Kultuvra  Ođđasat  |
Author Š

Dál lea ođđa nummár ilbman. Astrid Tuorda (19) lea ovdasiidoáššin dán háve ja Ellinor Skartland (20) fas váldoportreahttan.

Astrid Tuorda (gurut bealde) ja Ellinor Skartland.
Astrid Tuorda (gurut bealde) ja Ellinor Skartland.


Š nummár 120 lea dál almmuhuvvon. Dat lea maŋemus bláđđi dán jagi. Johkamohki nieida Astrid Tuorda lea ovdasiidoáššin.

SGP Cover lea addán sutnje vejolašvuođa čuččodit muhtun sámi stuorámus musihkkalávddiin dán jagi. Earet eará besse son ja eará nuorat SGP Cover-prošeavttas loahpahit sámi musihkkafestivála konseartta beassášlávvordaga.

Vuosttalda Gállok-ruvkke

Priváhtan son ja su bearaš vuosttaldit Gállok-ruvkke ásaheami. Sii eai bargga bohccuiguin, muhto Astrida mánnávuođaruoktu šattašii gosii ruvkke lagamus ránnján.

Su áhčči lea dievas aktivista.

Iežas oaidná hobby-aktivistan.

– Mu mielas mis lea nanu oktasašvuohta Sámis. Erenoamážit min nuoraid gaskkas. Addá oadjebasvuođa go it dárbbat akto dáistalit, dadjá Astrid.

Ellinor Skartland – ođđa násti Sámis

Váldoportreahttan dán háve lea Ellinor Skartland (20). Son lea lávken musihkkalávddis teáhterlávdái.

Ellinor ja joavku SOÁ bohte nubbin 2022 Sámi Grand Prixas lávlagiin “Áiggi mielde”. Dan maŋŋel čuččodedje olu Sámi stuorámus festiválalávddiin.

Maŋemus vahkuid lea son ja Beaivváš Sámi Našunála Teáhter mátkkoštan viidát Sámis čájehit juovlačájálmasa “Muohtaoabbá”.

Kristian Tapio ja Ellinor Skartland.
Ellinor Skartland ja Kristian Tapio “Muohtaoabbá”-bihtás. Govven: Aslak Mikal MIenna


Ellinor lea beassan čájehit ahte hálddaša máŋga lávdedáidaga. Ieš oaidná dán dušše álgun.

– 2022 lea leamaš erenoamáš jahki munnje. Mus lei mánnávuođaniehkun šaddat artistan ja čuožžut lávddiin. Dán jagi lean beassan bargat juste dan. Dat movttiidahttá mu joatkit, lohká Ellinor.

Olu eará

Ođđaseamos bláđis beasat maid lohkat eará nuorra Beaivváža neavttára birra, Kristian Tapio (20). Mii leat maid fitnan Oslos gos boazosámi nieida Elle Martine Eira (26) bargá advokáhtan ja lágasta stuora ruhtaáššiin.

Vuodjantaleanttain Sandra Baltoin, artisttain Katarina Barrukain ja ođđa filbmadahkkiin Vegard Bjørsmoain leat maid ságastallan.

Sisdoallolistu
Oassi das maid ođđaseamos bláđis beasat lohkat.

– Mii leat hui duhtavaččat dáinna nummáriin. Ii leat go sávvat buori lohkamuša, dadjá váldodoaimmaheaddji Niels Ovllá Oskal Dunfjell.

Tags:    Astrid Tuorda   •   Ellinor Skartland   •   Nuoraidmagasiidna   •   Ođđa nummár   •   Ođđasat   •   Š   •   ungdomsmagasin   •  

Sullasaš lohkamuš