Guovdageainnu bárdni Áslat Issát lea virgáduvvon ođđa journalistan Š-bláđđái. Son lea juo ollen ovtta áigodaga bargat ja almmuhit áššiid min neahttasiidduin. Dán nummárii lea maid čállán. Mii deaivat su Romssas gos studere sámegiela universitehtas.

– Olu lihkku ođđa bargguin Š-bláđis! Dál leat juo muhtun áigodaga bargan journalistan min bláđis. Movt lea leamaš dássážii?
– Giitu! Dat lea leamaš hui somá, ja maiddái miellagiddevaš! Mun liikon dákkár bargui gos nuorat besset čállit nuoraide. Mun anán dehálažžan dan ahte addit sániidsaji nuoraide. Lea han sáhka áššiin maid mun ieš nai beroštan.

– Don leat ovdal bargan Ávvir-aviissas ja olu ođasčállosiid ráhkadan, muhto dál beasat aivve nuoraidáššiiguin bargat. Makkár doaimmain ja fáttáin don jáhkát nuorat odne beroštit?
– Buorre gažaldat. Mun vuohtan gal ahte ođđa sámi vuoigŋa ja oktavuohta lea ealáskan sámi nuoraid gaskkas, erenoamážit maŋŋel Fovse-miellačájehemiid. Jáhkán dat lea juoga mii guoská nuoraide miehtá Sámi.

– Maid ieš liikot bargat friddjaáiggis?
– Musihkka lea mu astoáigedoaibma. Mu niehku lea beassat bargat musihkain nu olu go vejolaš. Mun čuojahan olu gitárain, sihke akto ja earáiguin fárrolaga. Mus lea čuojahanjoavku ja maiddái iežan musihkkadoaimmat. Livččii somá almmuhit musihka iežan namas.

– Don han čuojahat rockajoavkkus! Muital juo eambbo dan birra!
– Juo, nu dagan! Joavkku namma lea Not My Time To Die ja mii čuojahit garrarock. Mii čuojahit konsearttaid duollet dálle ja diibmá almmuheimmet maiddái skearru, Sáivu. Dássážii leat čuojahan Oslos, Troanddimis, Romssas ja miehtá Finnmárkku. Geasset ges lea konsearta Hársttáin, Davvi-Norgga riemuin. Dál áiggošeimmet ođđa skearruin maid bargagoahtit.

– Dál gal diehtit veaháš eambbo du birra! Muhto makkár don leat olmmožin? Movt čilgešit iežat daidda geat eai dovdda du?
– Na ... Mun lean hui rabas olmmoš. Liikon oahppat earáid birra ja gullat sin ságaid, vásáhusaid ja jurdagiid. Nu várra heiven ge journalistan. Muđui liikon maid mátkkoštit ja ođđa vásáhusaide. Jođi lea buoret go oru. Eará? Na, mun liikošin guhká oađđit ja nu láve ge lossat árrat lihkkat.


– Livččii go dus fun fact iežat birra man minguin sáhtát juogadit?
– Mun lean vissa ožžon noaidefámuid muhtun sámi politihkkáris gii čuoččuha daid skeŋken munnje. Vissa ledje vel guvllárfámut. In dieđe duosttan go iskat ja geahččalit daid gal. Hehe.

– Don barggat oasseáigge min luhtte ja studeret ollesáigge sámegiela universitehtas Romssas. Guđe guvlui son boahtteáigi doalvu du?
– Dan šaddá somá oaidnit jus eallin ja dearvuohta. Mun liikon čállit, nu ahte sávan bargat Š-bláđis nu guhká go vejolaš, vaikko nu guhká go dovddan iežan nuorran. Haha. Boahtteáiggis livččii maid miella girjji čállit. Ja dieđusge leat maid ambišuvnnat musihkain. Mihttu livččii buot olahit, muhto lihkku jus juobe juoidá ge dás olahan.