Vuodjantaleanta Sandra
Portreahtta
Sporta
|
Niels Ovllá Oskal Dunfjell
Elle Norvang
Kárášjoga nieida Sandra Maria Balto (15) lea Norgga falimus vuoddji iežas ahkeluohkás. Su áigumuš livččii beassat máilmmi buoremusaid searvái.
Sandra lea boahtán ruoktot norggameašttirgilvvuin Stavangeris go mii humadit suinna. Doppe fiškalii silbba 50 mehter butterfly-vuodjamis juniorluohkás, ja buriid bohtosiid eará surggiin maid. Vaikko vel gilvaleaddjit leat máŋga jagi boarráseappot go ieš.
Dasa lassin kvalifiserii son maid guovtti seniorfinálii.
Dain bođii 5. ja 6. sadjái. Ieš lea dušše 15-jahkásaš ja jo Norgga buoremusaid searvvis.
Nuoraidmeašttir
– Mun lean muhtun muddui duhtavaš, muhto livččii maid sáhttán mannat buorebut, lohká Sandra go jearrat bohtosiid birra.
Vuhtto bures ahte Sandras leat alla gáibádusat alcces. Nu fertejit maid jus háliida šaddat buoremussan.
Go dan gal háliida.
Golggotmánus šattai norggameašttirin nuoraidluohkás (13-15-jahkásaččat). Dál vuittii silbba juniorluohkás ja beasai vel seniorluohkás gilvvohallat.
Son ovdána dađistaga.
Diibmá álggii buot hárjehallan duođai boahtit ávkin. Vaikko lea álo leamaš oalle čeahppi, nu movt ieš lohká, de easkka diibmá vuoitigođii gilvvuid.
Dalle son ipmirdišgođii ahte gusto lea vejolaš lihkostuvvot jus fal bargá garrasit dan ovddas.
Lihkká viđa áigge iđđes
– Mus livččii niehku šaddat máilmmimeašttir ja Olympia Gilvvuid vuoiti. Dan ovdii mun hárjehalan, lohká Sandra.
Ii ge son dájo.
Sandra hárjehallá 21 diimmu vahkus. Árgabeivviid lihkká viđa áigge vai olle hárjehallat ovdal skuvlla.
Sullii diibmu 05:40 lea vuojadanhállas.
Dan eai daga galle eará nuoraidskuvlaoahppi. Muhto jus háliida šaddat nu čeahppin go vejolaš, de ii leat eará ráđđi.
– Muhtumiid mielas gal lean dieđusge áibbas jalla go nu árrat lihkan hárjehallat, muhto vuodjat lea maid háliidan bargat, dadjá son ja lasiha:
– Mun lean ná árrat lihkkan golbma maŋemuš jagi.
Ii astta eará doaimmaiguin
Dušše lávvordagaid váldá friddja. Dalle ii hárjehala. Dađistaga go ain ovdána, de áigu hárjehallat eambbo ja eambbo.
Dál ii astta ge šat eará astoáiggedoaimmaiguin. Ovdal lávii dánsut ja čiekčat spáppa maid.
Sutnje lea dehálaš fokuseret vuodjama.
– Manne vuodjan geasuhii du?
– Dat dušše šattai nu. Eadni dat válddii mu mielde vuodjankursii go ledjen mánáidgárdemánná. Go 1. luohkkái álgen, de ledjen áidna gii máhtten vuodjat. Dan rájes lean liikon vuodjat.
Mihttun beassat riikkajovkui
Butterfly lea šaddan Sandra jiellat vuodjansuorgi. Dán suorggis son lihkostuvvá buoremusat.
Buriid bohtosiid dihte lahkonišgoahtá juniorriikkajoavkku.
Dat livččii lunddolaš lávki sutnje dál.
Min SoMe-journalista lea jearran Sandras logi gažaldaga duon dán birra. Geahča TikTok-video dás:
– Mun sávašin goit boahtte jagi mielde beassat juniorriikkajovkui. Dat lea mu váldomihttu juste dál, dadjá Sandra.
Dađistaga leat sus eambbo ja stuorát mihtut ja niegut maid ollašuhttit.
Áiggošii lulás fárret
Go nuoraidskuvllas geargá, de áiggošii ohcat joatkkaskuvlii Bærumii Oslo olggobealde.
Doppe lea okta Norgga buoremus vuodjanlinjjáin. Dohko lea okta su vuodjanhárjeheddjiin ávžžuhan ohcat.
– Dus dáidet doarvái buorit bohtosat ja árvosánit beassat dohko sisa?
– Jo, nu orrot leamen. Dan ovdii barggan goit dál.
Sandra mielas orru issoras fárret nie guhkás ja akto orrut, muhto seammás lea vuodjan mainna háliida lihkostuvvat.
Dalle ferte vuoruhit.
– Mun lean ráhkkanan hárjehallat ja bargat garrasit. Dan ferten dahkat jus háliidan olahit iežan mihtuid.
