Portreahtta  |
Forfatter Niels Ovllá Oskal Dunfjell

Skánitlaš Inna Márjá Amundsen (17) lea veaháš mášoheapme. Jus buot livččii iežas duohken, de livččii juo eallime musihkain.

Inna Márjá lea lávkeme sámi musihkkalávddiide. Govven: Niels Ovllá Oskal Dunfjell
Inna Márjá lea lávkeme sámi musihkkalávddiide. Govven: Niels Ovllá Oskal Dunfjell

Gávttehasat ja eará čiŋadan olbmot doškot gieđaid. Inna Márjá moddjá ja giitá iežas ovddas. Son lea aiddo beassan loahpahit Sámi allaskuvlla skuvlajagirahpama Guovdageainnus.

Son lea mánnávuođa rájes olu lávlon ja ovdanbuktán, muhto eai goassege ovdal leat lágideaddjit diŋgon mátkki sutnje ja viežžan su nie guhkkin čuojaheami váste.

Ruovttus Skániin Guovdageidnui lea guhkes gaska.

 – Mun lean veaháš viimmáskan, dan ferten mieđihit. Dát lea maid niegadivččen bargat. Dál lean beassan veaháš dovdat makkár artistaeallin sáhttá leat, dadjá Inna Márjá.

Hárjehallá orrut iehčanis

Skuvlajahki lea illá álgán, muhto Inna Márjá lea liikká ožžon friddja čuojahanbarggu oktavuođas.

Dan gal roahkka oažžu.

Son lea dán čavčča álgán nuppi jahkái musihkkalinjjás Heggen joatkkaskuvllas Háršttáin. Doppe háliidit áinnas ahte sin oahppit besset ovdánit nu olu go vejolaš.


Inna Márjá lávlu
Inna Márjá loahpahii Sámi allaskuvlla skuvlajagirahpama. Govven: Niels Ovllá Oskal Dunfjell


Ieš lea eret Lidáláttis Skániin, unna gilážis diimmu Háršttáin eret. Son lea ain hárjáneame iehčanis orrut gávpogis. 

– Manná áibbas bures orrut akto. Muhto eadni láve gal álo sáddet biepmu mu mielde go ruovttus finan, boagusta son.

Massii áhčis mánnán

Inna Márjá giitá ge iežas eatni dan ovddas go musihkain lea beassan ovdánit dan mađe go lea beassan.

Dalle go su eadni bargagođii Várdobáikki sámi guovddážis, de oahpásnuvve doppe maiddái Inna Márjjáin. Dađistaga son ožžogođii smávit čuojahanbargguid doppe, ja nu eambbogat álge fuomášit su.

Loga maid: Belgia-sápmelaš

Earet eará lea son moddii beassan Intrigue fárus lávlut Márkomeanuin. Vuosttaš geardde lei dušše 13-jahkásaš.

Eandalii sámi musihkkalávdái lea son lávkegoahtán maŋemus áiggiid. Muhto dat ii lean diehttelas.


Inna Márjá ja dimbbarduogáš
Inna Márjá lea hui giitevaš vejolašvuođaid ovddas maid lea ožžon. Govven: Niels Ovllá Oskal Dunfjell


Dalle go Inna Márjá lei birrasii 4-5 jagi, massii son áhčis buozalmasvuhtii.

Su áhčči dat lei sápmelaš ja dat guhte galggai oahpistit su sámivuhtii. Dan sadjái šattai su eadni, guhte lea ruošša, váruhit ahte Inna Márjá ja su stuoraoabbá oahpásnuvaiga sámivuhtii.

– Mus lea ovdamearkka dihte leamaš sámegiella gávcci jagi vuođđoskuvllas. In leat gal oahppan dan mađe ahte máhtán giela, dadjá son ja lasiha:

– Muhto lihkus mus leat siesát geat leat gáktegoarrut. Sii leat maid leamaš stuora veahkkin, lohká Inna Márjá.

Loga maid: Áhččerohki árbi

Olu eatnit livčče árvvusge ruoktot fárren mánáideasetguin dákkár dilis, muhto ii su eadni.

Dan sadjái fitnet baicca Guoládatnjárggas Ruoššas moddii jahkái. Inna Márjá máhttá ruoššagiela dan meari ahte gulahallá fulkkiiguin.

Searvan Idol-prográmmii

Ságastallan jorggiha fas musihka guvlui. Son hupmá áŋgirit dan birra. Ii leat eahpádus ahte dat lea mainna háliida bargat.

– Mun in nagot govvidit iežan dábálaš kantuvravirggis dihto bargoáiggiiguin. Lea veaháš jurddašmeahttun govva, moddjá son.

Lahkagovva Inna Márjjás
Inna Márjá háliida lihkostuvvat musihkain. Dat lea su niehku. Govven: Niels Ovllá Oskal Dunfjell
Inna Márjá Idolas
Diibmá searvvai Inna Márjá Idol-prográmmii. Govven: TV 2


2013:s searvvai son TV2-gilvui “Norske Talenter”. Diibmá oidnui ges “Idol”-prográmma oktavuođas seamma kanálas. Idolas oaččui nu gohčoduvvon gollebileahta, muhto son ii lihkostuvvan beassat loahppavuoruide.

Inna Márjá lea veaháš mášoheapme.

Vaikko lea dušše 17 jagi, de orru vuordináigi maid guhkki. Erenoamážit go ii dieđe ollašuvvá go niehku goassege.

– Lea go dus hoahppu go ná nuorran juo háliidat fuomášuvvot?

Son bohkosa.

– Soaitá gal veaháš nu, muhto seammás asttan maid vuordit. Mun lean oassálastán diein prográmmain suohttas dihte maid. Dat lea fiinna oahppa.


Almmuhan coveriid

Sámi musihkka lea leamaš vuolggasadjin artisttaide nu movt Agnete Sabai ja Ella Marie Hætta Isaksenii. Dan diehtá Inna Márjá maid. Son oaidná vejolašvuođaid maid dat sáhttá buktit.


Inna Márjá dánsu
Inna Márjá háliidivččii áinnas bargat eambbo sámi musihkain. Govven: Niels Ovllá Oskal Dunfjell


Dássážii lea ieš almmuhan guokte lávlaga. Goappaš šuoŋat leat coververšuvnnat.

Vuosttaš lea “Elle”, ja nubbi fas “Jáddá go beaivi”, man dán geasi almmuhii ovttas DJ Ailloin SGP-covera oktavuođas.

Son čuojaha piano ja čállá veaháš šuoŋaid ieš maid, muhto dál álggus vuoruha lávluma ja dainna ovdánit vel eambbo.

– Mun lean gal bággehallan jurddašit oahpogazzama birra maid. Mus soaitá B-plána, muhto in dieđe riekta. Musihkka lea mainna háliidan bargat.

Tags:    Inna Marja Amundsen   •   Link i bio   •   Márkomeannu   •   Nuoraidmagasiidna   •   Š   •   Sámi musihkka   •   SGP-cover   •   ungdomsmagasin   •  

Sullásaš lohkamuš