Kultuvra  Portreahtta  Sporta  |
Author Iŋgá Káre Márjá I. Utsi

Guokte vahkku lea kárášjohkalaš Thor David Rasmus (15) gilvalan, nuppe beale meara, USA:s, skohtercrossas. Ulbmil livččii gávdnat teama boahtte jagi vuodjimiidda.

Leaktu ja gelddolašvuohta ii gal váilo go Thor David njuike fievrru ala. 
Govven: Priváhta
Leaktu ja gelddolašvuohta ii gal váilo go Thor David njuike fievrru ala. Govven: Priváhta

Les på norsk

Doppe lea hui somá, ollu stuorát sadji muhto Norga lea fiidnát riika, lea vástádus 

go jearrat Thor Davidis mo lovttii USA:s. 

Olles guokte vahkku lei Thor David gilvaleamen Amsoil Snowcross-gilvvuin.

Vuosttaš vahkku gilvalii Princetonis, Minnesotas ja nuppi vahkku gis Dubuques, Iowas.

Skohtercrossa gilvvuin lea ulbmil mohkkasaddat, skirvehit ja njuiket skohteriin sullii kilomehter guhkkosaš bánas.

Máđijain leat dávjá časkkáhagat mat gáibidit olu vuoddjis, sihke fysalaččat ja mentálalaččat. 

Oktiibuot galggai Thor David vuodjit njeallje vuoru Green Mountain Racing teama ovddas. 

Thor Davida nummár #106 oidno bures skohteris. Govven: Priváhta

Vuosttaš guovtti vuorus vuittii guokte kvalifiserenheata, muhto loahppagilvvuin son gopmánii skohteriin ja bávččagahtii gieđa.  

– Dat manai bures ja mun válden hui gulul hárjehallamiin dan maŋŋel, dadjá Thor David. 

Das orui leamen ávkin go goalmmát vuorus de vuittii ge Thor David 14–15-luohká loahppagilvvuin, ja njealját vuorus gis bođii nubbin. 

– Lei hui buorre dovdu go manai nie bures, dadjá Thor David. 

Loga maid: E-sporta lea somá ja kula!

Albma mohtorgánda 

Dá lea njealját jahki go Thor David lea skohtercrossa vuodján. 

– Mun álgen álggos skohtercrossain dušše somás dihte vai lea juoga maid sáhtán bargat dálvet, muhto dat manai nu bures ahte áhčiin mearrideimme áŋgiruššat dainna, dadjá Thor David.

Vaikko Thor David ii leat go njeallje jagi skohtercrossa vuodján, de ii leat crossa ja mohtor amas ášši sutnje. 

– Geasset láven gis mohtorcrossa vuodjit, ja dán geasi šaddá logát jahki go vuoján mohtorcrossa, dadjá Thor David.

Thor David Álttá-gánddain Jan Even Romsdalain guhte nai vujii Green Mountain Racing ovddas. Govven: Priváhta

Thor David mieđiha aŋkke ahte son dál áŋgiruššá eambbo skohtercrossain go iežas mielas hálddaša dan buorebut. 

– Mohtorcrossain lea leamašan hui nuo ja ná dáid maŋemuš jagiid. Mun in leat nákcen vuodjit seamma bures go ovdal, maŋŋel go klássejin bajás MX junior-luohkái, muhto muđui gal lea mannan bures, čilge Thor David.

Ovdalgo vulggii USA:i de lei bidjan mihttun čájehit ahte sus lea duođaid beroštupmi vuodjit proffan. 

– Háliidin ahte eará teamat maid galge oaidnit mu ja smihttet ahte heivešin singuin boahtte jagi vuodjit olles sesoŋŋa. Dán rádjái orrot leamen moadde teama geain lea beroštupmi, dadjá Thor David.

Loga maid: Dihtet go dán?

Garra bargu sutnje guhte áigu bajemussii ollet

Go galgá áŋgiruššat proffan beassat skohtercrossa-gilvuide, de ferte geavahit olu áiggi dasa. 

Thor David muitala ahte son hárjehallá persovnnalaš hárjeheaddjiin golbmii vahkkui.

Govven: Priváhta

– Vuoján maid ieš skohteriin bánas goit guktii vahkkui. Mun hárjehalan rievttimiel juohke beaivi jus nagodan. 

Iežas mátkkis šaddat proffan de lea maid Thor David čoaggán olu sponsoriid. Máŋgasat dáin leat su ruovttubáikki fitnodagat.

– Lea viehka somá go Kárášjogas háliidit ahte mun galggan liikostuvvat, ja vásihit dákkár diŋggaid. Sii dahke maiddái USA mátki vejolažžan.

Loga maid: Jurddaš jus mun doppe

Loga maid: Danin fertet diehtit ahte lean sápmelaš

Livččii doarvái dušše kvalifiseret 

Thor Davida boahtte niehku lea vuodjit olles sesoŋŋa USA:s, mii mearkkaša ahte son ferte leahkit olles dálvvi doppe.

Muhto son ii loga gal iežas vel ollen smiehttat nu olu dan birra.

– Mun in dieđe mo de šattašii, muhto jáhkán ahte ferten doppe de vázzit skuvlla. In dieđe mo dat oroš go in leat vel šaddan hállat olbmuiguin geat leat mu agis doppe, nu ahte mun in riekta dieđe makkárat ležžet, dadjá Thor David.

Juoga maid son juobe lea smiehttan, lea man guhká son áiggošii joatkkit skohtercrossain.

Govven: Priváhta

– Mun gal jáhkán ahte boađán viehka máŋga jagi vel vuodjit skohtercrossa, muhto das lea maid hui olu dadjamuš mo dat manná gilvvuin ja nie, dadjá Thor David.

Go jearrat mii su loahppamihttu livččii iežas skohtercrossa karriearas, de lea vástádus čielggas. 

– Mu ulbmil lea kvalifiseret Pro-loahppagilvvuide USA:s. Dušše kvalifiseret. 

– Dat lea dat gilvu gos buot dat buoremusat vudjet nu go Elias Ishoel. Buot stuorámus niehku gal livččii dieđus vuoitit olles sesoŋŋa, loahpaha Thor David. 

Tags:    Duostilis nuorat   •   Link i bio   •   Nuoraidmagasiidna   •   Š   •   Sporta   •   Thor David Rasmus   •  

Sullásaš lohkamuš