Portreahtta  |
Author Niels Ovllá Oskal Dunfjell | Språk/Giella: language Norsk

SGP Covera diehti le Astrid Tuorda (19) bessam moatte stuorra sáme luovddáj dán jage. Sijda bielen de ballá vegajnis Gálloga råkkådahka soajttá ráddnán sjaddat.

Astrid Tuorda. Gåvvim: Niels Ovllá Oskal Dunfjell
Astrid Tuorda. Gåvvim: Niels Ovllá Oskal Dunfjell

Les på norsk.
Jårggålam: Are Tjihkkom

Astridajn æjvvalin Guovddagæjnon. Áttjak lij tjuojadime oajvveoassen. Lounge Sápmi le ájádus, mij nuorra ja åvddåniddje sáme artistajt vuoset.

Dálla lij Astrida vuorro.

– Mån gåjt hávsskudalliv. Gulliv nåv tjáppes lahkavuodav, dagu sijdan luluv, subtsas måjåda.

SGP Cover

Boahtámle gitta Gieruna sijdastis. Dåhku le jåhtåm skåvllåj Jåhkåmåhke Ráddnávres.

Dán jage le Astrid abmasis lávkkim dåbddusamos sáme luovdijda SGP Covera diehti.

SGP Cover-ásadusán de nuorra sáme buvtadiddje ja artista Sáme Grand Prixa ieme lávllagijt ja vuolijt tjuojadi.

Astri le barggam væhkkálakkoj DJ Ailojn ja Inna Marja Amundsenijn.

– Vuoj lijka, man suohtas! Dán jage lav galla ietjam vuosádallam.

– Ællájiv!

Mielastis buoremus lij SGP Covera ietjá artistaj siegen maŋemusát luovden bæssásjruohta Guovddagæjno Báktehárjen.

1000:a vargaj lidjin gáptegisá gæhttjamin.

Dájna iehket någåj.

Guhti le bæssásjruohta Báktehárjen manádav, diehtá galla man stuorra dáhpádus le.

– Ajtu ællájiv! Hávsskudalliv. Gå állis lijma nåv moattes luovden, de ittjiv måråda. Návddahiv ja lidjiv, giehttu Astrid.


Š-120 forside, Astrid Tuorda.
Astrid Tuorda le ådåsamos Š:a åvddåbielen. Gåvvim: Niels Ovllá Oskal Dunfjell

Almodam skierrov vuolij

Giesen lijAstrid akti vil stuorra sáme luovden. Såj Elina Ijæsijn bådijga Saara Hermanssona sadjáj Márkkomænon DJ Ailo konsertan.

Maŋŋela dan giese juojgaj mælggadav Árvesjávre girkkon.

Juojgaj moadda vuole skierros, mavva árabut almodij skåvllåprosjæktan. Vuorrasamos vuolle lij jages 1914.

– Joarkkaskåvlån låhkiv musihkkaoahpov. De ham de máhttiv ådåstuhttet vihtta vuole dajt skierron almoda. Ålles jagev lav má musihkan vájaldam. 

Huomande ij la Spotifyan. Ij gåjt dal hájn. Valla idisj så, jáhttá.

Dán tjállaga bále de ij la hájn Astridis SGP Cover-lávla almoduvvam. De vil almoduvvá skierrostis vuolle ådåsis Bernt Mikkel Haglunda musihkajn.

Davva ávvut.

– Muhtem vuolev lav iesj dahkam. Akti vuolle idij Huhttánin. Luonndo muvva dalá arvusmahttá.

Astrid le TikTokan. Guovlada suv bielev dála:


Fággát råkkådagájn

Luonndo le Astridij ájnas. Hæhkkat soajttá dálkádagá diehti mårådahtjat. Danen le nåk asstoájge rahttje.

Ihka vil soajttá bijlav vuodjet, girdden háledit, gálvojt påstan diŋŋgut, de huoman dálkádagáv ja luondov mujttá. Valla unugasstá, gå dárbaj dakkárijt.

– Oastáv aneduvvam biktasijt máhtedijn, berustav bálkudisáv duolla tjuolldemis.

Garrasamos rahtjam dálkádagá diehti le vargga vegas goahteguoran.

Astrida mánnávuoda sijdda le Gállogis mijlas lagábuttjan, gåggu ruovdev ussjoli råggågoahtet. Moadda jage li dajna rijddam.

Sámeednamav miehtáj lip gievra aktan. Sierra láhkáj nuora. Jasska lav guládijn iv aktu fággáda oajválattjajn.

Astrid Tuorda

Áhttjes le Gállok-dokumentárrafilma oajvve. Sån le aktivissta, guhti råkkådagáv vuostelt. Astrid le aj fáron.

Æbá la råkkådagá nihttám ælloniehke, ájnat huoman berustibá. Guolliba ja biebmojt tjoahkkiba dán dajvan.

Maŋenagi, gå li ålov dagástallam, de Svieriga oajvámusá li råkkådagáv dåhkkidam. Dálkádagá riektá viertti gåjt hájn ássjev mierredit. De så gájkka oassálasste vilá e diede, gåktu sjaddá.

Asstoájge rahttje

Astrid le mielastis dåssju asstoájge rahttje, gå subtsas áhttjes de esski rahtjá. Jagen 2020 de mielas vuosedij Sveaskoga Stockhålma dåjmadagá ålggolin.

Várrodam lij juo polijssa såjtij sehkanit.

Ja sehkanij vil.


Astrid Tuorda
Asstoájge rahttje. Gåvvim: Niels Ovllá Oskal Dunfjell

Áhttjes guojmijis siegen lidjin nahkam Sveaskoga dåjmadahkaj nággida tjágŋat. Polijssa fávdda bådij.

Vuosteldiddjijt gádodin.

– Mælggadij sijáv suvddin, åvddåla luojttin. Diedon baldedahtij, gå polijssa áhtjám ierijt suvdij, valla hálvva suohtastalliv. Ålles dáhpádusáv gåvvijiv.

Sámeednamav miehtáj lip gievra aktan

Gijttogis le áhttjásis, gå nåv rahtjá, valla aj sáme identitehtas. Sån ham sámevuodav vehkasis máhtsadij.

Ij dávk lulu dan dagi návti viessot.

– Alvos ájnas le årrot sábme. Jasska lav, giehttu Astrid vil tjielggi:

– Sámeednamav miehtáj lip gievra aktan. Sierra láhkáj nuora. Jasska lav guládijn iv aktu fággáda oajválattjajn.

Gidánållij joarkkaskåvlån låhkåmis ja studænntaeksámav tjálij. Jur dálla barggá oasev ájgestis oassásin ja sáme mánájårruhin.

Danna gielav adná.

– Sáme má ij la iednegiellam. Skåvlån lav låhkåm, vaj de buorre le bargadijn davva adnet. Juska dal iv tjielgga buvte sáme, de le ávkken mánájårruhin sámástit.

– Masjvalusjáv ållessjattugij siegen sámástit, valla mánáj siegen de galla buvtáv, tjajmmá.

Ij skåvllåj åhtsåla

Soapptsu ham návti. Skåvllåj vájbaj maŋemus jagijt. Tjiehppe lij så agev, ájnat maŋemus ájgev vuorddemusájt binnedij.

– Ij la buorre mårådit. 16-jagágin usjudalliv, manen luluv sjaddat. Alep oahpov, bargov ja biednigijt. Maŋenagi gåjt de sihtiv farra suohttasijt dahkat.

Musihkajn de navti dahká.


Astrid Tuorda
Astrid sebraj dán giese Márkkomæno vuosádussaj. Gåvvim: Niels Ovllá Oskal Dunfjell

Buoragit rijbbá váni skåvlå mårråhij dagi. De ij de joarkkaskåvlåv åhtsåla.

– Hálvva imálusjáv ådå árggabæjvám, valla buorebut viesov.

Ájnas jasska årrot

Ihka vil mánnán hálijdij artisstan sjaddat, de le buojkkám álkke ij la, vájbi ij ga sidá. Nåk suohtan le ájádallam juhtusijt dálkudimes jali åhpadimes, majdis ælla niegonis.

Ij ga sidá Stockhoalmmaj jali ga ietjá stádaj jåhtet, dagu moaddása jåhti niegov guora.

Lågå aj: Jiegŋahockeyniehko
Lågå aj: Oajvve Lars-Bjørnar

– Munji dávk hiehpá ållu dábálasj iellem vegajn ja mánájn. Ájnas le jasska årrot. Valla de máhttá musihkka bissot stuorra ássjen.

Návti dávk niegadav, jus sáddnáv hålav.            

Tags:    Astrid Tuorda   •   Julevsámegiella   •   lulesamisk   •   Nuoraidmagasiidna   •   Š   •   SGP Cover   •   ungdomsmagasin   •  

Sullasaš lohkamuš