Mii háleštat Ella Mariein beaivvi maŋŋel girjealmmuheami, ja vuhtto bures ahte son lea sihke váiban ja lihkolaš.

– Mun ferten mieđihit ahte čállinproseassa lea leamašan hui lossat. Mun in gal leat dál seammas álggaheamen barggu ođđa girjjiin, bohkosa Ella Marie.

Derfor må du vite at jeg er same lea ge girjji namma mainna Ella Marie lea bargan 2018 rájes.

Loga maid: Belgia sápmelaš

Almmolaš Sámi ámadádju

2018 lei jahkki go Ella Marie šattai almmolaš sámi ámadádjun Stjernekamp tv-ráiddu dihte.

– Mun fuomášin dalle ahte Norggas leat hui váilevaš dieđut Sámi álbmoga, kultuvrra ja historjjá birra. Dalle iđii jurdda čállit girjji ja dan rájes lean bargan dainna duollet dálle, dadjá Ella Marie. 

Maŋŋel go oassálasttii Stjernekamp tv-ráiddus, de dovdagođii Ella Marie erenoamáš ovddasvástádusa ovddidit sámi áššiid.

– Mun čatnen oktavuođa máŋgga mu sámi guldaleddjiiguin ja gehččiiguin. Sii ledje dieđusge hui rápmásat go lihkostuvven ja mun dovdagohten veaháš ovddasvástádusa addit jiena daidda geain ii leat leamašan jietna, dadjá Ella Marie.

Dát lea ge maid Ella Marie háliida olahit girjjiin. 

– Mun čálán ovdamearkka dihte iežan eatni and goaskki birra girjjis. Soai leaba dulbmojuvvon iešguđetge láhkai dáža servodagas, ja soai eaba leat goassege beassan daid njulget, dadjá Ella Marie.

Loga maid: Ále eastte Petra dánsumis

Čielga diehtu álbmogii

Ella Marie čilge ahte girji lea máŋgga láhkai čielga diehtu majoriteahtaálbmogii ahte eat sáhte badjelgeahččat ja viggat vajálduhttit min oktasaš historjjá dáruiduhttináiggiin ja visot maid dat mielddisbuvttii. 

– Muhto dat lea seammás girji mii lea dego ráhkisvuođareive sámi álbmogii. Nu ahte dát girji lea sihke majoritehtaálbmogii ja mu iežan olbmuide, dadjá Ella Marie. 

Ella Marie sávvá ahte girjji dihte bohciidit ságastallamat mat boktet ođđa jurdagiid sihke dáža and sámi álbmogis. 

– Nie mii sáhttit gávdnat oktasaš vuođđogelbbolašvuođa mii gis sáhttá dagahit ahte mii ovddas guvlui sáhttit eallit buorebut bálddalagaid ja ovttas. Nie sáhttit ipmirdit guhtet guimmiideamet buorebut, dadjá Ella Marie.

Loga maid: Mášohis Inna Márjá

Buorre ovttasbargu mielčálliin

Ella Marie lea ožžon olu veahki Randi Helene Svendsenis, gii lea ge girjji mielčálli. Ella Marie rámiida sakka ovttasbarggu suinna. 

– Randi lea veahkehan mu formuleret ja čállit mu muitalusa. Son lea maid dahkan ollu research-barggu go girjjis leat hui olu gáldut geavahuvvon dan dihte go moai čilgejetne olu historjjálaš dáhpáhusaid, dadjá Ella Marie.

Responsa girjái lea maid dán rádjái leamašan buorre.

– Mu mielas lea almmuheapmi liikostuvvan hui bures. Mun lean jo máŋga čuođi girjji sádden olbmuid poastakássaide, ja dat orru bures vuostáiváldon. Dat lea hui somá, dadjá Ella Marie.

Buorit sánit liggejit

Buriid árvosániid fiškalii maid girji NRKa girjjálašvuođaárvvoštallis, Marta Norheim.

Norheim čállá ahte son ii leat goassege lohkan dakkár girjji mas lea temperatuvra, áŋgiruššan, dieđut ja dulkomat nugo Ella Marie girjjis. 

– Olmmoš dieđusge ballá árvvoštallamiin, muhto mun lean hui duhtavaš dainna NRKa árvvoštallamiin. Dat dego duođaštii ahte mun lean lihkostuvvan iežan ulbmilii mii lei ge boktit jurdagiid, rahpat čalmmiid ja oažžut olbmuid smiehttat dakkár áššiid maid dábálaččat eai livčče smiehttan.

– Mun lean ilus go dál lean ollen loahppasázu badjel, ja olbmot orrot duostamin váldit girjji vuostá ráhkisvuođain, loahpaha Ella Marie.