjieh tjidtjine sjïdtedh dagke kråvvadieh baersieldidh, idtji Nora-Cathrin dam darjoeh.

– Idtjim bïllh baersieldidh. Manne lim dïsse ryöjredamme jïh raaktan dïsse aavoedim.

Dïhte dan jïjnjem baersieldæmman aavoedi guktie tsegkietnie gihtji mejtie deejri baersieldidh lij bååktjehke.

– Dellie vaestiedim «jaavoe, daajram båata baektjiedidh». Dïhte sån vïenhti manne sjelhkiedim gosse jeehtim manne aavoedim.

BAERSIELDIMMIEN ÅVTELEN Nora-Cathrin pryövi gaajhkesåarhts baersieldimmie-heanna­dimmide ryöjredidh.

– Manne pryövim ryöjredidh baektjiedæmman. Men seamma tïjjen ussjedim gaajhkesh dovnesh baersieldimmiem joekehtslaakan dååj­roeh, jïh ij akt daejrieh guktie baersieldimmie sjædta.

Maajetjh baersieldimmie hijvenlaakan gåaradi. Skïereden minngiegietjesne Nora-Cathrin jïh ektieårroje meehtigan onne nïejtem buerie båeteme veartanasse vaajtelidh.

– Baersieldimmie lij akte tjarke dååjrese, jïh lij joekoen bååktjehke. Men rovnege lea, baersiel­dimmien mænngan dellie gaajhkh vaerhkieh jïh vaejvieh gaarvanin, faahketji lim gaajhkem åajaldamme.

Nora-Cathrin soptseste jalhts satne baersieldæmman aavoedi, dle ektieårroje kråvvadi.

– Dïhte tuhtji lij nåake vuejnedh mov lin dan tjarke vaerhkieh. Men lij joekoen sjïere dååjrese gosse nïejtem njamman nille åadtjoejim. Mijjieh limh vuarteme uktsie askh nïejtem råakedh, guktie mijjen tjelmieh gïknjeldovvin.

DAELIE Nora-Cathrin tïjjem nuhtjie tjidtjie­jieledem ellieslaakan niktedh.

Mubpien jaepien ussjede skïemtjesåjhtere­lohkemem aelkedh.

– Manne iktesth nïekedamme tsegkietnine sjïdtedh. Åssjaldahke lea skïemtjesåjhtere Bachelorem vaeltedh jïh dan mænngan maasterem vaeltedh tsegkietniefaagesne.

Ij tjoeperdh altese maana edtja heaptojne sjïdtedh sov ööhpehtæmman.

– Daajram manne tjoerem jïjnjem sjïehteladtedh gosse maanam åådtjeme. Men aaj daajram nov gujht daate hijven gåarede. Men ånnetji jueriedisnie mejtie edtjem jïlleskuvlesne vaedtsedh jallh bielietïjjen lohkedh jïh lissine barkedh.

Men ij daarpesjh dïsse dan tjarke ussjedidh annje.

– Daelie mov biejjieh leah raajhpesemålsome, njammehtimmie, våågnine vaedtsedh jïh ij goh unnemes pryövedh sjeakodh gaajhken gaskem, Nora-Cathrin minngemes jeahta.
Nora-Cathrin Duorra Sparrok

• Reakadamme 08.04.2000

• Snåaseste

• Ööhpehtimmiem vaalteme goh healsoefaagebarkije, men lea daelie tjidtjie mij gåetesne höölleste

• Nora-Cathrinen aarebi nomme lij Danielsen Sparrok, men Danielsen målsoeji nommese Duorra juktie maadteraahkam Elin Anna Duorra earoehtidh.
• Nora-Cathrin seangkoevaarjoeh eahtsa jïh nov gujht daajra magkerh seangkoevaarjoeh satne sæjhta nuhtjedh.
• Nora-Cathrin gaajhkem eahtsa mij spaajhte jåhta jïh lea gieltege, jïh maaje aath motovrine.
• Nora-Cathrin jeahta satne beapmoem dan jïjnjem eahtsa guktie ij gåessie gih lij maahteme ajve aktem beapmoem veeljedh maam edtji byöpmedidh ihkuven aajkan.
• Nora-Cathrin lea Daniel Mortenssonen maadtermaadteraajjove, mij lij redaktööre jïh tseegkije plaereste Waren Sardne, lij akte dejstie pioneerijste åarjelsaemien organisasjovnebarkosne.