Go lea nuoraid birra sáhka, de šaddat measta juohkit nuoraid guovtti jovkui. Oainnat mun gii lean 29 jagi, anán iežan ain nuorran. Muhto mun han lean badjel beali boarráset go 14-jahkásaččat, geat goit juobe leat nuorat.

DIEKKO čuožžila ge váttisvuohta. Movt bat mun sáhtán atnit iežan nuorran, jurdilat várra don gii aiddo fal leat 14-jahkásaš ja ieš dat coolas nuorra?

IN MUN dáidde nu nuorra ja coola gii coola-sáni anán. Na juo, mun mieđihan ahte diet ii jur ábuhan mu ákkastallamii. Muhto (nuorra) ja hutkái go mun lean, de evttohan juohkit nuoraid guovtti jovkui: nuorranuorat ja nuorat. Dien dáfus leat 14-jahkásaččat nuorranuorat, ja mun ges lean nuorra - ja gávvil. High five!

Loga maid: Ruoná dilla

BUSSEMÁTKKIS dál giđđat oainnat gullen nuoraid ... vuorddes mat, oaivvildan nuorranuoraid, humadeame duon dán birra. Sii dáide leat 13-14-jahkásaččat. Fáhkka šattai sáhka ovtta dáin nuorranuorain stuoraoappá birra.

SII LEDJE árvideames seamma luohkáhasat, ja nu okta sis hirpmahuvai go nuppis lei stuoraoabbá gean birra ii lean ovdal gullan. Ii ge das galle, son ii diehtán ahte stuoraoabbá lei NIE boaris! Olles 21 jagi!

MUHTO MUN dieđusge muittán ieš movt lávii. Dalle go mun ledjen 14 jagi, orro 21-jahkásaččat oba rávisolbmot ja boarrásat. Ja 29-jahkásaččat orro ges ... eh.

Loga maid: Gean don leat bárdni?

MUN ÁLGGÁN beare ođđa cealkagiin. Nuorain lea oainnat álo hoahppu geargat. Muhto mu oaivil lea ahte jus dii nuorranuorat dohkkehehpet gohčoduvvot nuorranuorran vai mun beasan iežan gohčodit nuorran, de livččii oba buorre. Giitu!