Portreahtta  |
Author Niels Ovllá Oskal Dunfjell

Sámi Grand Prix, Riddu Riđđu ja Beaivváš Sámi Našunála Teáhter leat muhtun lávddit main Deanu nieida Ellinor Skartland (20) lea čuččodan dán jagi. Sutnje lea dát dušše álgun.

Ellinor Skartland. Govven: Niels Ovllá Oskal Dunfjell
Ellinor Skartland. Govven: Niels Ovllá Oskal Dunfjell

Lea bearjadat maŋŋelgaskabeaivi. Eatnasiidda mearkkaša dat vahkkoloahppa ja viimmat friddja, muhto ii Ellinorai gal. Son galgá bargui ihttin maid – lávvordaga.

Ellinor neaktá Muohtaoabbá-bihtás Beaivváš Sámi Našunála Teáhteris. Sii leat garrasit bargame gárvet juovlačájálmasa go deaivat su Guovdageainnus.

Loaktá bures

Leat guokte vahkku geahččalančájálmassii ja premierii Romssas go mii deaivvadit suinna. Son ii stresse dan dihte, muhto nearvvat gal leat dovdogoahtán, mieđiha son.

– Mu mielas leat hui suohtas beaivvit teáhteris. Mun in bala vel, muhto jurddašan olu premiearabeaivvi birra, mii lahkona. Lihkus in leat vel álgán niegadit čájálmasa birra ihkku, dadjá son.

Ellinor loaktá bures lávddi alde.

Hárjánan maid lea dasa maŋemus áiggiid. Son diehtá bures ahte veaháš balut gal fertejit leat.

– In aŋkke sáhte šat geassádit. Dasa lea menddo maŋŋit dál, boagusta son.

Ii gal ahte dat lea leamaš su jurdagiin.

Juste dál beassá bargat lávddi alde. Dat lea maid álo lea niegadan ja háliidan.

Ellinor Skartland
Ellinor lea neaktán “Hedvig” Muohtaoabbá-bihtás. Govven: Aslak Mikal Mienna

– Ii sáhte hilgut Beaivváža

Go fálaldat neaktit Beaivvážis bođii teáhterhoavddas, de fertii jurdilit veaháš. Ellinor lei barggus NRK Sámis dalle sin taleantaprográmma bokte.

Son lávii jođihit VALVI-rádioprográmma.

– Mun lokten hui bures doppe. Muhto go Beaivváš riŋge, ii de sáhte goit hilgut sin, moddjá son.

Son šattai hui ilus go vel gulai ahte lea Muohtaoabbá masa fállet rolla. “Snøsøsteren”, nu movt dárogillii lea, lea rievtti mielde mánáid- ja nuoraidgirji.

Ellinor lei lohkan girjji.

– Mun muitalin fálaldaga birra iežan lagamusaide. Sii ledje ovttaoaivilis. Dán vejolašvuođa lei bággu dohppet.

Neaktá “Hedvig”

Muohtaoabbá lea “Julian” birra, gii aiddo lea massán stuoraoappá. Juovllat lahkonit, muhto ii mihkkege leat šat nu movt lávii.

Juliana váhnemat leaba lossa morrašis, ja nu eai oro šaddame juovllat ruovttus.

Kristian Tapio ja Ellinor Skartland.
Ellinor ja Kristian Tapio nevttiiga váldorollaid. Govven: Aslak Mikal Mienna


Julian lea danne olu akto, dassážii go muhtin beaivve deaivá imašlaš nieidda, Hedvig.

Dán imašlaš nieidda neaktá Ellinor.

Oaččui rolla dakkaviđe

Ellinoras ii lean nu olu teáhter- ja neaktinhárjáneapmi ovdal dán rolla. Son lei neaktán Hyenat-bihtás Sámi Mánáid Teáhteris 10. luohkás Deanus.

Dat lei áidna hárjáneapmi mii sus lei.

Muđui jáhkká Sámi Grand Prix-oassálastima ja VALVI-prográmmajođiheaddjebarggu leamaš duogážin dasa go oaččui neaktinbarggu.

Ii lean dárbu auditionii. Son oaččui rolla dakkaviđe.

– 2022 lea leamaš erenoamáš jahki munnje. Mus lei mánnávuođaniehkun šaddat artistan ja čuožžut lávddiin. Dán jagi lean beassan bargat juste dan. Dat movttiidahttá mu joatkit.

Ellinor Skartland Márkomeanuin.
Ellinor ja SOÁ čuojahedje Márkomeanuin dán geasi. Govven: Niels Ovllá Oskal Dunfjell.

Festiválain čuojahan

Sámi Grand Prix loktii su ja joavkku SOÁ duođai oidnosii Sámis. Sii bohte nubbin lávlagiin “Áiggi mielde”. Gilvu sáddejuvvui njuolggosáttan NRK1:s olles Norgga álbmogii.

Ellinor diđii dás ávkkástallat.

Ságastallamis prográmmajođiheddjiiguin ja buoremus sáddenáiggis čurvii son: “Festiválat! Dii fertebehtet booket min artistan din konsearttaide!”.

Giđa mielde almmuhuvvojedje sii artistan duon dán festiválas. Ellinor moddjá.

– Dan maid eatnasat eai dieđe, lea ahte mii leimmet jo bookejuvvon Riddu Riđđui ja Márkomeanuide ovdalgo dán dadjen TV:s.

– Danne várra arvet ge nie roahkkat leat?

– Haha. Juo, várra.

@ellinorskartland

Man må lide for kunsten, eller? I dag farget jeg håret rødt på jobb👩‍🦰 Snart har Det Samiske Nasjonalteatret premiere på teaterstykket Muohtaoabbá / Snøsøsteren🎄#julestemning #frisør #copperhair #teater

♬ Made You Look – Meghan Trainor
Ellinoras maid lea TikToka gos beassat čuovvut su eallima.

Dárustii mánnán

Dan maid ollugat eai ge dieđe, lea ahte lávlut sámegillii ii leat nu diehttalas Ellinorai. Son ii sámástan go lei unni.

Sus lea oainnat dárogiella eatnigiellan.

Ellinor lea stuora oasi mánnávuođas orron Stavangeris. Ruovttus sii dárostedje.

Muhto mánáidskuvllas oažžugođii son gáiddusoahpahusa sámegielas – guokte diimmu vahkus Skype bokte. NRK Sápmi ráhkadii ášši dás dalle.

Moddii jagis beasai hospiteret Sirpmá sámeskuvllas. Ovtta áigodaga orui maid bearrašiin davvin.

6. ceahkis váccii Ellinor jahkebeali doppe. Son sámástišgođii. Nu leat su vieljat ja eadni maid dahkan maŋŋelaš. Dan dáfus lea hui ilus.

Deatnu lea ruoktu

Oktiibuot ovcci jagi orro sii Stavangeris. Maiddái Steinkjeras orodedje moadde jagi.

Maŋemus jagi nuoraidskuvllas váccii Deanus sámeskuvllas.

Sii fárrejedje fas davás. Su bearaš orru dál Deanus.

Ellinor lea olu báikkiin orron dássážii. Dán čavčča lea Guovdageainnus leamaš. Govven: Niels Ovllá Oskal Dunfjell


– Vaikko in astta sakka váillahit ruovttu juste dál, de boahtá Deatnu álo leat mu ruoktu. In dieđe gal gos ieš boađán orrut. Mun govvidan johtit ja orrut olu sajiin.

– Nu lean goit dássážii dahkan eallimis! dadjá Ellinor, gii olles joatkkaskuvlla váccii Frankriikkas.

Hállá fránskkagiela

Son liiko dohppet vejolašvuođaid go dat bohtet. Ellinor ii máhttán báljo binnáge fránskkagiela go álggii joatkkaskuvlii Frankriikii, muhto dan oahpai jođánit.

Sus lei bággu.

Buot oahpahus doppe lei fránskkagillii. Eanas fránskalaččat eai ge liiko eŋgelasgiela hupmat.

Joatkkaskuvlla oahppoduođaštusa mielde lea sus fránskkagiella vuosttašgiellan. Vuođđoskuvlla báhpiriid mielde lea sus sámegiella vuosttašgiellan.

– Dárogiella, mii lea rievtti mielde mu eatnigiella, ii čuoččo gostege mu vuosttašgiellan. Dat lea veaháš erenoamáš mu mielas.


Fun facts Ellinora birra:

Ellinor álggii dánsut baleahta go lei 4-jahkásaš.

Ellinor lávii gilvvohallat BMX-racingas.

Ellinor lea ferten báidnit vuovttaid ruoksadin Hedvig-rolla dihte.

Ellinor lea turneren USA:s Stavanger duopmogirku koarain.



Álgá fas journalistan

Sámegiela ovddas lea ge giitevaš. Dat lea addán olu vejolašvuođaid sutnje.

Maŋŋel go sin maŋemus teáhterčájálmas lea leamaš, de lea Ellinoras okta friddjabeaivi. Son álgá dakkaviđe fas NRK Sápmái. Dán háve ođasjournalistan.

Ellinor galgá bargat vikáran gitta čakčii. Dalle lea su vuorru jearahallat lávdedáiddáriid.


Ellinor Skartland
Ellinor álgá fas journalistan bargat. Dalle lea su vuorru jearahallat lávdedáiddáriid. Govven: NIels Ovllá Oskal Dunfjell


– Šaddá gal veaháš lossat dakkaviđe álgit ođđa bargui, muhto mun illudan dasa maid. Mun lean sáhkkii, ja liikon guorahallat áššiid ja háleštit olbmuiguin. Journalistan šaddá somá bargat.

Boahtá ođđa musihkka

Fásta bargu addá oadjebasvuođa su mielas. Son áigu ain čuovvolit iežas nieguid, muhto ovdalgo duođai geahččala artistan ja neavttárin birget, de háliida oahppat nu olu go vejolaš.

Musihkain áigu diehttelasat joatkit.

Go teáhterčájálmasain ii šat bargga, de astá buorebut musihka čállit. Son lea ođđa musihkkaprošeavttain bargame.

Ellinor ii dieđe boahtá go SOÁs gullo eambbo, muhto su aŋkke eat leat gullan maŋemus geardde. Dan lohpida.

Loga maid: Truck-nieiddat
Loga maid: Mášohis Inna Marja

– Mun in dieđe geasuha go dábálaš A4-eallin mu. Sihke musihkka ja neaktin leat juoga maiguin govvidivččen iežan bargat boahtteáiggis. Dán jagi doaimmaid oainnán dušše álgun dasa mii boahtá.

Tags:    Ellinor Skartland   •   Nuoraidmagasiidna   •   Š   •   Sámi Grand Prix   •   Samisk   •   Samisk ungdom   •   SOÁ   •   ungdomsmagasin   •  

Sullasaš lohkamuš