Kultuvra  Musihkka  |
Author Iŋgá Káre Márjá I. Utsi | Språk/Giella: language Norsk

Arvi, mokta ja buorre musihkka leat sánit maiguin sáhttá govvidit dán jagáš Riddu Riđđu-festivála.

Les på norsk

Dán jagáš Riddu Riđđu-festiválii ledje ollusat illudan ja vuordán.

Badjelaš 5300 olbmo ledje čoahkkanan Riddu-guolbanii časkin dihte feastta, návddašit festivála kultuvrralaš dáhpáhusaid ja vásihit nu olu arvvi ahte das livččii sáhttit riššudit.

Mii fidniimet guokte nuora ságaide gullan dihte mo sudnos lei dilli festiválas. 

18 diimmu biillas 

Maajja-Krihke Bransfjell mielas lei guhkes mátki Olmmáivággái.

Son muitala ahte sii ledje joavku geat fáhkkestaga gávnnahedje, ahte sii gal dollejit Plaasjes Olmmáivággái vásihan dihte Riddu Riđu. 

–  Tuvra lei hui spontána, mii vuoddjáimet seamma eahkeda go mearrideimmet vuolgit ja vujiimet olles ija, nu ahte mii leimmet oalle váiban go olliimet. Google Mapsas čuožžu ahte ádjána 18 diimmu vuodjit, muhto mii dieđus ádjáneimmet vel guhkit go bisáneimmet boradit. 

– Leat go ovdal leamašan Riddu Riđus?

– In leat, dát lei vuosttaš geardi daningo mii álo lávet mearkumin dán muttus áigge. Muhto dán jagi leimmet maŋŋonan dálkki dihte nu ahte de lei mus dilli fitnat dáppe.

– Mo lei festivála?

– Dat lei máilmmi somá! Mun naffájin ustibiiguin ja konsearttain ja fitnen sihke stand-upas ja semináras. Nu ahte dat lei sihke somá ja miellagiddevaš. 

– Mii lei dat suohttaseamos?

– Dat gal ferte leahkit The Halluci Nationa konsearta bearjadateahkeda. Lei nu jalla buorre mokta ja buohkat dánsejedje buori musihkkii.

– Jáhkát go ahte finat fas Riddu Riđus eará háve?

– Jo, mun gal boađán nuppes go miessemearkun ii šatta!

– Lea go dus festiválaráva?

– Váldde mielde arveponcho! Ja diŋggaid maiguin oađát bures ja bisut liekkasin. Ja de lean maid oaidnán ahte ii leat bággu válljet buori outfit lieggasa badjel, aistton buot lea dohkkehuvvon. 

Rabai olles festivála

Deanu nieida, Ellinor Skartland, lea beaggán olu maŋemuš mánuid.

Olusat dáidet muitit go son joavkkuinis SOÁ:in searvvai Sámi Grand Prixii ja njuolggo TV:s muitalii čielgasit sámi festiválaide ahte SOÁ:s livččii dilli čuojahit geasset.

Triksa orui doaibmamin bures go Ellinor rabai ge olles Riddu Riđđu-festivála duorastaga.

Muhto ovdalgo dan sáhtii dahkat, de fertii vuos beassat Olmmáivággái. 

Govva: Daniel Skog/Riddu Riđđu

– Mátki lei buorre! Mun oainnat osten ođđa biilla ovdal Riddu Riđu nu ahte dát šattai vuosttaš tuvra maid vudjen ođuhiin. 

– Leat go don ovdal leamašan Riddu Riđus?

– Jo, mun ledjen 2018 Riddu Nuorat-prográmmas mielde. 

– Mii du buoremus Riddu-muitu lea?

– Hmmm, dat gal ferte leat bearjadateahkeda čuožžut lávddis Halluci Nationiin ja dánsut singuin. 

– Mo lei dán jagáš festivála du mielas?

– Dat lei máilmmi buorre. Dá lei vuosttaš geardi mun bessen návddašit festiválaeallima rávesolmmožin, ja lei nu somá go olbmot bohte dearvvahit ja háleštit.

– Mii lei suohttaseamos dán jagáš festiválas?

– Čuojahit konsearttas. Dat lei nu erenomáš ja mun ledjen nu rámis. Go mun bohten lávddi ala, de oidnen ahte gehččiid gaskkas ledje dievva oahppásat ja hui olu deatnulaččat ledje boahtán maiddái. Ja mun smihtten ahte mun lean oaidnán Buffy Sainte-Marie seamma lávdde alde mas mun čužžon, nu ahte dat lei munnje hui stuora gudni. 

– Lea go dus festiválaráva?

– In mun dieđe riekta, buot buoremus lea boahtit buriin mielain ja skihpáriiguin. Ja háleš ođđa olbmuiguin!

Sullásaš lohkamuš