CONIFA máilmmimeašttirgilvvut nissonolbmuid spábbačiekčamis leat dál manname loahpa guvlui, ja dál ii leat eambbo go okta čiekčan vel báhcán. Odne, lávvordaga, deaivvadeaba FA Sápmi ja Tamil Eelam finálačiekčamis Aspmyras.
Finála álgá diibmu 14:00, ja vuoiti šaddá dasto CONIFA máilmmimeašttir. Š lea hupman guvttiin čikčiin FÁ Sápmi joavkkus ovdalaš finála, ja soai muitaleaba movt dovdu dál lea ovdal go de viegadišgohtet spáppa maŋis. Eai leat moala oba luoitán geFÁ Sápmi moallafákta, Márjá Sofe Holmestrand Hætta (29) ii leat luoitán sisa ovttage moala máilmmimeašttirgilvvuin. Ja nu lea ge nai mihttu finálačiekčamis. – Dát gal lea mannan measta beare bures, mannan čiekčamis in oba guoskan ge spábbii.
– Šaddá go de measta beare unnán «action» dutnje?
– Dan gal oažžu lohkat! Dat eai oba báhčán ge mu njeaiga mannan čiekčamis, mus gal duođaid ii lean oba bargu ge. Mun ledjen gal galbmon go lei arvi, ja bottus fertejin molsut liegga biktasiidda, muhto muđui gal bessen dušše geahččat ja návddašit čiekčama, boagusta Márjá Sofe.
FÁ Sámis leat ge leamašan hirbmat buorit meašttirgilvvut dássážii.
Eará FA Sápmi čiekči, Laila Katrine Triumf (19), ii leat maŋimus kámppaid beassan čiekčat go fatnalii suotna árabus meašttirgilvvuin. Dattege sávvá son beassat fas Aspmyra šilljui. – Jáhkán ahte buorrána, muhto áiggošin goitge čiekčat vaikko ii livčče ge oalát buorránan. Son muitala ahte lea ahkit leamašan beaŋkkas čohkkát, ja ahte lei háliidan jearrat hárjeheaddjis iigo bija su goitge šilljui, muhto árvidii ahte ii soaitte dan veara go juo lea suotna fatnalan. Rámiida hárjeheddjiid
Márjá Sofe mielas lea earenoamáš beassat Sámi ovddastit spábbačiekčamis. Son lohká ahte buktá ilu go beassá iežas álbmoga ovddastit ná, ja árvida ahte earáide lea nai hirbmat earenoamáš dovdu. Laila Katrine lea ovttaoaivilis suinna, ja lohká nai earenoamážin go Sámi joavku čiekčá ná bures fárrolaga, vaikko eai leat baljo goassege ovdal fárrolaga čiekčan. – Lean hui rámis go beasan dáppe čiekčat. Hui somá nai go klubbajoavkku dásis lean gilvalan muhtun minjoavkku mielčikčiid vuostá, muitala Laila Katrine. FA Sápmi joavkkus leat sihke nuorra ja hárjánan čiekčit. Márjá Sofe rámiida hárjeheddjiid go leat čohkken nana joavkku. – Dát lea leamašan sukseassa. Mun jáhkán ahte lea hui earenoamáš daid nuorra čikčiide geat eai leat ovdal dakkár dásis gilvalan, lohká Márjá Sofe. Finála ektui jáhkká son ahte nuorra čikčiin sáhttá mokta loktanit vel eambbo go besset Aspmyras čiekčat, mii lea Bodø/Glimt joavkku stádiona. Laila Katrine muitala ahte illuda dohko vuolgit, ja lasiha ahte doppe lea ge stuorát šilju go Mørkvedlias, gos dássážii leat čiekčan. – De beassá dan nai rámpostit! Duhtavaš mediagokčamiin
CONIFA lea buvttadan njuolggosáddagiid visot čiekčamiin, mat leat leamašan nuvttá buohkaide geahččat. NRK lea nai čájehan njuolggosáddagiid gilvvuin, ja kommenteren sámegillii. Márjá Sofe muitala ahte lea hui duhtavaš mediagokčamiin, earenoamážit mannan máilmmimeašttirgilvvuid ektui. – Go Indias leimmet máilmmimeašttirčiekčamiin 2022:s, de ii lean nu olu mediagokčan. Dat lei ge CONIFA vuosttaš máilmmimeašttirgilvu nissoniid spábbačiekčamis, nu ahte ledjen sávvan veaháš eambbo gokčama dalle. Muhto dieđusge ii lean nu álki beassat Indiai visuma dihte. Hui somá de dál go sihke CONIFA ja NRK čájehit gilvvuid. Son muitala ahte lea hui dehálaš go gilvvut ožžot eambbo fuomášumi, ja ahte lokte movtta go vuhtto ahte lea beroštupmi. – Sámi spábbačiekčamis gal lea čuvges boahtteáigi, loahpaha Márjá Sofe.
