Ođđasat  SoMe-ságat  |
Author Š | Språk/Giella: language Norsk

Kárášjoga nieida Stine Lise Nordsletta Somby (18) lea Š-bláđi ođđa neahtta-/SoMe-journalista.

Stine Lise Nordsletta Somby lea Š-bláđi ođđa neahtta-/SoMe-journalista.
Stine Lise Nordsletta Somby lea Š-bláđi ođđa neahtta-/SoMe-journalista.

Les saken på norsk.

Š lea virgádan Stine Lise Nordsletta Somby 50 % virgái neahtta-/SoMe-journalistan. Son lea álgán bargui ja illuda ođđa hástalusaid dohppet.

– Dát bargu heive munnje hui vuohkkasit! Mun lean álo beroštan sosiála mediain ja lean ieš hui áŋgir doppe. Juste dál lea dát niehkobargun munnje, dadjá Stine Lise.

TikTok

Š-bláđi neahttasiidu ja sosiála media-kontot šaddet Stine Lise bargoarenat. Son galgá vuosttažettiin dáid arenaide buvttadit sisdoalu, muhto boahtá bábermagasiidnii maid ráhkadit áššiid.

Son vuordá ahte šaddá sihke suohtas ja hástaleaddji.

– Vuosttaš maid lean dahkan lea ráhkadit TikTok-konto Š-bláđđái. Mii boahtit dohko almmuhit sisdoalu. Instagrammas áigut maid eambbo oidnosis šaddat, lohká ođđa journalista.

Stine Lise boahtá olu oidnot Š-bláđi sosiála media-kontoin.


Ulbmil lea almmuhišgoahtit filmmažiid earet eará vlogg- ja reportášahámis, muhto heivehuvvon TikTokii.

Stine Lise vázzá maŋemus jagi Sámi joatkkaskuvllas Kárášjogas. Son lohká oahppospesialiserema ja čiekŋuda reálafágaide. Son áigu kombineret barggu skuvlavázzimiin.

Loga maid: TikTok-revolušuvdna


Hárjáneapmi sosiála mediaiguin

– Mun lean hui giitevaš go dákkár barggu beasan jođihišgoahtit. Sosiála mediat leat mus stuora beroštupmin. Mu skihpárat oaivvildit ahte lean jo veaháš influencer, boagusta Stine Lise.

Su beroštumi ovddas lea maid šaddan Kárášjoga russaid mediaovddasvástideaddji. PR-hoavdan sii gohčodit su.

Dasa lassin lea maid beassan jođihit Porsáŋggu valáštallansearvvi sosiála media-kontoid, gos ieš čiekčá spáppa. YouTuben maiddái lea ovdal.

– Mun illudan beassat čájehit maid máhtán! Ieš lean hui áŋgir TikTokas, nu ahte beassat vel bargat dainna šaddá erenoamáš.

Stine Lise Nordsletta Somby
Stine Lise lea álo lohkan Š-bláđi skuvllas. Dál illuda ieš ráhkadit sisdoalu nuoraide.


Duhtavaš doaimmaheaddji

Stine Lise galgá vuosttažettiin olahit nuoraid- ja joatkkaskuvlaohppiid, mii lea Š-bláđi ulbmiljoavku. Mihttu lea loktet sámegiela eambbo oidnosii sosiála mediain ja neahtas, gos nuorat eandalii leat ge.

Bábermagasiidna galgá ain ilbmat njeallje geardde jahkái. Dan doaimmaha Niels Ovllá Oskal Dunfjell.

Son lea váldodoaimmaheaddji, ja illuda oažžut journalistta doaimmahussii.

– Mii leat hui ilus go Stine Lise lea min ovddas álgán bargat. Son diehtá mas nuorat beroštit ja movt sin olahit vel buorebut. Mis gal lea jáhkku ahte leat rievttes olbmo virgádan, lohká doaimmaheaddji Niels Ovllá ja lasiha:

– Dasa lassin leat mii dan dilis ahte bábermagasiidna jur beanta gahččá lohkkiid askái skuvlla bokte. Mii leat hui duhtavaččat obbalaš fálaldagain mii boahtá leat dán rájes.

Niels Ovllá
Š-bláđi doaimmaheaddji Niels Ovllá Oskal Dunfjell.


Š bábermagasiidna sáddejuvvo nuvttá ulbmiljovkui, geat leat skuvlanuorat Norggas gávccát ceahki rájes geain lea sámegiella fágan oahpahusas.

Ođđa journalista háliida áinnas cavgilemiid. Suinna sáhttá eandalii gulahallat sosiála mediaid bokte.

– Lea beare váldit oktavuođa jus leat evttohusat dahje ideat sosiála mediaid dáfus. Š han lea nuoraid váste, ja nu lea vejolaš váikkuhit, ávžžuha Niels Ovllá.

Tags:    Nuoraidmagasiidna   •   Š   •   SoMe   •   Stine Lise Nordsletta Somby   •   ungdomsmagasin   •  

Sullasaš lohkamuš